મહિલાઓ માટે ભારતમાં રહેવું મુશ્કેલ: ભારતીય મહિલા હોકી કોચ શોપમેને કહ્યું- મહિલા કોચ અને ખેલાડીઓ સાથે ભેદભાવ થાય છે

ભારતીય મહિલા હોકી ટીમના પ્રથમ મહિલા કોચ જેનેક શોપમેને જણાવ્યું કે તેણે પોતાના કાર્યકાળ દરમિયાન કેટલા પડકારોનો સામનો કરવો પડ્યો.

શોપમેન ભારતીય મહિલા ટીમના કોચ તરીકેના તેમના અનુભવો વિશે ધ ઈન્ડિયન એક્સપ્રેસને કહ્યું કે, ‘છેલ્લા બે વર્ષમાં હું ખૂબ જ એકલતા અનુભવતી હતી. ભારત મહિલાઓ માટે ખૂબ જ મુશ્કેલ દેશ છે. હું એવી કલ્ચરમાંથી આવી છું જ્યાં મહિલાઓનું સન્માન અને વેલ્યૂ છે. મને અહીં એવું નથી લાગતું.’

રવિવારે FIH પ્રો લીગમાં યુએસ સામેની મેચ બાદ શોપમેને ભારતમાં રમતગમતમાં જેન્ડર ઇન-ઇક્વોલિટી પર વાત કરી હતી. તેણે એક મહિલા તરીકેની તેની ભૂમિકામાં રોજિંદા મુશ્કેલીઓનો સામનો કરવા અંગે તેણીની હતાશા વ્યક્ત કરી હતી.

મહિલા અને પુરુષોની ટીમોને અલગ-અલગ ગણવામાં આવે છે- શોપમેન
શોપમેને કહ્યું, ” મને એ તફાવત દેખાય છે કે મારી અને પુરુષોના કોચની સાથે અલગ-અલગ વ્યવહાર કરવામાં આવે છે. પુરૂષ ટીમ અને મહિલા ટીમ પણ અલગ-અલગ સારવાર મેળવે છે. મહિલા ખેલાડીઓ ક્યારેય ફરિયાદ નથી કરતી, તેઓ ખૂબ મહેનત કરે છે.

શોપમેન નેધરલેન્ડ્સની ખેલાડી રહી ચૂકી છે. તેણે ટીમ સાથે 2004માં ઓલિમ્પિક સિલ્વર અને 2008માં ગોલ્ડ જીત્યો હતો.

શોપમેન 2020માં ભારતીય ટીમ સાથે જોડાઈ હતી
જેનેક શોપમેન 2020માં ભારતીય ટીમમાં વિશ્લેષણાત્મક કોચ તરીકે જોડાઈ હતી. ટોક્યો ઓલિમ્પિક બાદ તે ટીમની મુખ્ય કોચ બની. શોપમેનના કોચિંગ હેઠળ ભારતીય મહિલા હોકી ટીમના પ્રદર્શનમાં નોંધપાત્ર સુધારો જોવા મળ્યો હતો.

મુખ્ય કોચ બન્યા પછી, શોપમેને કોમનવેલ્થ ગેમ્સ 2022માં ટીમને બ્રોન્ઝ અપાવ્યો હતો. તે જ સમયે, તેણે એશિયન ગેમ્સ 2022માં બ્રોન્ઝ, એશિયન ચેમ્પિયન્સ ટ્રોફીમાં ગોલ્ડ અને 2022 એશિયા કપ મસ્કતમાં બીજો બ્રોન્ઝ જીત્યો.

ઓલિમ્પિક માટે ક્વોલિફાય ન થવા પર વિરોધ વધ્યો
શોપમેનના કોચિંગ હેઠળ, ભારત જાન્યુઆરી 2024માં રાંચીમાં આયોજિત FIH ઓલિમ્પિક ક્વોલિફાયર્સમાં હારી ગયું હતું, જેના કારણે ટીમ આગામી પેરિસ ઓલિમ્પિક માટે ક્વોલિફાય કરી શકી ન હતી. આ પછી તેમના મુખ્ય કોચ બનવાનો વિરોધ વધ્યો. જો કે હોકી ઈન્ડિયાએ તેના વિશે કોઈ નિર્ણય લીધો નથી. શોપમેનનો કોન્ટ્રાક્ટ જૂન-જુલાઈમાં પૂરો થઈ રહ્યો છે.