30 મિનિટ પેહલા
- કૉપી લિંક
IPLની 18મી સિઝન 22 માર્ચથી શરૂ થશે. વિરાટ કોહલી, રોહિત શર્મા અને એમ એસ ધોની જેવા મોટા પ્લેયર્સ પોતાની ટીમોને ખિતાબ અપાવવા ઉતરશે. ત્યારે નેહલ વાધેરા, સૂર્યાંશ શેડગે અને 13 વર્ષના વૈભવ સૂર્યવંશી જેવા યુવા અનકેપ્ડ ખેલાડી પણ લીગમાં ચમક વિખેરતા નજરે પડશે.
આ 10 અનકેપ્ડ ખેલાડીઓ પર નજર રાખો…
1. વૈભવ સૂર્યવંશી, રાજસ્થાન રોયલ્સ
બિહારના ડાબા હાથના બેટ્સમેન વૈભવ સૂર્યવંશીને આ વર્ષે રાજસ્થાન રોયલ્સે 1.10 કરોડ રૂપિયામાં ખરીદ્યો હતો. 13 વર્ષનો વૈભવ આઈપીએલમાં વેચાતો સૌથી યુવા ખેલાડી છે. વૈભવ આંતરરાષ્ટ્રીય યુવા ક્રિકેટમાં સદી ફટકારનાર સૌથી નાની ઉંમરનો ક્રિકેટર પણ છે. તેણે ગયા વર્ષે ઓસ્ટ્રેલિયા સામે 104 રનની ઇનિંગ રમી હતી.
વૈભવે 2023-24 સીઝનમાં બિહાર માટે ત્રણેય ફોર્મેટમાં ડેબ્યૂ કર્યું હતું. તેણે 12 વર્ષની ઉંમરે રણજીમાં પદાર્પણ કરીને ઇતિહાસ રચ્યો. તેમણે વિનુ માંકડ ટ્રોફીની પાંચ મેચમાં 400 રન બનાવ્યા, જેમાં 128 રનની અણનમ ઇનિંગનો સમાવેશ થાય છે. તેણે અંડર-19 એશિયા કપમાં ટીમ ઈન્ડિયા માટે ઓપનિંગ પણ કરી હતી. તે યશસ્વી જયસ્વાલ સાથે ઓપનિંગ કરી શકે છે.
2. નમન ધીર, મુંબઈ ઈન્ડિયન્સ
પંજાબના જમણા હાથના બેટ્સમેન નમન ધીરને આ વર્ષે મુંબઈ ઇન્ડિયન્સે 5.25 કરોડ રૂપિયામાં ખરીદ્યો હતો. નમન 25 વર્ષનો આક્રમક બેટ્સમેન છે. તેણે 2023 રણજી ટ્રોફીમાં 2 સદી ફટકારી હતી. 2023માં સૈયદ મુશ્તાક અલી ટ્રોફી જીતનારી પંજાબ ટીમ માટે ધીરે લગભગ 192ના સ્ટ્રાઇક રેટથી સ્કોર કર્યો હતો. ત્યારબાદ તેણે 12 મેચમાં 42.36ની સરેરાશથી 466 રન બનાવ્યા. તેના નામે 8 વિકેટ પણ હતી.
તેને 2024 માં મુંબઈ ઇન્ડિયન્સે 20 લાખ રૂપિયામાં ખરીદ્યો હતો. ટીમ માટે મિડલ ઓર્ડરમાં બેટિંગ કરતા, તેણે 7 મેચમાં 177.22 ના સ્ટ્રાઇક રેટથી 140 રન બનાવ્યા. મેગા હરાજીમાં તેની વિસ્ફોટક બેટિંગે ટીમોનું ધ્યાન ખેંચ્યું, જેના કારણે તેની બોલી 5 કરોડ રૂપિયાને પાર થઈ ગઈ. નમન હવે MI માં ઇશાન કિશનની ખાલી જગ્યા ભરી શકે છે.
