ભાઈ…આ તો ખાનદાની ક્રિમીનલ નીકળ્યો!: પુણે પોર્શ કારના આરોપીના દાદાનું અંડરવર્લ્ડ સાથે કનેક્શન, ભાઈ સાથે મિલકતના વિવાદોમાં છોટા રાજન પાસે મદદ માગી હતી

પુણેમાં દારૂના નશામાં પોર્શ કાર ચલાવીને બે એન્જિનિયરોની હત્યા કરનાર સગીર આરોપીના દાદા સુરેન્દ્ર અગ્રવાલના અંડરવર્લ્ડ સાથે કનેક્શન હોવાનું જાણવા મળ્યું છે. જણાવવામાં આવી રહ્યું છે કે 2021માં સુરેન્દ્રએ તેના ભાઈ આરકે અગ્રવાલ સાથે પ્રોપર્ટી વિવાદને ઉકેલવા માટે છોટા રાજન પાસે મદદ માગી હતી. મહારાષ્ટ્રના નાયબ મુખ્યમંત્રી દેવેન્દ્ર ફડણવીસે કહ્યું છે કે આની પણ તપાસ કરવામાં આવશે.

બીજી તરફ, પોલીસે સગીર આરોપી કરતા તેના પિતા વિશાલ અગ્રવાલ પર વધુ આરોપો લગાવ્યા છે. FIR મુજબ, રિયલ એસ્ટેટ ડેવલપર વિશાલ જાણતો હતો કે તેનો પુત્ર સગીર છે. તેમ છતાં, તેણે માત્ર તેના પુત્રને 2.50 કરોડ રૂપિયાની નંબર પ્લેટ વિનાની પોર્શ કાર આપી, પબમાં દારૂની મહેફિલ માટે તેમનું ક્રેડિટ કાર્ડ પણ આપ્યું.

આ કાર્ડથી આરોપીએ 90 મિનિટમાં 48 હજાર રૂપિયાનું બિલ ચૂકવી દીધું હતું. કારના ડ્રાઈવરે આરોપીને કાર આપવાની ના પાડી હતી, પરંતુ પિતા વિશાલના કહેવાથી તેણે કાર આપી હતી. 18મી મેની રાત્રે, આરોપીએ એક પબમાં દારૂની મહેફિલ બાદ બાઇક પર સવાર યુવક અને યુવતીને કાર સાથે ટક્કર મારી હતી. આ અકસ્માતમાં બંનેના મોત નિપજ્યા હતા.

પોલીસ પિતા પાસેથી આ 4 સવાલોના જવાબ માગી રહી છે…

1. બાળકને ખર્ચ કરવા માટે પોકેટ મની કેવી રીતે આપવામાં આવી? 2. જે વાહનનું રજીસ્ટ્રેશન નથી તે રોડ પર કેવી રીતે ચલાવાયું? 3. કેસ નોંધાયા બાદ વિશાલ અગ્રવાલ કેમ ફરાર થઈ ગયો? 4. વિશાલ સાથે ફીચર ફોન મળી આવ્યો હતો. સ્માર્ટફોન ક્યાં છે?

જુવેનાઈલ બોર્ડે આરોપીને 5 જૂન સુધી બાળ સુધાર કેન્દ્ર મોકલ્યો

આ તસવીર પબના CCTV ફૂટેજની છે. અકસ્માત પહેલાં, સગીર તેના મિત્રો સાથે દારૂ પીધો હતો અને દારૂના નશામાં કાર ચલાવી

ઘટનાના બીજા દિવસે, જુવેનાઇલ જસ્ટિસ બોર્ડે સગીર આરોપીને 7500 હજારના બોન્ડ અને માર્ગ સલામતી પર 300 શબ્દોનો નિબંધ લખવાની સજા ફટકારીને જામીન મંજૂર કર્યા હતા. આ નિર્ણયનો દેશભરમાં વિરોધ થયો હતો. જ્યારે પુણેમાં લોકો હડતાળ પર ઉતર્યા ત્યારે મહારાષ્ટ્ર સરકારે બોર્ડને નિર્ણય પર પુનર્વિચાર કરવા કહ્યું.

