વર્લ્ડ કપની જર્સી જોતાં જ લોકો ઘાંઘા થયા: સોશિયલ મીડિયા પર જેઠા-બબીતાના મીમ્સ ફરતાં થયાં, પેટ્રોલ પંપ સાથે સરખામણી કરીને યુઝર્સે હદ કરી

સોશિયલ મીડિયા પર લોકો પોતાની ફીલિંગ વ્યક્ત કરવામાં એકપણ મિનિટ મોડું નથી કરતા. એવામાં જ્યારે T20 વર્લ્ડ કપ આવતો હોય અને ટીમ ઈન્ડિયા માટે નવી જર્સી લોન્ચ કરવામાં આવે તો કેવું થાય?. બે દિવસ પહેલાં T20 વર્લ્ડ કપ 2024 માટે ટીમ ઈન્ડિયાની નવી જર્સી લોન્ચ કરવામાં આવી હતી. બ્લૂ અને ઓરેન્જના કોમ્બિનેશન સાથે કોલર પર તિરંગાનો રંગ પણ જોવા મળે છે.

જર્સી લોન્ચ થઈ નથી કે સોશિયલ મીડિયા પર મીમ્સ ગેમ શરૂ થઈ નથી. કેટલાક યુઝર્સને જર્સી ખૂબ પસંદ આવી હતી, જ્યારે કેટલાક યુઝર્સ તો એટલા ક્રિએટિવ છે કે જર્સીને લઈને અતરંગી મીમ્સ બનાવવાનું શરૂ કરી દીધું. કોઈએ જર્સીને તારક મહેતા કા ઉલટા ચશ્મા સિરિયલમાં રમાયેલી GPL મેચમાં બ્લાસ્ટર બબીતાની ટીમનાં કપડાં સાથે સરખાવી, જ્યારે કોઈએ તો ઈન્ડિયન ઓઈલ અને સર્ફ-એક્સલ સાથે સરખાવીને હદ જ પાર કરી. તો ચાલો… જોઈએ આવા જ કેટલાંક વાઈરલ મીમ્સની ભરમાર…

મોહમ્મદ મસાદિક નામના યુઝરે ટ્વીટ શેર કર્યું છે, જેમાં ડાબી તરફ ટીમ ઈન્ડિયાની જર્સી રાખી છે અને જમણી તરફ સર્ફ એક્સલ વોશિંગ પાઉડરનો ફોટો દેખાય છે. તે કેપ્શનમાં લખે છે- ‘ઓહ વાહ, પર્ફેક્ટ સરખામણી. મજાક બાદ કરતાં ભારતીય ક્રિકેટ ટીમ માટેની આ અત્યારસુધીની સૌથી ખરાબ જર્સી છે.’

ડેડ મેન નામના યુઝરે ટ્વીટ કરીને લખ્યું- ‘ભારતીય ક્રિકેટની જર્સી પ્રેરિત છે’ અને આટલું લખતાં જ નીચે તારક મહેતા કા ઉલટા ચશ્માના કેરેક્ટર જેઠાલાલ અને બબીતાનો ફોટો છે. આ ફોટો સિરિયલમાં રમાયેલી GPL મેચ દરમિયાનનો છે, જેમાં બ્લાસ્ટર બબીતા નામની ટીમની જર્સી પણ વર્લ્ડ કપની જર્સીની સમાન દેખાઈ રહી છે.

JD નામના યુઝરે લખ્યું- ‘ભાઈ, એક લિટર પેટ્રોલ આપી દે’. કેપ્શન નીચે એક ફોટો છે, જેમાં રોહિત શર્મા અને વિરાટ કોહલીએ ઈન્ડિયાની નવી જર્સી પહેરી છે અને પાછળ ઈન્ડિયન ઓઈલ પેટ્રોલ પમ્પ દેખાઈ રહ્યું છે. સીધી વાત છે કે યુઝર પેટ્રોલ પમ્પનાં કપડાં સાથે જર્સીને સરખાવી રહ્યો છે.

જુઓ કેટલાંક અન્ય વાઇરલ મીમ્સ…