3. નેહલ વાઢેરા, પંજાબ કિંગ્સ
પંજાબના નેહલ વાઢેરાને પંજાબ કિંગ્સે 4.20 કરોડ રૂપિયામાં ખરીદ્યો. 24 વર્ષીય નેહલ ડાબા હાથનો બેટ્સમેન છે. તેણે 2018માં શ્રીલંકા સામેની પોતાની પ્રથમ અંડર-19 મેચમાં 81 રનની શાનદાર ઇનિંગ રમી હતી. 2022માં પંજાબ રાજ્ય આંતર-જિલ્લા ટુર્નામેન્ટમાં ભટિંડા સામે ૫૭૮ રન બનાવીને તેણે ધ્યાન ખેંચ્યું. તેણે ગુજરાત સામે રણજી ડેબ્યૂમાં સદી પણ ફટકારી હતી. 2022-23 રણજી સિઝનમાં, તેણે મધ્યપ્રદેશ સામે બેવડી સદી પણ ફટકારી હતી.
સ્થાનિક ક્રિકેટમાં શાનદાર પ્રદર્શન બાદ મુંબઈએ 2023માં નેહલ વાઢેરાને ખરીદ્યો. તેણે 2 સીઝનમાં ટીમ માટે 20 મેચ રમી અને 140ના સ્ટ્રાઇક રેટથી 350 રન બનાવ્યા. આમાં 2 અડધી સદીનો પણ સમાવેશ થાય છે. તેની વિસ્ફોટક બેટિંગને કારણે, ઘણી ટીમોએ મેગા હરાજીમાં તેના માટે બોલી લગાવી, આખરે પંજાબે તેને ખરીદ્યો.
4. અબ્દુલ સમદ, લખનૌ સુપર જાયન્ટ્સ
જમ્મુ અને કાશ્મીરના ક્રિકેટર અબ્દુલ સમદને આ વર્ષે લખનૌ સુપર જાયન્ટ્સે 4.20 કરોડ રૂપિયામાં ખરીદ્યો હતો. 23 વર્ષીય સમદ જમણા હાથનો બેટ્સમેન છે અને લેગ સ્પિન પણ બોલિંગ કરે છે. તેણે 2018-19 સૈયદ મુશ્તાક અલી ટ્રોફીમાં જમ્મુ અને કાશ્મીર માટે ડેબ્યૂ કર્યું હતું, જેમાં તેણે 51 બોલમાં અણનમ 76 રન બનાવ્યા હતા. 2019-20માં, તે જમ્મુ અને કાશ્મીરનો કાયમી ખેલાડી બન્યો અને તેની પ્રથમ રણજી ટ્રોફી સિઝનમાં સતત બે સદી ફટકારી.
ઘરેલુ ક્રિકેટમાં તેના પ્રદર્શન બાદ, સનરાઇઝર્સ હૈદરાબાદે સમદને 20 લાખ રૂપિયામાં ખરીદ્યો. બીજી જ સિઝનમાં, તે પેટ કમિન્સ સામે સતત છગ્ગા ફટકારવા બદલ ચર્ચામાં આવ્યો. તેણે અત્યાર સુધીમાં 50 આઈપીએલ મેચોમાં લગભગ 146ના સ્ટ્રાઈક રેટથી 577 રન બનાવ્યા છે. તે LSGના ફિનિશિંગને મજબૂત બનાવતો જોવા મળશે.
5. આશુતોષ શર્મા, દિલ્હી કેપિટલ્સ
મધ્યપ્રદેશના ઓલરાઉન્ડર આશુતોષ શર્માને આ વર્ષે દિલ્હી કેપિટલ્સે 3.80 કરોડ રૂપિયામાં ખરીદ્યો હતો. આશુતોષ 26 વર્ષનો જમણા હાથનો બેટ્સમેન છે અને બોલિંગ પણ કરે છે. 2023માં, તેણે અરુણાચલ પ્રદેશ સામેની ટી-20માં માત્ર 11 બોલમાં અડધી સદી ફટકારી હતી. તેણે 2018માં સ્થાનિક T20 માં પ્રવેશ કર્યો અને તે પછીના વર્ષે લિસ્ટ Aમાં પ્રવેશ કર્યો.