બુધવારે (22 મે) બોર્ડે ફરીવાર આરોપીઓને પૂછપરછ માટે બોલાવ્યા. અહીં પોલીસે કહ્યું કે આ ગુનો ક્રૂર રીતે કરવામાં આવ્યો હતો. આરોપીની ઉંમર 17 વર્ષ 8 મહિના છે. તે મોંઘી કાર ચલાવે છે. દારૂ પીવે છે અને પુખ્ત વયની જેમ વર્તે છે. તેથી આને પણ ધ્યાનમાં લેવું જોઈએ. આ પછી, બોર્ડે જામીનનો નિર્ણય રદ કર્યો અને આરોપીને 5 જૂન સુધી કિશોર સુધાર ગૃહમાં મોકલી આપ્યો.

અત્યાર સુધીમાં આરોપીના પિતા સહિત 5 લોકોની ધરપકડ કરવામાં આવી છે પુણે પોલીસ આરોપી યુવકના પિતા બિલ્ડર વિશાલ અગ્રવાલની મંગળવારે (21 મે) ધરપકડ કરવામાં આવી હતી. બુધવારે (22 મે) તેને કોર્ટમાં રજૂ કરવામાં આવ્યો હતો. કોર્ટે તેને 24 મે સુધી પોલીસ કસ્ટડીમાં મોકલી દીધો છે. કોર્ટમાંથી લઈ જતી વખતે કેટલાક લોકોએ પોલીસ વાન પર શાહી ફેંકી હતી અને સૂત્રોચ્ચાર કર્યા હતા.

પોલીસે અત્યાર સુધીમાં આરોપીના પિતા વિશાલ અગ્રવાલ સહિત 5 લોકોની ધરપકડ કરી છે. ધરપકડ કરાયેલા અન્ય ચાર લોકોમાં પુણેની કોજી રેસ્ટોરન્ટના માલિકના પુત્ર નમન પ્રહલાદ ભુતડા, તેના મેનેજર સચિન કાટકર, બ્લેક ક્લબ હોટલના મેનેજર સંદીપ સાંગલે અને તેમના સ્ટાફ જયેશ બોનકરનો સમાવેશ થાય છે. તેમના પર સગીર આરોપીઓને દારૂ પીરસવાનો આરોપ છે.

પ્રહલાદ ભુતડા, સચિન કાટકર અને સંદીપ સાંગલેને 21 મેના રોજ કોર્ટમાં રજૂ કરવામાં આવ્યા હતા. ત્રણેયને 24 મે સુધી પોલીસ કસ્ટડીમાં મોકલી દેવામાં આવ્યા છે. કોજી રેસ્ટોરન્ટ અને બ્લેક ક્લબ હોટલને સીલ કરવામાં આવી છે.

પોલીસને ગેરમાર્ગે દોરવા આરોપીના પિતાએ અનેક કાર બદલી
પુત્રના અકસ્માતના સમાચાર સાંભળ્યા બાદ બિલ્ડર વિશાલ અગ્રવાલે પોલીસથી બચવા ભાગી જવાની યોજના બનાવી હતી. પોલીસને ગેરમાર્ગે દોરવા તે પોતાની કારમાં ઘરેથી નીકળ્યો અને ડ્રાઈવરને મુંબઈ લઈ જવા કહ્યું. તેણે બીજા ડ્રાઈવરને તેની બીજી કારમાં ગોવા જવા કહ્યું.

મુંબઈ જતી વખતે વિશાલ કારમાંથી અધવચ્ચે નીચે ઉતરી ગયો હતો. આ પછી તેણે છત્રપતિ સંભાજીનગર (ઔરંગાબાદ) જવા માટે મિત્રની કારનો ઉપયોગ કર્યો. પોલીસના જણાવ્યા અનુસાર, વિશાલ અગ્રવાલે માત્ર ગેરમાર્ગે દોરવા માટે અનેક કારનો ઉપયોગ કર્યો હતો. તેણે નવા સિમ કાર્ડનો ઉપયોગ પણ શરૂ કરી દીધો હતો, જેથી તેનો નંબર ટ્રેક ન થઈ શકે.

