બ્રિજ ભૂષણના નજીકના સંજય સિંહ રેસલિંગ ફેડરેશનના પ્રમુખ બન્યા: ગત બોડીમાં જોઇન્ટ સેક્રેટરી હતા; કોમનવેલ્થ ચેમ્પિયન અનિતાને હરાવ્યા

છેલ્લા 11 મહિનાથી વિવાદાસ્પદ રહેલા રેસલિંગ ફેડરેશન ઓફ ઈન્ડિયા (WFI)ને આજે નવો પ્રમુખ મળ્યો છે. અગાઉની બોડીમાં જોઈન્ટ સેક્રેટરી રહેલા સંજય સિંહ નવા પ્રમુખ બન્યા છે. તેમણે ચૂંટણીમાં કોમનવેલ્થ ચેમ્પિયન અનિતા સિંહ શિયોરાનને હરાવ્યા. સંજય સિંહને 40 વોટ મળ્યા જ્યારે અનિતા શિયોરાનને માત્ર 7 વોટ મળ્યા.

ગુરુવારે (21 ડિસેમ્બર) સવારે 11 વાગ્યે યોજાયેલી બેઠકમાં બોડીના હોદ્દેદારો માટે મતદાન થયું હતું. બપોરે 1:30 વાગ્યાથી મતગણતરી શરૂ થઈ હતી. મહિલા કુસ્તીબાજોના યૌન શોષણના કેસમાં બ્રિજભૂષણ વિરુદ્ધ પ્રમુખ પદની બીજી ઉમેદવાર અનિતા સિંહ પણ સાક્ષી છે. બ્રિજ ભૂષણનો વિરોધ કરી રહેલા કુસ્તીબાજોએ તેમને ટેકો આપ્યો હતો.

મહાસંઘના પૂર્વ પ્રમુખ બ્રિજભૂષણ સિંહે આ વખતે ચૂંટણી લડી ન હતી. તેઓ 12 વર્ષ સુધી આ પદ પર રહ્યા.

સંજય સિંહ (ગળામાં મફલર પહેરેલા)ને 40 મત મળ્યા છે.

WFIના ભૂતપૂર્વ પ્રમુખ બ્રિજભૂષણ સિંહના પુત્ર પ્રતીક ભૂષણ સિંહ, હાથમાં પોસ્ટર પકડે છે. પોસ્ટરમાં લખ્યું છે ‘દબદબા હૈ, દબદબા રહેગા.’

પ્રેમ લોછબ જનરલ સેક્રેટરી બન્યા
જનરલ સેક્રેટરી પદ પર પ્રેમ લોછબ જીત્યા છે. તેમણે પૂર્વ પ્રમુખ બ્રિજભૂષણ સિંહના સમર્થક દર્શન લાલને હરાવ્યા હતા.

રાજ્ય અને કેન્દ્રશાસિત પ્રદેશના અધિકારીઓ પ્રમુખની પસંદગી કરે છે
જનરલ કાઉન્સિલની બેઠકમાં WFI પદાધિકારીઓની પસંદગી કરવામાં આવે છે. ફેડરેશન સાથે જોડાયેલા એસોસિયેશનના અધિકારીઓએ ચૂંટણીમાં મતદાન કર્યું હતું. દરેક રાજ્ય ફેડરેશન પાસે બે મત છે એટલે કે પ્રમુખ અને સચિવ. દિલ્હીમાંથી બે મત અને બાકીના કેન્દ્રશાસિત પ્રદેશોમાંથી એક-એક મત છે.

જો કોઈ પદ માટે એક કરતા વધુ દાવેદાર હોય તો જ મતદાન થાય છે. જો આમ ન થાય તો અધિકારીઓ બિનહરીફ ચૂંટાય છે. 2019માં બ્રિજભૂષણ શરણ સિંહ બિનહરીફ પ્રમુખ બન્યા હતા.

સુપ્રીમ કોર્ટે આ નિર્ણયને પલટાવ્યો હતો
28 નવેમ્બરના રોજ સુપ્રીમ કોર્ટે ભારતીય કુસ્તી સંઘની ચૂંટણી પરનો પ્રતિબંધ હટાવી લીધો હતો અને ચૂંટણી યોજવા સૂચના આપી હતી. 9 ડિસેમ્બરના રોજ, રિટર્નિંગ ઓફિસર નિવૃત્ત જસ્ટિસ એમએમ કુમારના કાર્યાલયે ચૂંટણી શેડ્યૂલ બહાર પાડ્યું અને કહ્યું, ‘મતદાન, મતગણતરી અને પરિણામોની ઘોષણા તે જ દિવસે થશે.’

હાઇકોર્ટના સ્ટે બાદ પ્રક્રિયા અટકી
રેસલિંગ ફેડરેશનની ચૂંટણી 12 ઓગસ્ટે યોજાવાની હતી, પરંતુ ચૂંટણી પહેલા પંજાબ અને હરિયાણા હાઈકોર્ટે હરિયાણા રેસલિંગ એસોસિયેશન (HWA)ની અરજી પર ચૂંટણી પ્રક્રિયા પર રોક લગાવી દીધી હતી.

આ વિવાદ જાન્યુઆરીથી શરૂ થયો હતો

બ્રિજ ભૂષણનો વિરોધ કરી રહેલા કુસ્તીબાજો સાક્ષી મલિક, વિનેશ ફોગટ, બજરંગ પુનિયા અને સંગીતા ફોગાટની આ તસવીર જંતર-મંતર પર ધરણાની છે.

આ વર્ષે જાન્યુઆરીમાં કેટલીક મહિલા રેસલર્સે તત્કાલીન WFI પ્રમુખ બ્રિજ ભૂષણ સિંહ પર યૌન શોષણનો આરોપ લગાવ્યો હતો. આ આરોપો પછી, વિનેશ ફોગટ, બજરંગ પુનિયા, સાક્ષી મલિક અને સંગીતા ફોગાટ સહિત દેશના ટોચના કુસ્તીબાજોએ પ્રમુખને હટાવવાની માગ સાથે વિરોધ કરવાનું શરૂ કર્યું હતું.

વિવાદ પછી, ભારતીય ઓલિમ્પિક એસોસિયેશન (IOA)એ WFIને ભંગ કર્યું અને એડ-હોક સમિતિની રચના કરી અને તેને WFIના નવા પદાધિકારીઓ માટે ચૂંટણી યોજવાની જવાબદારી સોંપી. એડહોક કમિટીએ મતદાનની તારીખ 12 ઓગસ્ટ નક્કી કરી હતી.