ઘરેલુ ક્રિકેટમાં સારા પ્રદર્શન બાદ, પંજાબ કિંગ્સે 2024માં આશુતોષને 20 લાખ રૂપિયામાં ખરીદ્યો. આશુતોષનો ઉપયોગ એક પ્રભાવશાળી ખેલાડી તરીકે થતો હતો, તે જસપ્રીત બુમરાહ જેવા બોલરો સામે સરળતાથી છગ્ગા ફટકારતો હતો. તેણે 9 મેચોમાં લગભગ 167ના સ્ટ્રાઇક રેટથી 189 રન બનાવ્યા. હાર્ડ હિટિંગ ક્ષમતાએ મેગા ઓક્શનમાં આશુતોષની કિંમત વધારી, હવે તે દિલ્હી તરફથી રમશે.
6. અંશુલ કંબોજ, ચેન્નાઈ સુપર કિંગ્સ
હરિયાણાના જમણા હાથના ઝડપી બોલર અંશુલ કંબોજને આ વર્ષે ચેન્નાઈ સુપર કિંગ્સે 3.40 કરોડ રૂપિયામાં ખરીદ્યો હતો. 24 વર્ષીય અંશુલે નવેમ્બર 2024માં રણજી ટ્રોફીની એક ઇનિંગમાં બધી 10 વિકેટ લઈને ઇતિહાસ રચ્યો હતો. તેમણે 2023-24 વિજય હજારે ટ્રોફીમાં 10 મેચમાં 17 વિકેટ લઈને હરિયાણાને ટાઇટલ અપાવ્યું. તેણે 2024માં IPL માં ડેબ્યૂ કર્યું હતું અને મુંબઈ ઇન્ડિયન્સ તરફથી રમતી વખતે 2 વિકેટ લીધી હતી. તેણે ટ્રેવિસ હેડ જેવા બેટ્સમેનને બોલ્ડ આઉટ કર્યો હતો, હવે તે ચેન્નાઈ સુપર કિંગ્સ તરફથી રમશે.
7. અંગક્રૃશ રઘુવંશી, કોલકાતા નાઈટ રાઈડર્સ
મુંબઈના જમણા હાથના બેટ્સમેન અંગક્રિશ રઘુવંશીને કોલકાતા નાઈટ રાઈડર્સે 3 કરોડ રૂપિયામાં ખરીદ્યો. 2022નો અંડર-19 વર્લ્ડ કપ જીતનારી ટીમ ઈન્ડિયા માટે 20 વર્ષીય અંગક્રિશે સૌથી વધુ રન બનાવ્યા હતા. તેણે ગ્રુપ સ્ટેજ મેચમાં પણ 144 રનની ઇનિંગ રમી હતી.
રઘુવંશીએ 2023-24 રણજી ટ્રોફીમાં મુંબઈ માટે ડેબ્યૂ કર્યું હતું. તે જ વર્ષે IPLમાં KKR દ્વારા તેની પસંદગી પણ કરવામાં આવી હતી. રઘુવંશીએ ટીમ માટે મોટાભાગની મેચો પ્રભાવશાળી ખેલાડી બનીને રમી હતી. તે પોતાની પહેલી IPL ઇનિંગમાં ફિફ્ટી ફટકારનાર સૌથી યુવા ખેલાડી પણ બન્યો. તેણે દિલ્હી કેપિટલ્સ સામે માત્ર 27 બોલમાં 54 રન બનાવ્યા હતા. મેગા હરાજીમાં ઘણી ટીમોએ તેના માટે બોલી લગાવી હતી, પરંતુ KKR એ તેને જવા દીધો નહીં.
