સ્પોર્ટ્સ ડેસ્ક54 મિનિટ પેહલા
- કૉપી લિંક
ચેન્નઈ સુપર કિંગ્સના પૂર્વ કેપ્ટન મહેન્દ્ર સિંહ ધોનીની આ છેલ્લી IPL હોઈ શકે છે. તેણે બધાને ચોંકાવી દીધા અને ટુર્નામેન્ટ શરૂ થવાના એક દિવસ પહેલા જ કેપ્ટનશિપ છોડી દીધી. ઓપનિંગ સેરેમની પહેલા ઋતુરાજ ગાયકવાડ કેપ્ટનના ફોટોશૂટમાં તેની જગ્યાએ CSKના કેપ્ટન તરીકે પહોંચ્યો હતો.
IPL મેનેજમેન્ટે પુષ્ટિ કરી છે કે ગાયકવાડ આ સિઝનમાં ધોનીની જગ્યાએ CSKની કેપ્ટનશિપ કરશે. સુકાની પદ છોડવા છતાં ધોની રમવાનું ચાલુ રાખશે. જોકે, હવે એવી અટકળો ચાલી રહી છે કે આ 42 વર્ષીય ધોનીની છેલ્લી IPL સિઝન હોઈ શકે છે.
રુતુરાજ ગાયકવાડ (યલો જર્સી) IPLના કેપ્ટન ડે ફોટોશૂટમાં CSKના કેપ્ટન તરીકે પહોંચ્યો હતો.
માહીએ કહ્યું હતું- ચેપોકમાં છેલ્લી મેચ રમશે
ધોનીએ ગત સિઝનમાં જ કહ્યું હતું કે તે ચેન્નઈના ચેપોક સ્ટેડિયમમાં તેની કારકિર્દીની છેલ્લી મેચ રમશે. ગત સિઝનમાં ચેન્નઈએ તેની છેલ્લી મેચ ગુજરાતના નરેન્દ્ર મોદી સ્ટેડિયમમાં રમી હતી. જે ટુર્નામેન્ટની ફાઈનલ પણ હતી. CSK તે જીતી હતી પરંતુ ચેપોકમાં મેચ યોજાઈ ન હોવાથી, ધોનીએ વધુ એક સિઝન માટે ટીમ સાથે રહેવાનું નક્કી કર્યું.
હવે CSKની ટીમ ચેપોકમાં ટુર્નામેન્ટની પ્રથમ મેચ રમશે. આ મેચ RCB સામે હશે, જે ધોનીના કરિયરની છેલ્લી IPL મેચ પણ બની શકે છે. જોકે, ડેવોન કોનવેની ઈજા બાદ ધોની હવે કેટલીક વધુ મેચ રમવાનું ચાલુ રાખી શકે છે.
જો કોનવે રમ્યો હોત, તો ધોની ચોક્કસપણે વહેલા નિવૃત્ત થઈ ગયો હોત
ન્યૂઝીલેન્ડનો ડેવોન કોનવે છેલ્લી 2 સિઝનથી CSK માટે ઓપનિંગ કરી રહ્યો છે અને તે ખૂબ જ સફળ ઓપનર છે. ટુર્નામેન્ટ શરૂ થતા પહેલા તે ઈજાગ્રસ્ત થયો હતો, હવે તે મેના પહેલા અઠવાડિયા સુધી પરત ફરી શકશે નહીં.
કોનવે બેટિંગની સાથે વિકેટકીપિંગ પણ કરે છે અને ધોની પણ વિકેટકીપર બેટર છે. તેનો અર્થ એ કે, જો કોનવે ફિટ રહ્યો હોત, તો CSKને વિકેટકીપિંગ માટે ધોનીની જરૂર ન પડી હોત. પરંતુ હવે કોનવે ઈજાગ્રસ્ત છે અને તેના સિવાય અનકેપ્ડ અવનીશ રાવ અરવેલી ટીમમાં એકમાત્ર વિકેટકીપર છે. જેણે હજુ સુધી IPLમાં ડેબ્યુ કર્યું નથી.
અરવેલી ચોક્કસપણે કેટલીક મેચ રમી શકે છે પરંતુ અનુભવના અભાવને કારણે તેને તમામ મેચમાં તક મળવી મુશ્કેલ છે. આવી સ્થિતિમાં, જો ધોની પ્રથમ મેચ પછી નિવૃત્તિ લેવા માગે છે, તો ટીમની સ્થિતિને ધ્યાનમાં રાખીને તે મુશ્કેલ નિર્ણય હશે.
ઋતુરાજ ગાયકવાડે (જમણે) એમએસ ધોની (ડાબે)ની જગ્યાએ CSKની આગેવાની સંભાળી છે.
લીગ તબક્કાની છેલ્લી મેચ સાથે પણ નિવૃત્તિ શક્ય
વર્તમાન પરિસ્થિતિઓને જોતા, એવી સંભાવના છે કે ધોની ચેપોક સ્ટેડિયમમાં રમાનારી છેલ્લી મેચ સાથે લીગ તબક્કામાં ક્રિકેટને અલવિદા કહી શકે છે. ચેપોકમાં છેલ્લી મેચ ક્યારે થશે, તે સંપૂર્ણ કાર્યક્રમ જાહેર થયા બાદ જ સ્પષ્ટ થશે. જો કે, જો CSK પ્લેઑફ અથવા ફાઈનલમાં પહોંચે છે અને આ મેચ ચેન્નઈમાં યોજાય છે, તો ધોની ચોક્કસપણે પ્લેઑફ સુધી રમવાનું નક્કી કરી શકે છે.
