રાજસ્થાનના CM ભજનલાલ શર્માની જીભ લપસી: અટલ બિહારી વાજપેયીને બદલે પીએમ નરેન્દ્ર મોદીને શ્રદ્ધાંજલિ આપી; સોશિયલ મીડિયા પર ટ્રોલ થયા

મુખ્યમંત્રી ભજન લાલ શર્માની સોમવારે જયપુર નજીક અજયરાજપુરા ગામમાં વિકાસ ભારત સંકલ્પ યાત્રાની સભા દરમિયાન જીભ લપસી ગઈ. સીએમ શર્માએ પૂર્વ પીએમ અટલ બિહારી વાજપેયીને બદલે વડાપ્રધાન નરેન્દ્ર મોદીને શ્રદ્ધાંજલિ આપી હતી. સભા દરમિયાન શર્મા વાજપેયીના સમયમાં શરૂ થયેલી યોજનાઓની પ્રશંસા કરી રહ્યા હતા, જ્યારે આ ભૂલ થઈ હતી. આ ભૂલને કારણે સીએમ ભજનલાલ સોશિયલ મીડિયા પર ટ્રોલ થવા લાગ્યા.

સીએમ શર્માએ કહ્યું- વાજપેયીએ 1998માં રાજસ્થાનમાંથી પરમાણુ વિસ્ફોટ કરીને દુનિયાની સામે ભારતની તાકાત બતાવવાનું કામ કર્યું હતું. આવા સફળ વડાપ્રધાન નરેન્દ્ર મોદીજીને હું હૃદયપૂર્વક શ્રદ્ધાંજલિ પાઠવું છું. ભજનલાલ શર્માએ ભાષણ આપવાનું ચાલુ રાખ્યું, તેમને ખ્યાલ નહોતો કે તેમણે અટલ બિહારી વાજપેયીને બદલે પીએમ નરેન્દ્ર મોદીને શ્રદ્ધાંજલિ આપી હતી.

સીએમ શર્માએ વધુમાં કહ્યું- વડાપ્રધાન નરેન્દ્ર મોદીના નેતૃત્વમાં પંડિત દીનદયાળ ઉપાધ્યાયની અંત્યોદય યોજના અને આદરણીય અટલજીના સ્વપ્નને સાકાર કરવા માટે કામ કરવામાં આવી રહ્યું છે. આજે સંકલ્પ યાત્રાએ અમારી તમામ યોજનાઓ પૂર્ણ કરવા માટે શરૂ કરી છે. સંકલ્પ યાત્રા દ્વારા આપણે ગામડાના ગરીબો સુધી યોજનાઓ લઈ જઈ તેનું મૂલ્યાંકન કરવાનું છે. આ યોજનાઓમાંથી આપણને કેટલો લાભ મળે છે તેનું પણ મૂલ્યાંકન કરવું પડશે. આપણે એ સુનિશ્ચિત કરવું પડશે કે આ યોજનાઓનો લાભ ગરીબ લોકો સુધી પહોંચે.

સોશિયલ મીડિયા પર સીએમને ટ્રોલ કરવામાં આવી રહ્યા છે.

સોશિયલ મીડિયા પર CM ટ્રોલ
સીએમ શર્માની જીભ લપસી જતાં સોશિયલ મીડિયા પર ટ્રોલ થઈ રહ્યા છે. પીએમ નરેન્દ્ર મોદીને શ્રદ્ધાંજલિ આપવાની વાત કરતા તેમનો એક વીડિયો સોશિયલ મીડિયા પર વાઇરલ થઈ રહ્યો છે. ઘણા યુઝર્સ આકરી ટિપ્પણી કરી રહ્યા છે અને મુખ્યમંત્રીને અનુભવ ન હોવા અંગે સવાલો ઉભા કરી રહ્યા છે.

ભજનલાલના શપથ ગ્રહણ સમારોહ દરમિયાન એનાઉન્સરની જીભ લપસી હતી
સીએમ ભજન લાલના શપથ ગ્રહણ સમારોહ દરમિયાન એનાઉન્સરની જીભ લપસી હતી. એનાઉન્સરે વડાપ્રધાન નરેન્દ્ર મોદીને બદલે મુખ્યમંત્રી નરેન્દ્ર મોદી કહ્યું હતું. એનાઉન્સરની આ ભૂલનો વીડિયો સોશિયલ મીડિયા પર ખૂબ ચર્ચામાં રહ્યો હતો.