આ બે ગુજરાતીએ ભલભલા ક્રિકેટર્સનો પરસેવો પડાવી દીધો: બુમરાહના યોર્કર સામે કોઈપણ બેટર ટકી શકતો નથી; જડ્ડુના ઓલરાઉન્ડ જાદુથી ટીમ ઈન્ડિયાએ અનેક મેચ જીતી

પિતાની ઇચ્છા આર્મીમાં જાય; માતાની ઇચ્છા ક્રિકેટર બને જાડેજાની ક્રિકેટર બનવાની સફર સરળ નહોતી, પિતા આર્મી ઑફિસર બનાવવા માગતા, તો માતા ક્રિકેટર જાડેજાનો જન્મ 6 ડિસેમ્બર 1988ના રોજ જામનગરમાં થયો હતો. તેના પિતા અનિરુદ્ધસિંહ જાડેજા ખાનગી સિક્યોરિટી કંપનીમાં ગાર્ડ તરીકે નોકરી કરતા હતા. જાડેજાની માતા લતાબા જાડેજા નર્સ તરીકે કામ કરતાં હતાં. જાડેજાને બાળપણમાં ઘણી સમસ્યાઓનો સામનો કરવો પડ્યો હતો. તેને ક્રિકેટ રમવાનો ખૂબ જ શોખ હતો અને તે ક્રિકેટર બનવા માગતો હતો, પરંતુ પિતાની ઇચ્છા હતી કે તે આર્મી ઓફિસર બને. તો, માતા લતાબા જાડેજા ઈચ્છતાં હતાં કે જાડેજા જે બનવા માગે છે તે બને. જ્યારે જાડેજાએ તેમને કહ્યું કે તે ક્રિકેટર બનવા માગે છે, ત્યારે લતાબા તેમને ભારતીય ક્રિકેટ ટીમમાં રમતા જોવા માગતાં હતાં. તેમનું સપનું હતું કે તેમનો પુત્ર ભારત માટે ક્રિકેટ રમે.

રવીન્દ્ર જાડેજાનાં માતાના અવસાન પછી તેની બહેન નયનાબાએ તેની સંભાળ રાખી અને તેને ક્રિકેટ ફરી ચાલુ કરાવ્યું.

જોકે, આ સફર સરળ ન હતી. ત્યારબાદ જાડેજા જામનગરની એક ક્રિકેટ એકેડમીમાં જોડાયો. ત્યાં તેણે ક્રિકેટ શીખવાનું શરૂ કર્યું. જો કે, જ્યારે જાડેજા 17 વર્ષનો થયો (2005), ત્યારે તેના પર મુશ્કેલીઓનો પહાડ તૂટી પડ્યો. તેની માતા લતાનું અકસ્માત દરમિયાન મૃત્યુ થયું. જાડેજા માતાના અવસાનનો આઘાત સહન કરી શક્યો નહોતો. તે ક્રિકેટથી દૂર રહેવા લાગ્યો. આ મુશ્કેલ પરિસ્થિતિમાં જાડેજાની સંભાળ તેની બહેન નયનાબાએ લીધી. તેની બહેને તેને ફરીથી ક્રિકેટ પર ધ્યાન કેન્દ્રિત કરવા કહ્યું અને તેને પ્રોત્સાહિત કર્યો. પરિવારની આર્થિક સ્થિતિને ધ્યાનમાં રાખીને બહેન નયાનાબાએ નર્સ તરીકે કામ કરવાનું શરૂ કર્યું.

જ્યારે રવીન્દ્રએ પોતાની માતાનું સપનું પૂરું કર્યું જાડેજાની માતાનું સપનું 2009માં પૂરું થયું, જ્યારે તેને ભારતીય ક્રિકેટ ટીમમાં ઓલરાઉન્ડર તરીકે પસંદ કરવામાં આવ્યો. જાડેજાએ 8 ફેબ્રુઆરી 2009ના રોજ શ્રીલંકા સામે આંતરરાષ્ટ્રીય ક્રિકેટમાં ડેબ્યુ કર્યું. ત્યારે ધોની ટીમ ઈન્ડિયાના કેપ્ટન હતા. આ એક વન-ડે મેચ હતી. પહેલી જ મેચમાં જાડેજાએ 60 રનની ઇનિંગ રમી હતી આ પછી જાડેજાએ 10 ફેબ્રુઆરી 2009ના રોજ T20માં ડેબ્યૂ કર્યું હતું. જડ્ડુએ 2012માં ઇંગ્લેન્ડ વિરુદ્ધ ટેસ્ટ ડેબ્યૂ કર્યું હતું. શરૂઆતમાં જાડેજાનું પ્રદર્શન કંઈ ખાસ રહ્યું ન હતું. જોકે, 2012માં જાડેજાને IPLની ટીમ ચેન્નઈ સુપર કિંગ્સે ખરીદ્યો અને ત્યારથી તેનું નસીબ બદલાઈ ગયું. જ્યારે જડ્ડુનું પ્રદર્શન કંઈ ખાસ નહોતું ત્યારે ધોની પર અનેક આરોપો લગાવવામાં આવ્યા હતા અને તેના પર ફેવરેટિઝમનો આરોપ લગાવવામાં આવ્યો હતો. ટીકાકારોએ કહ્યું કે જાડેજાએ પ્રદર્શન કર્યું નથી તો તે ટીમમાં કેમ છે તે ખબર પડતી નથી.