CSKએ 2022માં પણ કેપ્ટન બદલ્યો હતો
ઋતુરાજ ગાયકવાડ CSKનો ચોથો કેપ્ટન છે. તેના પહેલા રવીન્દ્ર જાડેજાએ 8 મેચમાં CSK અને સુરેશ રૈનાએ 5 મેચમાં કેપ્ટનશિપ કરી હતી. તે મેચમાં રૈનાએ ત્યારે જ કમાન સંભાળી હતી જ્યારે ધોની ઈજા કે અન્ય કોઈ કારણોસર કેપ્ટનશિપ કરી શક્યો ન હતો. જ્યારે જાડેજાને 2022ની સિઝનની શરૂઆત પહેલાં કેપ્ટન બનાવવામાં આવ્યો હતો, તેણે 8 મેચમાં કમાન સંભાળી હતી પરંતુ ટીમ માત્ર 2 મેચ જીતી શકી હતી.
જાડેજાએ મધ્ય સિઝનમાં સુકાની પદ છોડવાનો નિર્ણય કર્યો અને ધોનીએ ફરીથી CSKની બાગડોર સંભાળી. 2022ની સિઝનમાં ધોનીની કેપ્ટનશિપ હોવા છતાં ટીમ છેલ્લી 6 મેચમાંથી 4માં હારી ગઈ હતી. ટીમ તે સિઝનમાં 14માંથી 10 હાર સાથે 4 પોઈન્ટ સાથે 9મા સ્થાને હતી. હવે CSKએ સિઝનની શરૂઆત પહેલા ફરી એકવાર ધોનીના સ્થાને નવા કેપ્ટનને ટીમની જવાબદારી સોંપી છે. આવી સ્થિતિમાં ટીમ કેવું પ્રદર્શન કરે છે તે જોવું મહત્વપૂર્ણ રહેશે.
રવીન્દ્ર જાડેજાએ 2022માં CSKની આગેવાની સંભાળી હતી, પરંતુ તે ટીમ માટે 8 મેચમાંથી માત્ર 2 જ જીતી શક્યા હતા.
IPLની 100 મેચ જીતનાર ધોની એકમાત્ર કેપ્ટન છે
IPLના ઈતિહાસમાં એમએસ ધોની સૌથી સફળ કેપ્ટન છે. તેણે 226 IPL મેચમાં કેપ્ટનશિપ કરી અને 133માં ટીમને જીત અપાવી. તેમની કેપ્ટનશિપમાં CSKએ 5 ટાઈટલ જીત્યા, આ મામલામાં ભૂતપૂર્વ MI કેપ્ટન રોહિત શર્મા પણ 5 ટાઈટલ જીતીને નંબર-1 કેપ્ટન છે. જો કે, રોહિત પણ પોતાની કેપ્ટનશિપમાં ટીમને 100 થી વધુ IPL મેચ જીતાડવામાં સફળ રહ્યો નથી.
ધોનીએ એક ખેલાડી તરીકે 250 IPL મેચ રમી છે. જેમાં તેણે 135.92ની સ્ટ્રાઈક રેટથી 5082 રન બનાવ્યા હતા. ધોનીએ 24 અડધી સદી ફટકારી હતી અને 84 રન તેનો સર્વશ્રેષ્ઠ સ્કોર હતો, જે માત્ર RCB સામે જ બનાવ્યો હતો. CSK 17મી સિઝનમાં આજે આ ટીમ સામે તેની પ્રથમ મેચ રમશે.
ધોનીએ 2020માં આંતરરાષ્ટ્રીય સ્તરે નિવૃત્તિ લીધી હતી
એમએસ ધોનીએ 2020માં જ આંતરરાષ્ટ્રીય ક્રિકેટમાંથી નિવૃત્તિ લઈ લીધી હતી. 15 ઓગસ્ટ, 2020ના રોજ, સાંજે 7:29 વાગ્યે, માહીએ સોશિયલ મીડિયા પોસ્ટથી તેની નિવૃત્તિની જાહેરાત કરી. તે એકમાત્ર એવો કેપ્ટન છે કે જેમણે તેની કેપ્ટનશિપ હેઠળ ભારતને ICC ચેમ્પિયન્સ ટ્રોફી (2013), ODI વર્લ્ડ કપ (2011) અને T20 વર્લ્ડ કપ (2007) જીતાડ્યું છે.
CSKની પ્રથમ 3 મેચની ટિકિટ વેચાઈ
IPL મેનેજમેન્ટે લોકસભા ચૂંટણીની તારીખોને કારણે પ્રથમ તબક્કામાં માત્ર પ્રારંભિક 21 મેચનું શેડ્યૂલ જાહેર કર્યું હતું. આ તબક્કામાં, ચેન્નઈ 4 મેચ રમશે, જેમાંથી પ્રથમ 3 મેચની ટિકિટ સંપૂર્ણ રીતે વેચાઈ ગઈ છે. ચોથી મેચ 5 એપ્રિલે હૈદરાબાદમાં સનરાઇઝર્સ સામે રમાશે. પ્રથમ 3 મેચ RCB, GT અને DC સામે થશે. બેંગલુરુ અને ગુજરાત સામેની મેચ ચેન્નઈમાં રમાશે.
