નવી દિલ્હી7 મિનિટ પેહલા
- કૉપી લિંક
અનિરુદ્ધ શર્મા | નવી દિલ્હી નીટ પેપરલીક કેસમાં સર્વોચ્ચ અદાલતના નિર્દેશને પગલે બનેલી આર. રાધાકૃષ્ણન સમિતિએ એનટીએ (નેશનલ ટેસ્ટિંગ એજન્સી)ની પુનર્રચના કરવા ભલામણ કરી છે. હવાઈમથકે મુસાફરોની ઓળખ માટે જે રીતે ડીજી યાત્રા સિસ્ટમનો ઉપયોગ થાય છે તે રીતે વિદ્યાર્થીઓની ખરાઈ કરવા માટે ડીજી એક્ઝામ સિસ્ટમ વિકસિત કરવા સમિતિએ ભલામણ કરી છે. બીજી તરફ માત્ર સરકારી સ્કૂલ-કૉલેજમાં જ ટેસ્ટિંગ સેન્ટર રાખવા ભલામણ કરી છે. કેન્દ્ર સરકારે સર્વોચ્ચ અદાલતને આ અહેવાલ સુપરત કર્યો છે અને મોટા ભાગની ભલામણોનો અક્ષરશ: અમલ કરવાની ખાતરી આપી છે. શિક્ષણમંત્રી ધર્મેન્દ્ર પ્રધાને મંગળવારે કહ્યું હતું કે એનટીએ ઉચ્ચ શિક્ષણ સંસ્થાઓમાં પ્રવેશ માટેની નીટ, જેઈઈ, સીયુઈટી સહિત અંદાજે 15 જેટલી પરીક્ષાઓ જ યોજશે પણ ભરતી માટે યોજાતી 2થી 3 પરીક્ષાનું આયોજન નહીં કરે. નીટ સિવાયની બધી પરીક્ષા કમ્પ્યુટર આધારિત હશે. નીટ પેન-પેપર ટેસ્ટ (પીપીટી) મોડમાં ઓએમઆર શીટ પર લેવી કે કમ્પ્યુટર બેઝ્ડ ટેસ્ટ (સીબીટી) યોજવી તે અંગે આરોગ્ય મંત્રાલયે નિર્ણય લેવાનો છે. એક-બે અઠવાડિયાંમાં નિર્ણય લેવાયા પછી નીટ-2025નું જાહેરનામું બહાર પડાશે.
સમિતિએ અંતરિયાળ અને ઓછી વસ્તીવાળા વિસ્તારો માટે મોબાઇલ ટેસ્ટિંગ સેન્ટર ઊભાં કરવાના સૂચન સાથે સીયુઈટીમાં વિષયના વિકલ્પ ઓછા રાખવાની ભલામણ પણ કરી છે. એનટીએમાં 10 વર્ટિકલ બનાવવા ભલામણ રાધાકૃષ્ણન સમિતિએ એનટીએમાં 10 વર્ટિકલ (ડિજિટલ ઇન્ફ્રાસ્ટ્રક્ચર, ટેસ્ટિંગ સેન્ટર ઇન્ફ્રાસ્ટ્રક્ચર, રિસર્ચ એન્ડ ડેવલપમેન્ટ, ટ્રાન્સપરન્સી એન્ડ કોમ્યુનિકેશન, ઇન્ટરનલ કોલેબોરેશન, ઇન્ફોર્મેશન સિક્યોરિટી, ટેસ્ટ સિક્યોરિટી એન્ડ રિયલ ટાઇમ મૉનિટરિંગ, વિજિલન્સ એન્ડ ફોરેન્સિક, એડમિન-એચઆર, ફાઈનાન્સ એન્ડ લીગલ વગેરે) બનાવવા ભલામણ કરી છે. જોકે પહેલાં પણ 9 વર્ટિકલ (એન્જિનિયરિંગ, મેડિકલ, યુજીસી-નેટ, અન્ય પરીક્ષાઓ વગેરે) હતા. એનટીએના સંચાલન માટે ડીજીની સાથે બે એડિશન ડીજી અને 4 ડાયરેક્ટર ઉમેરવા જોઈએ. સમિતિએ નવા 8 ડાયરેક્ટર અને 8 જોઇન્ટ ડાયરેક્ટર પદ ઊભાં કરવા પણ ભલામણ કરી છે. સમિતિએ કહ્યું કે ગવર્નિંગ કમિટીના સભ્યોની નિમણૂક 3 વર્ષ માટે કરવી અને નવરચના પછી એનટીએની 5 વર્ષે સમીક્ષા કરવી. એનટીએની ગવર્નિંગ બૉડીની દર 3 મહિને બેઠક યોજવી.
