ઓહો… એક જ ઓવરમાં 39 રન ફટકારી દીધા: સમાઓના ખેલાડીએ એક જ ઓવરમાં 6 છગ્ગા પણ ફટકાર્યા; યુવરાજના રેકોર્ડની બરાબરી કરી

સમોઆના બેટર ડેરિયસ વિસરે ઈતિહાસ રચી દીધો છે. વિસર T-20 ઇન્ટરનેશનલમાં 1 ઓવરમાં સૌથી વધુ રન બનાવનાર બેટર બની ગયો છે. અગાઉ T20 ઇન્ટરનેશનલમાં 1 ઓવરમાં સૌથી વધુ રન બનાવવાનો રેકોર્ડ સંયુક્ત રીતે યુવરાજ સિંહ, કાઇરન પોલાર્ડ, નિકોલસ પૂરન અને દીપેન્દ્ર સિંહ એરીના નામે હતો. આ તમામ બેટર્સે 1 ઓવરમાં 36 રન બનાવ્યા છે.

તેણે મંગળવારે (20 ઓગસ્ટ)ના રોજ ICC મેન્સ T20 વર્લ્ડ કપ સબ રિજનલ ઇસ્ટ એશિયા-પેસિફિક ક્વોલિફાયર A ઇવેન્ટની મેચમાં વાનુઆતુ સામે સીમર નલિન નિપિકોની બોલિંગમાં 39 રન બનાવ્યા. આ દરમિયાન વિસરે 1 ઓવરમાં 6 સિક્સર ફટકારવાની સિદ્ધિ પણ હાંસલ કરી હતી.

ડેરિયસ વિસરે મેચની 15મી ઓવરમાં નિપિકોને 6 સિક્સર ફટકારી હતી. આ ઓવરમાં બોલરે દબાણમાં 3 નો-બોલ ફેંક્યા હતા. જેના કારણે ઓવરમાં કુલ 39 રન થયા હતા.

ડેરિયસ વિસરે સીમર નલિન નિપિકોની ઓવરમાં 6 સિક્સર સાથે કુલ 39 રન બનાવ્યા હતા.

6 સિક્સર અને 3 નો બોલમાં 39 રન બનાવ્યા
ડેરિયસ વિસરે સીમર નલિન નિપિકોની ઓવરના પહેલા 3 બોલમાં 3 સિક્સર ફટકારી હતી. જ્યારે ચોથો બોલ નો-બોલ હતો. પરંતુ આગામી બોલ પર વિસરે વધુ એક સિક્સર ફટકારી. આ પછી ઓવરનો પાંચમો બોલ ડોટ હતો. છઠ્ઠો બોલ નો-બોલ અને ડોટ હતો. જ્યારે આગળનો બોલ પણ નો-બોલ હતો, પરંતુ આ વખતે વિસરે બોલને બાઉન્ડરી લાઇનની બહાર મોકલી દીધો હતો. છેલ્લા બોલ પર પણ વિસરે ગગનચુંબી સિક્સર ફટકારી અને ઓવરમાં કુલ 39 રન બનાવ્યા.

​​​​​​​

યુવરાજ સિંહની બરાબરી કરી
ડેરિયસ વિસરે એક ઓવરમાં 6 છગ્ગા મારવાના મામલે ભારતીય બેટરે યુવરાજ સિંહની પણ બરાબરી કરી લીધી છે. યુવરાજે વર્ષ 2007માં ઇંગ્લેન્ડના સ્ટુઅર્ટ બ્રોડ સામે 6 બોલમાં 6 સિક્સર ફટકારી હતી. વિસર T-20 ઈન્ટરનેશનલ મેચની એક ઓવરમાં 6 સિક્સર મારનાર ચોથો બેટર બની ગયો છે. તેની પહેલાં યુવરાજ સિંહ સિવાય કાઇરન પોલાર્ડ અને નેપાળના દીપેન્દ્ર સિંહ એરીએ એક ઓવરમાં 6 સિક્સર ફટકારી છે.

સદી ફટકારનાર વિસાર સમોઆનો પ્રથમ બેટર
આ મેચમાં ડેરિયસ વિસર ચોથા નંબર પર બેટિંગ કરવા આવ્યો હતો. તેણે શરૂઆતથી જ આક્રમક બેટિંગ કરી અને તોફાની સદી ફટકારી. વિસરે માત્ર 62 બોલમાં 132 રનની શાનદાર ઇનિંગ રમી હતી. આ દરમિયાન તેના બેટમાંથી 5 ચોગ્ગા અને 14 છગ્ગા આવ્યા હતા. તે સમોઆ માટે સદી ફટકારનાર પ્રથમ બેટર પણ બની ગયો છે.

સમોઆએ આ મેચ 10 રને જીતી લીધી
ડેરિયસ વિસેરની તોફાની ઈનિંગની મદદથી સમોઆની ટીમે નિર્ધારિત 20 ઓવરમાં 174 રન બનાવ્યા હતા. ટાર્ગેટને ચેઝ કરવા ઉતરેલી વાનુઆતુની ટીમ 9 વિકેટ ગુમાવીને 164 રન જ બનાવી શકી હતી. વાનુઆતુ માટે, પ્રથમ દાવમાં 6 છગ્ગા અપાવનાર સીમર નલિન નિપિકોએ સૌથી વધુ 73 રનની ઇનિંગ્સ રમી હતી. પરંતુ અન્ય બેટર્સના સહકારના અભાવને કારણે, વાનુઆતુ 10 રનથી હારી ગયું હતું.