પેરિસ પેરાલિમ્પિક્સ, અવની-સિદ્ધાર્થ ક્વોલિફિકેશન રાઉન્ડમાંથી બહાર: મનીષા રામદાસ બેડમિન્ટનમાં સેમિફાઈનલમાં પહોંચી, બ્રોન્ઝ મેડલ વિજેતા પ્રીતિ પાલ એક્શનમાં રહેશે

પેરિસ પેરાલિમ્પિક્સના ચોથા દિવસે ભારતની શરૂઆત ખરાબ રહી હતી. 10 મીટર મિક્સ્ડ એર રાઈફલમાં અવની લેખારા અને સિદ્ધાર્થ બાબુ ક્વોલિફિકેશન રાઉન્ડમાંથી બહાર થઈ ગયા હતા. અવની 632.8 સાથે 11મા અને સિદ્ધાર્થ 628.3 સાથે 28મા ક્રમે છે. અવનીએ બે દિવસ પહેલા મહિલાઓની 10 મીટર એર પિસ્તોલમાં ગોલ્ડ મેડલ જીત્યો હતો.

પેરા બેડમિન્ટનમાં ભારતની મનીષા રામદાસે શાનદાર પ્રદર્શન કર્યું હતું અને જાપાનની મામીકો ટોયોડાને 21-13 અને 21-16થી પરાજય આપ્યો હતો. આ સાથે તેણે સેમિફાઈનલમાં પોતાનું સ્થાન નિશ્ચિત કરી લીધું છે.

આજે રેસર પ્રીતિ પાલ મહિલાઓની 200 મીટર સ્પર્ધામાં ભાગ લેશે. પ્રીતિએ મહિલાઓની 100 મીટર સ્પર્ધામાં બ્રોન્ઝ મેડલ જીત્યો હતો. ભારતના સુકાંત કદમ પેરા બેડમિન્ટનની સેમિફાઈનલમાં દેશબંધુ સુહાસ એલવાય સામે રમશે. મેન્સ સિંગલ્સ SL-4 સેમિફાઈનલમાં આ મેચ બાદ ભારત માટે વધુ એક મેડલ નિશ્ચિત થઈ જશે.

પ્રીતિએ મહિલાઓની 100 મીટર સ્પર્ધામાં બ્રોન્ઝ મેડલ જીત્યો હતો.

ત્રીજા દિવસની હાઇલાઇટ્સ…
રૂબીનાએ બ્રોન્ઝ જીત્યો
પેરા શૂટર રૂબિના ફ્રાન્સિસે શનિવારે પેરિસ પેરાલિમ્પિક્સમાં બ્રોન્ઝ મેડલ જીત્યો હતો. તેણે મહિલાઓની 10 મીટર એર પિસ્તોલની SH1 કેટેગરીમાં આ મેડલ જીત્યો હતો. રૂબીનાએ ફાઈનલમાં 211.1નો સ્કોર કર્યો હતો. પેરિસ પેરાલિમ્પિકમાં ભારતે અત્યાર સુધીમાં 5 મેડલ જીત્યા છે.

જ્યારે પ્રવીણ કુમાર જેવલિન થ્રોમાં મેડલ જીતવા ચૂકી ગયો હતો. પ્રવીણ ફાઈનલમાં 8મા ક્રમે રહ્યો હતો. બેડમિન્ટનમાં, સુકાંત કદમે મેન્સ સિંગલ્સના SL4 ગ્રૂપ પ્લે સ્ટેજમાં થાઈલેન્ડના સિરિપોંગ તિમારોમને 25 મિનિટમાં 21-12, 21-12થી હરાવ્યો. ગ્રૂપમાં સતત બીજી જીત સાથે કદમે સેમિફાઈનલમાં પોતાનું સ્થાન નિશ્ચિત કરી લીધું છે.

આ પહેલાં શુક્રવારે ભારતે 4 મેડલ જીત્યા હતા. મહિલા શૂટિંગમાં અવની લેખારાએ ગોલ્ડ અને મોના અગ્રવાલે બ્રોન્ઝ મેડલ જીત્યો હતો. મનીષ નરવાલે પુરુષોની 10 મીટર એર પિસ્તોલ શૂટિંગમાં સિલ્વર જીત્યો હતો. પ્રીતિ પાલે મહિલાઓની 100 મીટર T35 કેટેગરીની રેસમાં બ્રોન્ઝ મેડલ જીત્યો હતો.

