Related posts
સ્પોર્ટ્સ ડેસ્ક59 મિનિટ પેહલા
- કૉપી લિંક
પાકિસ્તાન ક્રિકેટ બોર્ડ (PCB)એ ઈન્ટરનેશનલ ક્રિકેટ કાઉન્સિલ (ICC)ને ચેમ્પિયન્સ ટ્રોફી 2025 માટે ત્રણ સ્થળોનો પ્રસ્તાવ મૂક્યો છે. આ ત્રણ સ્થળો લાહોર, કરાચી અને રાવલપિંડી છે. પાકિસ્તાનને ચેમ્પિયન્સ ટ્રોફી 2025ના યજમાન અધિકાર મળ્યા છે. જોકે, હજુ એ સ્પષ્ટ નથી થયું કે ભારત ટુર્નામેન્ટ માટે પાકિસ્તાન જશે કે નહીં.
રિપોર્ટ અનુસાર, PCBએ ટુર્નામેન્ટના સ્થળનો ડ્રાફ્ટ ICCને સુપરત કર્યો છે. આ ટુર્નામેન્ટ આવતા વર્ષે ફેબ્રુઆરી-માર્ચમાં યોજાવાની છે. 1996 ODI વર્લ્ડ કપ પછી આ પ્રથમ વખત છે જ્યારે પાકિસ્તાનને ICC ઇવેન્ટના હોસ્ટિંગ અધિકારો આપવામાં આવ્યા છે.
અમે ICCના સતત સંપર્કમાં છીએ- નકવી
PCBના અધ્યક્ષ મોહસિન નકવીએ લાહોરમાં એક પ્રેસ કોન્ફરન્સમાં કહ્યું કે, અમે ચેમ્પિયન્સ ટ્રોફી માટે પાકિસ્તાનમાં યોજાનારી મેચનું શેડ્યૂલ મોકલી દીધું છે. ICC સુરક્ષા ટીમ આવી અને અમે ખૂબ સારી મીટિંગ કરી. અમે ICC સાથે સતત સંપર્કમાં છીએ. અમે સારી ટુર્નામેન્ટની યજમાની માટે અમારા શ્રેષ્ઠ પ્રયાસો કરી રહ્યા છીએ.
ટીમ ઈન્ડિયાના પાકિસ્તાન જવા પર શંકા
ગયા મહિને એક મીડિયા રિપોર્ટમાં દાવો કરવામાં આવ્યો હતો કે ICC તેને એશિયા કપની જેમ ‘હાઈબ્રિડ મોડલ’ પર આયોજીત કરી શકે છે. ICC એક્ઝિક્યુટિવ બોર્ડના એક સૂત્રએ PTIને જણાવ્યું હતું કે, ‘જો ભારત સરકાર ટીમ ઈન્ડિયાને પાકિસ્તાન મોકલવા માગતી નથી, તો ICC ત્યાંના બોર્ડ પર દબાણ ન કરી શકે. તેણે વિકલ્પ શોધવો પડશે.
એશિયા કપની મેચ ભારતની વિનંતી પર શ્રીલંકામાં યોજાઈ હતી
ગત વર્ષે પણ એશિયા કપની યજમાની પાકિસ્તાનને મળી હતી. ત્યારે પણ જ્યારે ભારત ત્યાં નહોતું ગયું ત્યારે આ ટુર્નામેન્ટ ‘હાઈબ્રિડ મોડલ’ પર યોજાઈ હતી. ભારત સામેની મેચ શ્રીલંકામાં યોજાઈ હતી. કોલંબોમાં રમાયેલી ફાઈનલ મેચમાં ભારતીય ટીમે શ્રીલંકાને 10 વિકેટે હરાવીને ચેમ્પિયનશિપ જીતી લીધી હતી.
ટુર્નામેન્ટમાં 8 ટીમ ભાગ લેશે
છેલ્લી ચેમ્પિયન્સ ટ્રોફી 2017માં ઇંગ્લેન્ડ અને વેલ્સમાં રમાઈ હતી. પાકિસ્તાન તેની ફાઈનલમાં ભારતને હરાવીને ચેમ્પિયન બન્યું હતું. ટુર્નામેન્ટનું શેડ્યુલ હજુ આવ્યું નથી. એવું માનવામાં આવે છે કે ICC સ્થળનું નિરીક્ષણ કર્યા પછી અંતિમ કાર્યક્રમ આવી શકે છે. આ ટુર્નામેન્ટમાં 8 ટીમ ભાગ લેશે અને તે બે અઠવાડિયા સુધી ચાલશે.
