શાકિબે વિદ્યાર્થીઓના વિરોધ દરમિયાન મૌન રહેવા બદલ માફી માગી: લખ્યું- તમે જ સાચા હીરો છો; છેલ્લી ટેસ્ટમાં સમર્થન માટે અપીલ કરી

અનુભવી ઓલરાઉન્ડર શાકિબ અલ હસને બાંગ્લાદેશના વિદ્યાર્થી આંદોલન દરમિયાન ચૂપ રહેવા બદલ માફી માગી છે. આટલું જ નહીં, શાકિબે પહેલીવાર આ મામલે પોતાનું સ્ટેન્ડ સ્પષ્ટ કર્યું છે. 37 વર્ષીય શાકિબે બુધવારે એક સામાજિક પોસ્ટથી હોમ ગ્રાઉન્ડ મીરપુર ખાતે સાઉથ આફ્રિકા સામેની વિદાય ટેસ્ટ માટે પણ સમર્થન માંગ્યું હતું. આ મેચ 21 થી 25 ઓક્ટોબર વચ્ચે રમાશે.

અગાઉ, બાંગ્લાદેશના યુવા અને રમત સલાહકાર, આસિફ મહમૂદ શોજીબ ભૂયને આગ્રહ કર્યો હતો કે શાકિબે સુરક્ષાની માગ કરતા પહેલા તેની સ્થિતિ સ્પષ્ટ કરવી પડશે. શાકિબ પર ગયા મહિને એક હત્યા કેસમાં સંડોવણીનો આરોપ પણ લાગ્યો હતો. આ વિદ્યાર્થી આંદોલનમાં શેખ હસીનાને ઉથલાવી દેવામાં આવ્યા હતા.

શાકિબ અલ હસનની ફેસબુક પોસ્ટ. તેણે બંગાળી ભાષામાં મેસેજ લખ્યો હતો.

શાકિબ અલ હસનની પોસ્ટનું ગુજરાતી અનુવાદ… ‘સૌપ્રથમ, હું આદરપૂર્વક તે તમામ વિદ્યાર્થીઓને યાદ કરું છું જેમણે ભેદભાવ વિરોધી વિદ્યાર્થી આંદોલનનું નેતૃત્વ કરતી વખતે તેમના જીવનનું બલિદાન આપ્યું હતું અથવા ઘાયલ થયા હતા. હું તેમને અને તેમના પરિવારો પ્રત્યે મારી ઊંડી શ્રદ્ધાંજલિ અને સંવેદના વ્યક્ત કરું છું, જો કે કોઈ પણ બલિદાન ક્યારેય પ્રિયજનોની ખોટને સંપૂર્ણ રીતે ભરપાઈ કરી શકતું નથી, પરંતુ બાળક અથવા ભાઈને ગુમાવવાનું દુઃખ ભરપાઈ ન થઈ શકે તેવું છે. તમારામાંથી જેઓ આ નાજુક સમયે મારા મૌનથી દુઃખી થયા છે અથવા નિરાશ થયા છે તેમના માટે, હું તમારી લાગણીઓને સ્વીકારું છું અને નિષ્ઠાપૂર્વક માફી માગુ છું. જો હું તમારી પરિસ્થિતિમાં હોત, તો મને કદાચ એવું જ લાગશે.

જેમ તમે જાણો છો, હું ટૂંક સમયમાં મારી છેલ્લી મેચ રમીશ. હું ઈચ્છું છું કે તમે બધા મારી અંતિમ મેચમાં, આ કહાનીના અંતિમ પ્રકરણમાં મારી સાથે જોડાઓ. હું તમારા બધાની સાથે ઉભો રહીને વિદાય આપવા માગુ છું. હું આશા રાખું છું, અને હું માત્ર આશા જ રાખતો નથી, હું માનું છું કે આ અંતિમ ક્ષણમાં, તમે બધા મારી સાથે ઊભા રહેશો. તમે બધા કહાનીને બંધ કરવા ત્યાં હશો, એક કહાની જ્યાં વાસ્તવિક હીરો હું નથી, પરંતુ તમે બધા છો.’

14 દિવસ પહેલા નિવૃત્તિની જાહેરાત કરી હતી શાકિબે 14 દિવસ પહેલા 26 સપ્ટેમ્બરે નિવૃત્તિની જાહેરાત કરી હતી. તેણે કાનપુર ટેસ્ટ પહેલા કહ્યું હતું કે દક્ષિણ આફ્રિકા સામે મીરપુર મારી છેલ્લી ટેસ્ટ હશે.

