ભારત સામે શ્રીલંકાની ટીમની જાહેરાત: ચરિથ અસલંકા 27મી જુલાઈના રોજ પ્રથમ મેચની T-20 શ્રેણીનું નેતૃત્વ કરશે

શ્રીલંકા ક્રિકેટ બોર્ડે મંગળવારે ભારત સામેની શ્રેણી માટે 16 સભ્યોની T-20 ટીમની જાહેરાત કરી છે. T-20ની કમાન ચરિથ અસલંકાને સોંપવામાં આવી છે. તાજેતરમાં યોજાયેલા T-20 વર્લ્ડ કપમાં ખરાબ પ્રદર્શનને કારણે પૂર્વ કેપ્ટન વાનિન્દુ હસરંગાએ કેપ્ટનશિપ છોડી દીધી હતી. 18 જુલાઈએ BCCIએ શ્રીલંકા પ્રવાસ માટે ભારતીય ટીમની જાહેરાત કરી હતી.

ટીમ ઈન્ડિયા શ્રીલંકામાં 3 T-20 મેચની શ્રેણી રમશે. પહેલી મેચ પલ્લેકલેમાં 27મી જુલાઈએ સાંજે 7:00 કલાકે રમાશે. ODI શ્રેણી 2 ઓગસ્ટથી કોલંબોમાં શરૂ થશે.

ભારતીય ટીમે છેલ્લે 2021માં શ્રીલંકાનો પ્રવાસ કર્યો હતો. ટીમે 3 ODI અને 3 T-20 મેચોની શ્રેણી રમી હતી. ભારતે ત્રણ મેચની વન-ડે શ્રેણી 2-1થી જીતી લીધી છે. T20 શ્રેણીમાં ભારતને 2-1થી હારનો સામનો કરવો પડ્યો હતો.

ચારિથ અસલંકા નવો કેપ્ટન બન્યો
11 જુલાઈના રોજ વાનિન્દુ હસરંગાના કેપ્ટનશિપ પરથી રાજીનામું આપ્યા બાદ ચારિથ અસલંકાને શ્રીલંકાની T20 ટીમનો નવો કેપ્ટન બનાવવામાં આવ્યો છે. ચરિથ અસલંકાએ આ વર્ષે બાંગ્લાદેશ સામે 2 મેચમાં કેપ્ટનશિપ કરી હતી. જેમાં તેને એકમાં જીત અને એકમાં હારનો સામનો કરવો પડ્યો હતો. ODIની આગેવાની પહેલાથી જ કુસલ મેન્ડિસ પાસે છે. ટેસ્ટની કમાન ધનંજય ડી સિલ્વાના હાથમાં છે.

ભારતીય ટીમ શ્રીલંકા પહોંચી
સોમવારે ભારતીય ટીમ 3 T-20 મેચ રમવા માટે કેન્ડી પહોંચી હતી. પ્રથમ T20 મેચ 27 જુલાઈએ પલ્લેકેલેમાં રમાશે. 3 મેચની ODI શ્રેણી 2 ઓગસ્ટથી કોલંબોના પ્રેમદાસા સ્ટેડિયમમાં રમાશે.

બન્ને ટીમની સ્ક્વોડ
શ્રીલંકાની T20 ટીમ: ચરિથ અસલંકા (કેપ્ટન), પથુમ નિસાંકા, કુસલ ઝેનિથ પરેરા, અવિશકા ફર્નાન્ડો, કુસલ મેન્ડિસ, દિનેશ ચંદીમલ, કામિન્દુ મેન્ડિસ, દાસુન શનાકા, વાનિન્દુ હસરંગા, દુનિથ વેલ્લાગે, મહિશ થિક્સાના, ચામિન્ડુ વિક્રમાસિંઘે, મથિશ પથિરાના, દુષ્મંથા ચમીરા અને બિનુરા ફર્નાન્ડો.

શ્રીલંકા પ્રવાસ માટે ભારતની T-20 ટીમઃ સૂર્યકુમાર યાદવ (કેપ્ટન), શુભમન ગિલ (વાઈસ-કેપ્ટન), યશસ્વી જયસ્વાલ, રિંકુ સિંહ, રિયાન પરાગ, રિષભ પંત (વિકેટકીપર), સંજુ સેમસન (વિકેટકીપર), હાર્દિક પંડ્યા, શિવમ દુબે, અક્ષર પટેલ, વોશિંગ્ટન સુંદર, રવિ બિશ્નોઈ, અર્શદીપ સિંહ, ખલીલ અહેમદ અને મોહમ્મદ સિરાજ.

શ્રીલંકા પ્રવાસ માટે ભારતની વન-ડે ટીમઃ રોહિત શર્મા (કેપ્ટન), શુભમન ગિલ (વાઈસ-કેપ્ટન), વિરાટ કોહલી, કેએલ રાહુલ (વિકેટકીપર), રિષભ પંત (વિકેટકીપર), શ્રેયસ અય્યર, શિવમ દુબે, કુલદીપ યાદવ, મોહમ્મદ સિરાજ, વોશિંગ્ટન સુંદર, અર્શદીપ સિંહ, રિયાન પરાગ, અક્ષર પટેલ, ખલીલ અહેમદ અને હર્ષિત રાણા.

ભારતીય કોચ ગંભીરની પ્રથમ અસાઇનમેન્ટ
ગૌતમ ગંભીર પ્રથમ વખત ભારતીય ટીમનો કોચ બન્યો છે. ભારતીય કોચ તરીકે ગંભીરની આ પ્રથમ અસાઇનમેન્ટ હશે. 42 વર્ષના ગંભીરે ધ વોલ તરીકે જાણીતા રાહુલ દ્રવિડનું સ્થાન લીધું છે. T20 વર્લ્ડ કપ બાદ દ્રવિડનો કાર્યકાળ ખતમ થઈ ગયો. ગંભીરનો કાર્યકાળ જુલાઈ 2027 સુધી ચાલશે.

રોહિત અને વિરાટ ODI ટીમમાં
રોહિત શર્માની સાથે વિરાટ કોહલી ODI ટીમનો હિસ્સો છે. રોહિત અને કોહલીએ 2023ના વર્લ્ડ કપની ફાઈનલ બાદ ભારત માટે કોઈ વન-ડે મેચ રમી નથી. આ સાથે હર્ષિત રાણા અને રિયાન પરાગને પ્રથમ વખત ODI ટીમમાં સ્થાન મળ્યું છે. રિયાન ભારત માટે T20 રમી ચૂક્યો છે. જ્યારે હર્ષિતે હજુ સુધી આંતરરાષ્ટ્રીય ક્રિકેટમાં પદાર્પણ કર્યું નથી.

રોહિત અને વિરાટનો આ ફોટો 2017નો છે. જ્યારે આ બંનેએ શ્રીલંકા સામે સદી ફટકારી હતી.