મુંબઈ21 મિનિટ પેહલા
- કૉપી લિંક
મુંબઈએ છેલ્લે 2015-16ની સિઝનમાં રણજી ટાઈટલ જીત્યું હતું.
મુંબઈએ 2023-24 રણજી ટ્રોફીનો ખિતાબ જીત્યો છે. મુંબઈએ ફાઈનલ મેચમાં વિદર્ભને 169 રનના વિશાળ અંતરથી હરાવ્યું હતું. મુંબઈનું આ 42મું રણજી ટાઈટલ છે. 8 વર્ષની રાહ જોયા બાદ ટીમ ચેમ્પિયન બની છે. મુંબઈએ છેલ્લે 2015-16ની સિઝનમાં ટાઈટલ જીત્યું હતું. છેલ્લા દિવસે 538 રનના લક્ષ્યાંકનો પીછો કરવા ઉતરેલી વિદર્ભની ટીમ બીજા દાવમાં માત્ર 368 રન જ બનાવી શકી હતી.
ગુરુવારે વાનખેડે મેદાન પર વિદર્ભે બીજા સેશનમાં તેની છેલ્લી 5 વિકેટ ગુમાવી દીધી હતી. લંચ સુધી ટીમનો સ્કોર 333/5 હતો. અક્ષય વાડકર 102 રન અને હર્ષ દુબે 65 રન બનાવીને આઉટ થયા હતા. બંને વચ્ચે 130 રનની ભાગીદારી થઈ હતી. આ બંને આઉટ થતાં જ ટીમ વિખેરાઈ ગઈ હતી. મુંબઈની પ્રથમ ઈનિંગમાં 136 રન બનાવનાર મુશીર ખાને 2 વિકેટ ઝડપી હતી. તેને પ્લેયર ઓફ ધ ફાઈનલ પસંદ કરવામાં આવ્યો હતો.
અક્ષયની સદી, હર્ષની ફિફ્ટી
વિદર્ભની બીજી ઇનિંગમાં અક્ષય વાડકરે (102 રન) સદી ફટકારી હતી, જ્યારે હર્ષ દુબે (65 રન)એ અડધી સદી ફટકારી હતી. આ પહેલા કરુણ નાયરે 74 રનનું યોગદાન આપ્યું હતું. મુંબઈ તરફથી મુશીર ઉપરાંત તુષાર દેશપાંડેએ 2 અને તનુષ કોટિયનએ 4 વિકેટ ઝડપી હતી. શમ્સ મુલાની અને ધવલ કુલકર્ણીને એક-એક વિકેટ મળી હતી.
મુંબઈએ 538 રનનો ટાર્ગેટ આપ્યો હતો
યજમાન મુંબઈએ વિદર્ભને 538 રનનો ટાર્ગેટ આપ્યો હતો. ટીમે તેના બીજા દાવમાં 418 રન બનાવ્યા હતા. મુંબઈને પ્રથમ દાવમાં 119 રનની લીડ મળી હતી. આમ વિદર્ભને 538 રનનો ટાર્ગેટ મળ્યો હતો.
વિદર્ભ પ્રથમ દાવમાં 105 રનમાં સમેટાઇ ગયું
વિદર્ભ પ્રથમ દાવમાં માત્ર 105 રનમાં સમેટાઈ ગયું હતું. આ પહેલા ટોસ હારીને પ્રથમ બેટિંગ કરતા મુંબઈએ પ્રથમ દાવમાં 224 રન બનાવ્યા હતા.