શાકિબે ગુરુવારે 26 સપ્ટેમ્બરે અચાનક પ્રેસ કોન્ફરન્સ કરી હતી.

શાકિબ પર હત્યાનો આરોપ ડેઈલી સ્ટારના રિપોર્ટ અનુસાર, રફીકુલ ઈસ્લામે કહ્યું કે 5 ઓગસ્ટના રોજ તેનો પુત્ર રૂબેલ અદાબરના રિંગરોડ વિસ્તારમાં વિરોધ કરી રહ્યો હતો. જેમાં રૂબેલની સાથે અન્ય ઘણા વિદ્યાર્થીઓ પણ સામેલ હતા. શાકિબ સહિત 147 લોકો પર આંદોલનકારીઓ પર ગોળી ચલાવવાનો આદેશ આપવાનો આરોપ છે. ફાયરિંગમાં ઘણા આરોપીઓ પણ સામેલ હતા.

ગોળીબાર દરમિયાન રૂબેલ ઘાયલ થયો હતો, તેને હોસ્પિટલમાં દાખલ કરવામાં આવ્યો હતો, પરંતુ 2 દિવસ પછી તેનું મોત થયું હતું. જે બાદ પિતાએ પોલીસ સ્ટેશનમાં ફરિયાદ નોંધાવી હતી.

કાનપુર ટેસ્ટ પહેલા નિવૃત્તિની જાહેરાત કરતો શાકિબ અલ હસન.

શાકિબ હસીનાની સરકારમાં મંત્રી હતો શાકિબ આ વર્ષે સાંસદ બન્યા હતા. તે શેખ હસીનાની સરકારમાં મંત્રી હતો. દેશમાં હિંસક દેખાવો બાદ શેખ હસીનાએ પોતાના પદ પરથી રાજીનામું આપવું પડ્યું હતું. તેમણે દેશ પણ છોડવો પડ્યો. હસીનાનાં રાજીનામા બાદ નોબેલ પુરસ્કાર વિજેતા મોહમ્મદ યુનુસે બાંગ્લાદેશની વચગાળાની સરકારમાં મુખ્ય સલાહકારનું પદ સંભાળ્યું છે.

આ તસવીર સંસદની ચૂંટણી લડતી વખતે એક મીટિંગની છે, જ્યાં શાકિબ પહોંચ્યો હતો.

રૂબેલની સાતમી ઓગસ્ટે હત્યા થઈ હતી, શાકિબ કેનેડામાં હતો PTI અનુસાર, રફીકુલ ઈસ્માલાના પુત્ર રૂબેલનું 7 ઓગસ્ટના રોજ આંદોલન દરમિયાન મોત થયું હતું. FIRમાં શાકિબને આરોપી નંબર 27 કે 28 બનાવવામાં આવ્યો છે. અહેવાલો એ પણ બહાર આવ્યું છે કે શાકિબ 5 ઓગસ્ટના વિરોધ દરમિયાન બાંગ્લાદેશમાં ન હતો.

બાંગ્લાદેશમાં હિંસક વિરોધ દરમિયાન શાકિબ કેનેડા ગયો હતો. શાકિબે 26 જુલાઈથી 9 ઓગસ્ટ દરમિયાન કેનેડામાં આયોજિત ગ્લોબલ T20 લીગમાં ભાગ લીધો હતો. આટલું જ નહીં 26 જુલાઈ પહેલા તે અમેરિકામાં મેજર લીગ ક્રિકેટ રમી રહ્યો હતો.

રૂબેલની હત્યા સમયે શાકિબ અલ હસન કેનેડામાં ગ્લોબલ T20 લીગ રમી રહ્યો હતો.

શાકિબનો વિવાદો સાથે ઊંડો સંબંધ બાંગ્લાદેશનો આ સ્ટાર ઓલરાઉન્ડર અવારનવાર મેદાન પર અને મેદાનની બહાર વિવાદોને કારણે ચર્ચામાં રહે છે. આ વર્ષે એપ્રિલમાં તેની ગ્રાઉન્ડ સ્ટાફ સાથે ઝપાઝપી થઈ હતી. તેનો ફોન છીનવી લેવાનો પ્રયાસ કર્યો અને થપ્પડ મારવાની ધમકી પણ આપી. આ સિવાય તે ઘણી વખત મેદાન પર વિરોધી ટીમના ખેલાડીઓ અને અમ્પાયરો સાથે પણ ઘર્ષણ કરી ચૂક્યો છે.