37 હજારથી વધુ લોકોના પ્રતિભાવ, 23 બેઠકો બાદ નિર્ણયો લેવામાં આવ્યા
- NTAએ દરેક પેપરના 3 સેટ બનાવવા. તેને એ, બી, સી, ડી જેવું કોડિંગ કરવાને બદલે સ્પેશિયલ કોડિંગ આપવું. અલગ સેટમાં સવાલોનો ક્રમ જ નહીં પણ વિકલ્પોનો ક્રમ પણ બદલવો. પેપરના પરિવહન માટે ઇન્ડિયા પોસ્ટ સાથે કરાર કરવા.
- સમિતિએ પેન-પેપર મોડ અને કમ્પ્યુટર બેઝ્ડ ટેસ્ટ મોડના હાઈબ્રિજ મોડ એટલે કે કમ્પ્યુટર આસિસ્ટેડ સિક્યોર પેન પેપર ટેસ્ટ (સીપીપીટી) મોડ અપનાવવા ભલામણ કરી છે. તેમાં કમ્પ્યુટર બેઝ્ડ પેપર (જે એક જ રૂમમાં બેઠેલા વિદ્યાર્થીઓ માટે અલગ અલગ હોય છે)ને ટેસ્ટિંગ સેન્ટર પર હાઈસ્પીડ પ્રિન્ટરમાં છાપીને OMR શીટ પર જવાબ અપાય છે.
- ફરિયાદોના સમાધાન માટે ગ્રીવેન્સ રિપોર્ટિંગ એન્ડ રિડ્રેસલ સેલ સ્થાપવા અને મોટી પરીક્ષાઓનો તણાવ ઘટાડવા માટે મેન્ટલ હેલ્થ સેલ રચવાની ભલામણ કરાઈ છે. { પેપર સેટ કરવા, છાપવા, સ્ટોરેજ, પરિવહન સહિતની દરેક પ્રક્રિયામાં વરિષ્ઠ એનટીએ પ્રતિનિધિની હાજરી ફરજિયાત કરવી.
- સમિતિ પાસે 37,144 રિસ્પોન્સ આવ્યા હતા. સમિતિએ 23 બેઠક કર્યા પછી કુલ 101 ભલામણ કરી છે.
50 સીટર બસમાં 30 લેપટોપ સેન્ટર બનાવાશે
- સમિતિએ કહ્યું કે દરેક જિલ્લામાં એક ટેસ્ટિંગ સેન્ટર હોવું જોઈએ. મોટી પરીક્ષાઓમાં રાજ્ય સરકારો પાસેથી ચૂંટણીની જેમ મદદ લેવી જોઈએ. સરકારી શિક્ષણ સંકુલમાં જ ટેસ્ટિંગ સેન્ટર બનાવવાં જોઈએ.
- 40-50 બેઠકવાળી બસમાં 30 લેપટોપ સાથે સર્વરની સુવિધાવાળાં મોબાઇલ ટેસ્ટિંગ સેન્ટર બનાવવા સમિતિએ સૂચન કર્યું છે. આવી 5 બસ ભેગી કરીને 150 વિદ્યાર્થી માટે સિંગલ ટેસ્ટ સેન્ટર બનાવી શકાશે.
