નવી દિલ્હી1 કલાક પેહલા
- કૉપી લિંક
એન્ફોર્સમેન્ટ ડિરેક્ટોરેટ (ED)એ ગુરુવારે ભૂતપૂર્વ ભારતીય કેપ્ટન મોહમ્મદ અઝહરુદ્દીનને સમન્સ મોકલ્યું છે. અઝહર પર હૈદરાબાદ ક્રિકેટ એસોસિયેશન (HCA)ના પ્રમુખ તરીકેના કાર્યકાળ દરમિયાન ભ્રષ્ટાચારનો આરોપ છે. જોકે, અઝહરે આ આરોપોને સંપૂર્ણપણે નકારી કાઢ્યા છે.
EDએ આજે જ અઝહરને પૂછપરછ માટે બોલાવ્યો છે. EDની ટીમ HCAમાં ગેરરીતિઓની તપાસ કરી રહી છે. ઉપ્પલ પોલીસ સ્ટેશનમાં પહેલાથી જ નોંધાયેલા કેસના આધારે EDએ અઝહરને સમન્સ પાઠવ્યું છે.
61 વર્ષીય પૂર્વ ક્રિકેટર પર અગાઉ પણ મેચ ફિક્સિંગનો આરોપ લાગ્યો છે. જેના કારણે BCCIએ તેના પર પ્રતિબંધ પણ મુક્યો હતો. જોકે, બાદમાં અઝહરને આંધ્ર પ્રદેશ હાઈકોર્ટે નિર્દોષ જાહેર કર્યો હતો.
પૂર્વ ભારતીય કેપ્ટન અઝહર પર 20 કરોડ રૂપિયાની ગેરરીતિનો આરોપ છે.
3 FIR નોંધાઈ, તપાસ ચાલુ ED અનુસાર, હૈદરાબાદ ક્રિકેટ એસોસિયેશનના અધિકારીઓએ રાજીવ ગાંધી ક્રિકેટ સ્ટેડિયમના નિર્માણમાં નાણાકીય અનિયમિતતાઓ કરી હતી. તેણે ખાનગી કંપનીઓને ઊંચા દરે કોન્ટ્રાક્ટ આપ્યા અને એસોસિયેશનને કરોડો રૂપિયાનું નુકસાન પહોંચાડ્યું. આ મામલામાં 3 FIR નોંધવામાં આવી છે અને તપાસ ચાલી રહી છે.
ક્રિકેટરમાંથી રાજકારણી બનેલા અઝહરુદ્દીનને 2018માં તેલંગાણા પ્રદેશ કોંગ્રેસ સમિતિના પ્રમુખ તરીકે નિયુક્ત કર્યો હતો. 2009માં તે કોંગ્રેસની ટિકિટ પર યુપીના મુરાદાબાદથી સાંસદ હતો.
2 પોઈન્ટમાં માહિતી
- સમન્સ મોકલતા પહેલા તપાસ એજન્સીએ તેલંગાણામાં 9 સ્થળો પર દરોડા પણ પાડ્યા હતા. આ સમયગાળા દરમિયાન, ડિજિટલ ઉપકરણોની સાથે ઘણા મહત્વપૂર્ણ દસ્તાવેજો મળી આવ્યા છે.
- HCAના CEO સુનીલકાંત બોઝે ટીમ ઈન્ડિયાના પૂર્વ કેપ્ટન અઝહરુદ્દીન વિરુદ્ધ ભ્રષ્ટાચારની ફરિયાદ નોંધાવી છે.
કોંગ્રેસમાંથી સંસદ સભ્ય રહી ચૂક્યો છે, 2009માં રાજકારણમાં આવ્યો અઝહરે કોંગ્રેસની ટિકિટ પર લોકસભામાં સેવા આપી છે. તે ઉત્તર પ્રદેશની મુરાદાબાદ બેઠક પરથી ચૂંટણી લડ્યો હતો. અઝહરે 2009માં રાજકારણમાં પ્રવેશ કર્યો હતો. તે 2009 થી 2014 સુધી સાંસદ હતો.
અઝહરે કોંગ્રેસની ટિકિટ પર લોકસભા ચૂંટણી જીતી હતી.
ભારત માટે 99 ટેસ્ટ મેચ રમી છે મોહમ્મદ અઝહરે 99 ટેસ્ટ મેચમાં ભારતીય ટીમનું પ્રતિનિધિત્વ કર્યું છે. તેણે તેની 100મી ટેસ્ટ રમી તે પહેલા તેના પર મેચ ફિક્સિંગનો આરોપ લાગ્યો હતો. ત્યારબાદ 2000માં BCCIએ તપાસ બાદ અઝહર પર આજીવન પ્રતિબંધ મૂક્યો હતો, જો કે 2012માં આંધ્ર પ્રદેશ હાઈકોર્ટે પ્રતિબંધ હટાવી લીધો હતો.
આવી રહી ક્રિકેટ કારકિર્દી
- ભારત માટે 99 ટેસ્ટ અને 334 ODI મેચ રમી છે.
- પોતાના ટેસ્ટ કરિયરમાં 6215 રન બનાવ્યા છે, જ્યારે ODIમાં તેના નામે 9378 રન છે.
- ટેસ્ટ કારકિર્દીમાં તેનો સર્વોચ્ચ સ્કોર 199 હતો. ODIમાં તેનો સર્વશ્રેષ્ઠ સ્કોર 153* છે.
- અઝહરે ડેબ્યૂ પર સતત ત્રણ ટેસ્ટ મેચમાં સદી ફટકારવાનો વર્લ્ડ રેકોર્ડ પણ પોતાના નામે કર્યો છે.