રૂબીના મહિલા 10 મીટર એર પિસ્તોલના ક્વોલિફિકેશન રાઉન્ડમાં છઠ્ઠા સ્થાને રહી હતી.

પેરા આર્ચરી: સરિતા કુમારી ક્વાર્ટર ફાઈનલમાં હાર્યા બાદ બહાર
સરિતા કુમારી મહિલા વ્યક્તિગત કમ્પાઉન્ડની ક્વાર્ટર ફાઈનલમાં હાર્યા બાદ બહાર થઈ ગઈ હતી. તેને ક્વાર્ટર ફાઈનલમાં તુર્કીના ઓઝનુર ક્યોર ગિર્ડીએ 145-140થી પરાજય આપ્યો હતો.

પેરા આર્ચરી: શીતલ દેવી પ્રી-ક્વાર્ટર ફાઈનલમાં હારી ગઈ
શીતલ દેવી મહિલા વ્યક્તિગત કમ્પાઉન્ડ ઓપન 1/8 એલિમિનેશન રાઉન્ડમાં ચિલીની મારિયાના ઝુનિગા સામે 137-138થી હારીને બહાર થઈ ગઈ હતી. 17 વર્ષની શીતલ માત્ર એક પોઈન્ટથી મેચ હારી ગઈ હતી.

પેરા બેડમિન્ટન: મનદીપ ક્વાર્ટર ફાઈનલમાં પહોંચી
પેરા શટલર મનદીપ કૌરે પેરિસ પેરાલિમ્પિક ગેમ્સના ત્રીજા દિવસની શરૂઆત જીત સાથે કરી હતી. તેણે બેડમિન્ટન મહિલા સિંગલ્સની SL3 કેટેગરીમાં ઓસ્ટ્રેલિયાની સેલિન વિનોટને 21-23, 21-10, 21-17થી પરાજય આપ્યો હતો. આ સાથે મનદીપ ક્વાર્ટર ફાઈનલમાં પહોંચી ગઈ હતી. બેડમિન્ટનમાં SL3 કેટેગરીમાં એવા ખેલાડીઓનો સમાવેશ થાય છે જેમના નીચેના અંગો વિકલાંગતાથી પ્રભાવિત હોય છે.

મનદીપ ગ્રૂપ સ્ટેજની બીજી મેચ જીતીને ક્વાર્ટર ફાઈનલમાં પહોંચી છે.

પેરા બેડમિન્ટન: નિતેશ કુમાર સીધી ગેમમાં જીત્યો
નિતેશ કુમારે બેડમિન્ટન મેન્સ સિંગલ્સની SL3 કેટેગરીના ગ્રૂપ સ્ટેજની મેચમાં થાઈલેન્ડના મોંગખોન બુનસેનને સીધી ગેમમાં 21-13, 21-14થી હરાવ્યો હતો. તેણે આ મેચ 33 મિનિટમાં જીતી લીધી હતી.

પેરા શૂટિંગ: સ્વરૂપ મહાવીર ફાઈનલમાં સ્થાન ગુમાવ્યું
સ્વરૂપ મહાવીર ઉન્હાલકર પુરુષોની 10 મીટર એર રાઈફલ સ્ટેન્ડિંગ SH1 ક્વોલિફિકેશન રાઉન્ડમાં 14મા સ્થાને રહ્યો. તેણે ક્વોલિફિકેશન રાઉન્ડમાં 613.4નો સ્કોર કર્યો હતો. આ કારણે તે ફાઈનલમાં પહોંચવાનું ચૂકી ગયો હતો.

પેરા સાયકલિંગ ટ્રેકઃ જ્યોતિ-અરશદ ફાઇનલમાં પ્રવેશવામાં નિષ્ફળ રહ્યાં
જ્યોતિ ગડેરિયા પેરા સાઇકલિંગ C1-3 500m ટાઇમ ટ્રાયલની ફાઇનલમાં ક્વોલિફાય થવામાં નિષ્ફળ રહી હતી. તે ક્વોલિફાઈંગ રાઉન્ડમાં 11મા સ્થાને રહી હતી. આ કેટેગરીમાં ટોચના 6 રાઇડર્સે ફાઈનલમાં પ્રવેશ મેળવ્યો હતો. અરશદ શેખ પુરુષોની C1-3 1000m ટાઈમ ટ્રાયલ ક્વોલિફાઈંગમાં 17મું સ્થાન મેળવ્યું હતું અને ફાઈનલમાં જગ્યા બનાવી શક્યો ન હતો.