શાર્દૂલ બીજી ટેસ્ટ પહેલા પ્રેક્ટિસ દરમિયાન ઈજાગ્રસ્ત થયો: બોલ ખભા પર વાગ્યો; સેન્ચુરિયન ટેસ્ટ દરમિયાન પણ ઈજા થઈ હતી

ટીમ ઈન્ડિયાનો બોલિંગ ઓલરાઉન્ડર શાર્દૂલ ઠાકુર શનિવારે પ્રેક્ટિસ સેશન દરમિયાન ઈજાગ્રસ્ત થયો હતો. PTI અનુસાર, નેટ્સમાં બેટિંગ કરતી વખતે શાર્દૂલને ખભા પર બોલ વાગ્યો હતો.

આ ઈજાની ગંભીરતા હજુ જાણી શકાઈ નથી અને તેનું સ્કેન પણ કરાવવામાં આવે તેવી શક્યતા છે. હાલમાં, તેની ઈજાને સ્કેન કરવામાં આવી છે કે નહીં તેની પુષ્ટિ થઈ નથી. ભારત અને દક્ષિણ આફ્રિકા વચ્ચે બીજી ટેસ્ટ 3 જાન્યુઆરીથી કેપટાઉનમાં રમાશે.

ઈજા બાદ શાર્દૂલે ફરી નેટ્સમાં ભાગ લીધો ન હતો
રિપોર્ટ અનુસાર, નેટ સેશન શરૂ થયાના 15 મિનિટ પછી આ ઘટના બની, જ્યારે ફિલ્ડિંગ કોચ ટી. દિલીપ શાર્દૂલને થ્રોડાઉન પ્રેક્ટિસ આપી રહ્યા હતા. શાર્દૂલ શોર્ટ બોલ રમી શક્યો ન હતો અને બોલ તેના ખભા પર વાગ્યો હતો.

બોલ વાગવાથી શાર્દૂલ ખૂબ જ અસ્વસ્થતા અનુભવી રહ્યો હતો અને નેટ સેશન દરમિયાન બોલિંગ કરી શક્યો ન હતો. પરંતુ, મુંબઈના ઓલરાઉન્ડરે નેટ્સમાં બેટિંગ ચાલુ રાખી હતી. એકવાર તેણે બેટિંગ પૂરી કરી, ફિઝિયોએ તેના ખભા પર આઈસ પેક સ્લિંગ મૂક્યું અને તેણે નેટ્સમાં વધુ ભાગ લીધો નહીં.

બોલ શાર્દૂલના હેલ્મેટ પર વાગ્યો હતો
પ્રથમ ટેસ્ટમાં ભારતનો નંબર આઠનો બેટર શાર્દુલ સારા ફોર્મમાં દેખાઈ રહ્યો હતો, પરંતુ 44મી ઓવરનો ત્રીજો બોલ તેના હેલ્મેટમાં વાગી ગયો. ગેરાલ્ડ કોત્ઝીના બાઉન્સરથી તેને માથા પર વાગ્યો હતો. તેના હેલ્મેટ પર બોલ વાગ્યા બાદ શાર્દૂલ મુશ્કેલીમાં હોવાનું જણાયું હતું અને તેણે કન્સશન પ્રોટોકોલ પસાર કર્યો હતો, જેમાં મેડિકલ ટીમે તેની ઈજાનું નિરીક્ષણ કર્યું હતું. પ્રોટોકોલ દરમિયાન, ઠાકુરના માથા પર સોજો દેખાયો.

ઈજા છતાં શાર્દૂલે ફરી બેટિંગ શરૂ કરી. 47મી ઓવરમાં કાગીસો રબાડાનો બોલ પણ તેના હાથ પર વાગ્યો હતો. આ વખતે પણ મેડિકલ ટીમે તેનું ચેકિંગ કર્યું હતું. શાર્દુલે બેટિંગ શરૂ કરી હતી પરંતુ બીજા જ બોલ પર તે કેચ આઉટ થયો હતો.

શાર્દૂલ ઠાકુર 33 બોલમાં 24 રન બનાવીને આઉટ થયો હતો. તેણે ઇનિંગમાં 3 ચોગ્ગા ફટકાર્યા હતા, તે બોલથી હેલ્મેટ પર વાગ્યો હતો.

આવેશ બીજી ટેસ્ટ માટે ભારતીય ટીમ સાથે જોડાયો
દક્ષિણ આફ્રિકા પ્રવાસ પર 3 જાન્યુઆરીથી કેપટાઉનમાં રમાનારી બીજી ટેસ્ટ મેચ માટે મોહમ્મદ શમીના સ્થાને ભારતીય ટીમમાં ઝડપી બોલર આવેશ ખાનનો સમાવેશ કરવામાં આવ્યો છે.

મોહમ્મદ શમીને દક્ષિણ આફ્રિકા પ્રવાસ માટે બે ટેસ્ટ મેચની શ્રેણી માટે ટીમમાં સામેલ કરવામાં આવ્યો હતો. સિરીઝની શરૂઆત પહેલા જ મોહમ્મદ શમી ફિટનેસ ટેસ્ટમાં પાસ ન થવાને કારણે પ્રવાસમાંથી બહાર થઈ ગયો હતો. જો કે, ભારતીય ક્રિકેટ કંટ્રોલ બોર્ડે તેમના સ્થાને કોઈ ખેલાડીને સામેલ કર્યા નથી. હવે પ્રથમ મેચ સમાપ્ત થયા બાદ શમીના સ્થાને અવેશ ખાનને ટીમમાં સામેલ કરવામાં આવ્યો છે.

ભારત શ્રેણીમાં 1-0થી પાછળ છે
ભારતીય ટીમ આ બે મેચની ટેસ્ટ શ્રેણીમાં 1-0થી પાછળ છે. સેન્ચુરિયનમાં રમાયેલી પ્રથમ ટેસ્ટમાં ભારતને દક્ષિણ આફ્રિકાએ ઇનિંગ્સ અને 32 રને પરાજય આપ્યો હતો. હવે બંને ટીમ ન્યુલેન્ડ્સ, કેપટાઉન ખાતે 3થી 7 જાન્યુઆરી સુધી રમશે.