પારસ મ્હામ્બરે મુંબઈ ઈન્ડિયન્સમાં જોડાયો: મલિંગા સાથે કામ કરશે, અગાઉ MIના કોચિંગ સ્ટાફનો ભાગ રહી ચૂક્યો છે

ભૂતપૂર્વ ભારતીય બોલિંગ કોચ પારસ મ્હામ્બરે ઈન્ડિયન પ્રીમિયર લીગ (IPL) ની આગામી સિઝન માટે મુંબઈ ઈન્ડિયન્સ (MI) સાથે જોડાયો છે. તે વર્ષ 2008માં MIના કોચિંગ સ્ટાફનો પણ ભાગ રહી ચૂક્યો છે. મ્હામ્બરે હાલના બોલિંગ કોચ લસિથ મલિંગા સાથે અને હેડ કોચ મહેલા જયવર્દને હેઠળ કામ કરશે. આ વર્ષના અંતમાં યોજાનાર મેગા ઓક્શનમાં પણ તે હાજર રહેશે.

ફ્રેન્ચાઇઝીએ બુધવારે આ અંગેની જાહેરાત કરી હતી. પારસ આ વર્ષે 29 જૂને T-20 વર્લ્ડ કપ જીતનાર ભારતીય ટીમનો બોલિંગ કોચ હતો.

રાહુલ દ્રવિડ અને વિક્રમ રાઠોડ રાજસ્થાનના કોચ ગયા મહિને રાહુલ દ્રવિડ અને વિક્રમ રાઠોડ રાજસ્થાન રોયલ્સ સાથે જોડાયા હતા. ફ્રેન્ચાઇઝીએ 20 સપ્ટેમ્બરના રોજ બંને ભારતીય કોચને જોડવાની જાહેરાત કરી હતી. ભારતીય ટીમે દ્રવિડ અને રાઠોડના કોચિંગ હેઠળ T-20 વર્લ્ડ કપ જીત્યો હતો.

પારસ એક ખેલાડી કરતાં કોચ તરીકે વધુ સફળ બન્યો પારસ મ્હામ્બરેએ ભારત માટે 2 ટેસ્ટ અને 3 વન-ડે રમી છે. તેની ફર્સ્ટ ક્લાસ કારકિર્દી શાનદાર રહી, પરંતુ તેને આંતરરાષ્ટ્રીય સ્તરે વધુ સફળતા મળી ન હતી. પારસ વિશે એવું કહેવાય છે કે તે એક ખેલાડી કરતાં વધુ પ્રતિભાશાળી કોચ છે.

મહેલા જયવર્દને MIનો હેડ કોચ બન્યો માત્ર બે દિવસ પહેલા જ મુંબઈ ઈન્ડિયન્સ (MI)એ મહેલા જયવર્દનેને IPL 2025 માટે તેમના મુખ્ય કોચ તરીકે નિયુક્ત કર્યો છે. તે માર્ક બાઉચરનું સ્થાન લેશે, જે 2022 અને 2023માં ટીમનો હેડ કોચ હતો.