જાડેજા અને કોહલી U-19 દિવસોથી સાથે છે.

કેમ જડ્ડુને બેસ્ટ ઓલરાઉન્ડર ગણવામાં આવે છે એ જાણો… ટેસ્ટ ક્રિકેટમાં સૌથી ઝડપી 200 વિકેટ લેવાનો રેકોર્ડ જાડેજાના નામે છે. તેણે માત્ર 44 ટેસ્ટમાં આવું કરીને રંગના હેરાથનો રેકોર્ડ તોડ્યો હતો. હેરાથે 47 મેચમાં આવું કર્યું હતું. 2015માં ખરાબ ફોર્મના કારણે જાડેજાને પણ ટીમમાંથી બહાર કરી દેવામાં આવ્યો હતો, પરંતુ થોડા મહિનાઓ બાદ તેણે ડોમેસ્ટિક ક્રિકેટમાં તેના શાનદાર પ્રદર્શનના આધારે કમબેક કર્યું અને ક્યારેય પાછળ વળીને જોયું નથી. હાલમાં જ પૂરી થયેલી બાંગ્લાદેશ સામેની ટેસ્ટ સિરીઝમાં તે ટેસ્ટમાં 3000 રન અને 300+ વિકેટ લેનાર ભારતનો ત્રીજો ઓલરાઉન્ડર બન્યો છે. તે કપિલ દેવ અને રવિચંદ્રન અશ્વિનની સાથે આ એલાઇટ લિસ્ટમાં આવી ગયો છે.

જાડેજાને ઘોડેસવારીનો જબરો રસ ભારતીય ક્રિકેટર રવીન્દ્ર જાડેજાનો ઘોડેસવારી પ્રત્યેનો પ્રેમ કોઈનાથી છૂપો નથી. તેની પાસે અત્યારે કુલ 4 ઘોડા છે. લોકડાઉન વખતે તે ઘણા ફોટોઝ શેર કરતો હતો. એક ઇન્ટરવ્યૂમાં તેણે કહ્યું હતું કે ‘જીવનમાં, ક્રિકેટની પ્રેક્ટિસને કારણે હું ક્યારેય મારા ફાર્મ હાઉસમાં પૂરતો સમય નથી વિતાવી શક્યો, પરંતુ મને આનંદ છે કે છેલ્લા કેટલાક મહિનામાં મને તક મળી. હું મારા મિત્રના ઘરે ઘોડા પર સવારી કરવા જતો અને ધીમે ધીમે મને ઘોડા અને ઘોડેસવારીમાં રસ પડ્યો. મેં મારા ફાર્મહાઉસ માટે 2010માં થોડા ઘોડા ખરીદ્યા હતા અને તેમની સંભાળ રાખવામાં આનંદ અનુભવી રહ્યો હતો. હું ફક્ત જ બ્રીડ કરું છું અને તેને વેચવાનો ઈરાદો નથી.’ તેણે વધુમાં ઉમેર્યું કે ‘લોકડાઉનના મહિનાઓ દરમિયાન, મેં મારા ફાર્મ હાઉસ પર મારા ઘોડાઓ સાથે સમય વિતાવ્યો. મને આનંદ છે કે આ વર્ષે મને તેમની સાથે પૂરતો સમય મળ્યો. મેં ખરેખર મારી જાતનો આનંદ માણ્યો.’

જાડેજાનો ઘોડેસવારી પ્રત્યેનો પ્રેમ કોઈનાથી છૂપો નથી.

બન્ને ક્રિકટર્સ T20 ચેમ્પિયન આ વર્ષે વેસ્ટ ઈન્ડિઝ અને USAમાં રમાયેલા T20 વર્લ્ડ કપમાં ભારતે સાઉથ આફ્રિકાને 7 રને હરાવીને બીજીવાર T20 વર્લ્ડ કપ જીત્યો હતો. આ જીતના તો દરેક ખેલાડીઓ હીરો છે. પણ સૌથી વધુ હોય તો તે છે જસપ્રીત બુમરાહ…બુમરાહને પ્લેયર ઑફ ધ ટુર્નામેન્ટનો અવોર્ડ પણ મળ્યો છે. ઉપરાંત સર જાડેજાએ પણ પોતાની ફિલ્ડિંગ અને સેમિફાઈનલમાં ઇંગ્લેન્ડ સામે ઉપયોગી ઇનિંગ રમીને ટીમને જિતાડવામાં મહત્ત્વની ભૂમિકા ભજવી હતી. જાડેજાએ તો આ પછી T20 ઈન્ટરનેશનલમાંથી રિટાયરમેન્ટ લઈ લીધું..પણ હવે વન-ડે અને ટેસ્ટમાં પોતાનો જાદુ બતાવશે… તો બુમ…બુમ…બુમરાહની ધારદાર પેસ સામે તો હજુ પણ બેટર્સને પરસેવો પડી જાય છે.