Related posts
સ્પોર્ટ્સ ડેસ્ક1 મિનિટ પેહલા
- કૉપી લિંક
મુંબઈ ઈન્ડિયન્સ (MI)ના બેટર સૂર્યકુમાર યાદવ ઈન્ડિયન પ્રીમિયર લીગ (IPL) 2024માં ટીમ માટે રમવા માટે તૈયાર છે. ક્રિકબઝના અહેવાલ મુજબ નેશનલ ક્રિકેટ એકેડમી (NCA)એ સૂર્યકુમાર યાદવને ફિટ જાહેર કર્યો છે. હવે તે IPL 2024 માટે 5મી એપ્રિલે મુંબઈ ઈન્ડિયન્સની ટીમમાં જોડાશે. જો કે આ અંગે મુંબઈ તરફથી હજુ સુધી કોઈ નિવેદન આવ્યું નથી.
ફિટનેસની સમસ્યાના કારણે સૂર્યા પ્રથમ ત્રણ મેચ રમી શક્યો નહોતો. સૂર્યાએ આ વર્ષે જાન્યુઆરીમાં જર્મનીમાં હેમસ્ટ્રિંગની સર્જરી કરાવી હતી. સૂર્યાએ બીજી વખત ગ્રોઈન ઈન્જરી માટે સર્જરી કરાવી હતી. આ પછી તે બેંગલુરુમાં NCAમાં રિહેબમાંથી પસાર થઈ રહ્યો હતો.
મુંબઈ તેની આગામી મેચ 7 એપ્રિલે વાનખેડે ખાતે દિલ્હી કેપિટલ્સ સામે રમશે. આ સિઝનમાં મુંબઈની શરૂઆત સારી રહી નથી. નવા કેપ્ટન હાર્દિક પંડ્યાના નેતૃત્વમાં ટીમ સતત ત્રણ મેચ હારી છે.
સાઉથ આફ્રિકા પ્રવાસ પર ત્રીજી T20માં ઈજા થઈ હતી
ડિસેમ્બર 2023માં દક્ષિણ આફ્રિકા સામે રમાયેલી T20 શ્રેણીની ત્રીજી મેચમાં ફિલ્ડિંગ કરતી વખતે સૂર્યા ઘાયલ થયો હતો. તેણે મેદાન છોડવું પડ્યું. ગ્રાઉન્ડ પરથી તેના ગયા બાદ વાઈસ કેપ્ટન રવીન્દ્ર જાડેજાએ ટીમની આગેવાની સંભાળી હતી, ત્યારથી તે મેદાનથી દૂર હતો.
સૂર્યકુમાર યાદવે 17 જાન્યુઆરીએ હોસ્પિટલમાં દાખલ હોવાનો ફોટો સોશિયલ મીડિયા પર શેર કર્યો હતો.
સૂર્યકુમારે IPLમાં 143.32ના સ્ટ્રાઈક રેટથી રન બનાવ્યા છે
સૂર્યકુમાર યાદવે IPLમાં અત્યાર સુધી રમાયેલી 139 મેચમાં 143.32ની સ્ટ્રાઈક રેટથી 3249 રન બનાવ્યા છે. ગત સિઝનમાં તેણે મુંબઈ ઈન્ડિયન્સ તરફથી રમાયેલી 16 મેચમાં 43.21ની એવરેજથી 605 રન બનાવ્યા હતા.
મુંબઈને અત્યાર સુધી સિઝનમાં એક પણ જીત મળી નથી, પોઈન્ટ ટેબલમાં છેલ્લા સ્થાને
સૂર્યકુમાર યાદવની ગેરહાજરીમાં મુંબઈ ઈન્ડિયન્સ માટે સિઝનની શરૂઆત સારી રહી ન હતી. તેણે અત્યાર સુધી રમાયેલી ત્રણેય મેચમાં હારનો સામનો કરવો પડ્યો છે. પહેલા તેમને અમદાવાદમાં ગુજરાત સામે અને હૈદરાબાદમાં સનરાઇઝર્સ સામે હારનો સામનો કરવો પડ્યો હતો. છેલ્લી મેચમાં મુંબઈના વાનખેડે સ્ટેડિયમમાં રાજસ્થાન રોયલ્સે ઘરઆંગણે 6 વિકેટે પરાજય આપ્યો હતો. આ સિઝનમાં અત્યાર સુધી મુંબઈ એકમાત્ર એવી ટીમ છે જેણે એક પણ મેચ જીતી નથી.
