કોહલી તેની કરિયરનો સૌથી ખરાબ શોટ રમીને બોલ્ડ થયો: આંખમાં નિરાશા સાથે મેદાન છોડ્યું, આ જ ગ્રાઉન્ડ પર ટેસ્ટમાં બેસ્ટ ઇનિંગ રમી હતી

ભારત અને ન્યૂઝીલેન્ડ વચ્ચે ત્રણ મેચની ટેસ્ટ સિરીઝની બીજી મેચ પુણેના મહારાષ્ટ્ર ક્રિકેટ એસોસિયેશન સ્ટેડિયમ (MCA)માં રમાઈ રહી છે. આ મેચમાં ન્યૂઝીલેન્ડે પહેલી ઇનિંગમાં 259 રન બનાવ્યા હતા. જવાબમાં ભારતીય ટીમે ખરાબ બેટિંગ કરી અને ટીમ 156 રનમાં જ ઓલઆઉટ થઈ ગઈ. ભારતીય ટીમની સૌથી મોટી આશા સ્ટાર બેટર અને પૂર્વ કેપ્ટન વિરાટ કોહલી પર હતી, પરંતુ તેણે નિરાશ કર્યા.

વિરાટ કોહલી 9 બોલનો સામનો કરતા માત્ર એક રન બનાવી શક્યો હતો. ઇનિંગની 24મી ઓવરમાં કિંગ કોહલીને લેફ્ટ આર્મ સ્પિનર ​​મિચેલ સેન્ટનર બોલ્ડ કર્યો હતો. કોહલી મિડલ સ્ટમ્પની તરફ સ્લાઇડ થતો લો ફૂલટૉસ બોલ ખોટી લાઇન પર રમ્યો. આવી સ્થિતિમાં, તે બોલને રમવામાં થાપ ખાઈ ગયો અને બોલ્ડ થયો. કોહલી જે રીતે આઉટ થયો તે ખૂબ જ દુર્ભાગ્યપૂર્ણ હતો. ખુદ કોહલીએ પણ કલ્પના નહીં કરી હોય કે તે આ રીતે આઉટ થશે. કોહલી થોડી સેકન્ડો માટે પિચ પર નાખુશ થઈને ઊભો રહ્યો અને પછી પેવેલિયન તરફ ચાલ્યો ગયો.

સંજય માંજરેકર કહ્યું- તેણે તેની કારકિર્દીનો સૌથી ખરાબ શોટ રમ્યો અને આઉટ થયો કોમેન્ટેટર સંજય માંજરેકરે વિરાટ કોહલીના આ રીતે આઉટ થવાને સૌથી દુર્ભાગ્યપૂર્ણ ગણાવ્યું છે. માંજરેકરે લખ્યું, ‘હે ભગવાન! વિરાટ પોતે જાણતો હશે કે તેણે તેની કારકિર્દીનો સૌથી ખરાબ શોટ રમ્યો અને આઉટ થયો. તે તેના માટે દુઃખદ છે કારણ કે તે હંમેશાની જેમ નક્કર અને સારા ઇરાદા સાથે આવે છે.

2021 ટેસ્ટમાં સ્પિનર્સ સામે ખરાબ રેકોર્ડ જો જોવામાં આવે તો વર્ષ 2021થી ટેસ્ટ ક્રિકેટમાં સ્પિન બોલરો સામે વિરાટ કોહલીનો રેકોર્ડ કંઈ ખાસ રહ્યો નથી. વર્ષ 2021-24 દરમિયાન કોહલી અત્યાર સુધી ટેસ્ટ ક્રિકેટમાં 21 વખત સ્પિન બોલરોનો શિકાર બન્યો છે. આ સમયગાળા દરમિયાન, તે 10 વખત ડાબા હાથના સ્પિનરથી બોલ્ડ થયો હતો.

આ જ ગ્રાઉન્ડ પર પોતાની બેસ્ટ ઇનિંગ રમી હતી પુણેના મહારાષ્ટ્ર ક્રિકેટ એસોસિએશન સ્ટેડિયમમાં વિરાટ કોહલીનો રેકોર્ડ શાનદાર રહ્યો છે. પરંતુ આ વખતે તે નિષ્ફળ રહ્યો છે. કોહલીએ આ મેદાન પર ત્રણેય ફોર્મેટ સહિત કુલ 13 મેચ રમી છે, જેમાં તેણે 72.16ની સરેરાશથી 866 રન બનાવ્યા છે. આ દરમિયાન તેણે ચાર સદી ફટકારી હતી. જો જોવામાં આવે તો વિરાટ કોહલીએ પુણેમાં કુલ 3 ટેસ્ટ મેચ રમી છે, જેમાં તેણે 89.33ની એવરેજથી 268 રન બનાવ્યા છે.

વિરાટ કોહલીનો સર્વશ્રેષ્ઠ ટેસ્ટ સ્કોર અણનમ 254 રન છે, જે તેણે 2019માં સાઉથ આફ્રિકા સામે આ જ મેદાન પર બનાવ્યો હતો. આ મેદાન પર કોઈપણ બેટર્સનો આ સર્વશ્રેષ્ઠ સ્કોર છે. કોહલીએ પુણેમાં 8 વન-ડે અને 2 T20 આંતરરાષ્ટ્રીય મેચ રમી હતી. વન-ડેમાં તેણે 78.71ની એવરેજથી 551 રન બનાવ્યા, જેમાં 3 સદી સામેલ છે. જ્યારે T20 ઈન્ટરનેશનલમાં તેણે 47 રન બનાવ્યા છે.

કોહલીએ 2019માં પુણેમાં સાઉથ આફ્રિકા સામે કરિયર બેસ્ટ 254* રનની ઇનિંગ રમી હતી.