જ્યારે પોલીસને માહિતી મળી કે તે તેના મિત્રની કારમાં છે, ત્યારે તેઓએ જીપીએસ દ્વારા વાહનને ટ્રેક કરવાનું શરૂ કર્યું. પુણે ક્રાઈમ બ્રાન્ચની ટીમે સીસીટીવી કેમેરાના ફૂટેજનો ઉપયોગ કરીને વિશાલ અગ્રવાલની ઓળખ કરી હતી. આખરે 21મી મેની રાત્રે પોલીસે સંભાજીનગરની એક લોજ પર દરોડો પાડી વિશાલ અને અન્ય બે લોકોની ધરપકડ કરી હતી.

આરોપીના પિતા વિશાલ અગ્રવાલને બુધવારે કોર્ટમાં રજૂ કરવામાં આવ્યો હતો. આ દરમિયાન કેટલાક લોકોએ પોલીસ વાન પર શાહી ફેંકી હતી. કોર્ટે વિશાલને 24 મે સુધી પોલીસ કસ્ટડીમાં મોકલી દીધો છે.

2.44 કરોડની કાર, 1758 રૂપિયા માટે રજીસ્ટ્રેશન થયું નથી
આરટીઓ અધિકારી સંજીવ ભોરના જણાવ્યા અનુસાર, આરોપીના પિતાએ માર્ચમાં બેંગલુરુના એક ડીલર પાસેથી 2.44 કરોડ રૂપિયામાં ઇલેક્ટ્રિક લક્ઝરી સ્પોર્ટ્સ સેડાન પોર્શ કાર ખરીદી હતી. ડીલરે ટેમ્પરેરી રજિસ્ટ્રેશન બાદ આ કાર વિશાલને સોંપી હતી. જે 18 માર્ચ 2024થી 17 સપ્ટેમ્બર 2024 સુધી વેલિડ છે.

કાર માલિક 18 એપ્રિલ 2024ના રોજ રજીસ્ટ્રેશન માટે પુણેની આરટીઓ ઓફિસમાં આવ્યો હતો. તપાસ અને તમામ પ્રક્રિયા તે જ દિવસે પૂરી થઈ ગઈ હતી, પરંતુ 1758 રૂપિયા નહીં ચૂકવવાને કારણે કારનો રજિસ્ટ્રેશન નંબર આપવામાં આવ્યો ન હતો.

સંજીવ ભોરે જણાવ્યું કે એક્ટ મુજબ, જો કોઈ સગીર અકસ્માતનો ભોગ બને તો તેને 25 વર્ષની ઉંમર સુધી ડ્રાઈવિંગ લાઇસન્સ મળી શકે નહીં. ફ્લાઈંગ સ્કવોડને શહેરમાં નંબર વગરના વાહનો તાત્કાલિક જપ્ત કરવા સૂચના આપવામાં આવી છે.

સ્થળ પર લાગેલા સીસીટીવીમાં એક પોર્શ ખૂબ જ ઝડપે પસાર થતી દેખાઈ રહી છે.

બંને મૃતકો મધ્યપ્રદેશના રહેવાસી હતા
લોકોએ જણાવ્યું કે કાર સાથે અથડાવાને કારણે બાઇક સવાર યુવતી હવામાં કેટલાય ફૂટ ઉછળીને જમીન પર પડી હતી અને યુવક નજીકમાં ઉભેલી અન્ય કાર સાથે અથડાયો હતો. આ અકસ્માતમાં મધ્યપ્રદેશના રહેવાસી એન્જીનીયર અનીશ અવડિયા અને અશ્વિની કોષ્ટાનું મૃત્યુ થયું હતું. બંને પાર્ટીમાંથી પરત ફરી રહ્યા હતા.

કાર સાથે અથડાતાં અનીશ અવધિયા અને અશ્વિની કોષ્ટાનું ઘટનાસ્થળે જ મોત થયું હતું.