8. સૂર્યાંશ શેડગે, પંજાબ કિંગ્સ
મુંબઈના જમણા હાથના ઓલરાઉન્ડર સૂર્યાંશ શેડગેને પંજાબ કિંગ્સે 30 લાખ રૂપિયામાં ખરીદ્યો. 22 વર્ષનો સૂર્યાંશે ગયા વર્ષે સૈયદ મુશ્તાક અલી ટ્રોફીના નોકઆઉટ મેચોમાં તેણે મુંબઈ માટે મેચવિનિંગ ઇનિંગ્સ રમી હતી. વિદર્ભ સામેની ક્વાર્ટર ફાઇનલમાં તેણે 12 બોલમાં 36 રન બનાવ્યા, જેમાં 4 છગ્ગાનો સમાવેશ થાય છે. ત્યારબાદ તેણે ફાઇનલમાં માત્ર 15 બોલમાં 36 રન બનાવીને ટીમને અંતિમ રેખા પાર પહોંચાડી દીધી. તેણે સેમિફાઇનલમાં પોતાની બોલિંગ કુશળતા બતાવી અને 2 ઓવરમાં માત્ર 11 રન આપીને 2 વિકેટ ઝડપી. ટુર્નામેન્ટમાં સૂર્યાંશે દરેક ચોથા બોલ પર છગ્ગો અને દર 5 બોલ પર 2 બાઉન્ડ્રી ફટકારી.
9. સમીર રિઝવી, દિલ્હી કેપિટલ્સ
ઉત્તર પ્રદેશના જમણા હાથના બેટ્સમેન સમીર રિઝવીને દિલ્હી કેપિટલ્સે 95 લાખ રૂપિયામાં ખરીદ્યો. સમીરે 16 વર્ષની ઉંમરે 2019-20 રણજી ટ્રોફી દરમિયાન ફર્સ્ટ-ક્લાસ ડેબ્યૂ કર્યું હતું. તેણે 2023માં યુપી ટી20 લીગની 9 ઇનિંગ્સમાં 455 રન બનાવ્યા હતા, જેમાં બે સદીનો સમાવેશ થાય છે.
યુપી લીગમાં નામ કમાયા બાદ, ચેન્નાઈ સુપર કિંગ્સે રિઝવીને 7.80 કરોડ રૂપિયામાં ખરીદ્યો. પોતાની પહેલી મેચમાં, તેણે રાશિદ ખાન સામે પહેલા જ બોલ પર સિક્સર ફટકારી હતી. જોકે, ગયા સિઝનમાં તેને વધારે તકો મળી ન હતી અને ચેન્નાઈએ પણ તેને રિલીઝ કરી દીધો હતો. હવે તે દિલ્હીના મિડલ ઓર્ડરને સંભાળશે.
10. લવનીત સિસોદિયા, કોલકાતા નાઈટ રાઈડર્સ
કર્ણાટકના વિકેટકીપર-બેટ્સમેન લવનીત સિસોદિયાને કોલકાતા નાઈટ રાઇડર્સે 30 લાખ રૂપિયામાં ખરીદ્યો. 25 વર્ષીય લવનીત ડાબા હાથનો બેટ્સમેન છે અને ટોપ ઓર્ડરમાં મોટા શોટ રમે છે. તેણે 2021 કોર્પોરેટ 50 ઓવર ટુર્નામેન્ટમાં 129 બોલમાં 26 ચોગ્ગા અને 26 છગ્ગાની મદદથી 312 રન બનાવ્યા હતા.
2022 માં, લવનીતને રોયલ ચેલેન્જર્સ બેંગ્લોરે 20 લાખ રૂપિયામાં ખરીદ્યો હતો પરંતુ ઈજાને કારણે તે બહાર થઈ ગયો હતો. ત્યારબાદ તેણે મહારાજા ટ્રોફી KSCA T20 ટુર્નામેન્ટની ત્રણેય સીઝનમાં શાનદાર પ્રદર્શન કર્યું, દરેક વખતે 30થી વધુની સરેરાશથી 300થી વધુ રન બનાવ્યા. તેણે કર્ણાટક માટે 15 ટી20 મેચમાં 124 રન બનાવ્યા છે.
