વાઈસ કેપ્ટન વંદના કટારિયા હોકી ઓલિમ્પિક ક્વોલિફાયર 2024માંથી બહાર: પ્રેક્ટિસ કરતી વખતે ઈજાગ્રસ્ત; 13 જાન્યુઆરીથી રાંચીમાં ટુર્નામેન્ટ

ભારતીય મહિલા હોકી ટીમની વાઈસ કેપ્ટન વંદના કટારિયા ઈજાગ્રસ્ત થઈ છે. તે રાંચીમાં 13 જાન્યુઆરીથી શરૂ થનારી મહિલા હોકી ઓલિમ્પિક એશિયન ક્વોલિફાયર રમી શકશે નહીં. તેના સ્થાને નિક્કી પ્રધાનને ટીમના વાઇસ કેપ્ટન તરીકે નિયુક્ત કરવામાં આવ્યા હતા. જ્યારે બલજીત કૌરનો ટીમમાં સમાવેશ કરવામાં આવ્યો હતો.

ઓલિમ્પિક એશિયન ક્વોલિફાયર રાંચીમાં 13થી 19 જાન્યુઆરી દરમિયાન રમાશે. ભારતીય ટીમ ટૂર્નામેન્ટના પહેલા દિવસે અમેરિકા સામેની મેચથી પોતાના અભિયાનની શરૂઆત કરશે.

મેચ પહેલા મહિલા હોકી ટીમની ખેલાડીઓએ પ્રેક્ટિસમાં પરસેવો પાડ્યો હતો.

પ્રેક્ટિસ દરમિયાન ઈજા થઈ હતી
વંદનાને પ્રેક્ટિસ દરમિયાન ઈજા થઈ હતી. તેના ગાલના હાડકામાં ફ્રેક્ચર થયું હતું. જેના કારણે ડોક્ટરોએ તેને આરામ કરવાની સલાહ આપી છે.

ભારતીય ટીમના મુખ્ય કોચ યાનેક શોપમેને કહ્યું કે, તે દુર્ભાગ્યપૂર્ણ છે કે વંદના ટુર્નામેન્ટનો ભાગ બની શકશે નહીં. તેને પ્રેક્ટિસ સેશન દરમિયાન ઈજા થઈ હતી અને તેને આરામની સલાહ આપવામાં આવી છે. જ્યારે અમે વંદનાના અનુભવને ચૂકી જઈશું, ત્યારે બલજીત કૌરને તેની જગ્યાએ તેની કુશળતા દર્શાવવાની તક મળશે. હવે નિક્કી પ્રધાન ટીમની વાઇસ કેપ્ટન હશે.

વંદના કટારિયા પ્રેક્ટિસ સેશનમાં ઈજાને કારણે ઓલિમ્પિક એશિયન ક્વોલિફાયર રમી શકશે નહીં.

ભારતીય ટીમ પુલ Bમાં છે
ભારતીય ટીમને પુલ Bમાં રાખવામાં આવી છે. ટીમની પ્રથમ મેચ 13 જાન્યુઆરીએ અમેરિકા સામે રમાવાની છે. ટીમ તેની બીજી મેચ 14 જાન્યુઆરીએ ન્યૂઝીલેન્ડ સામે અને ત્રીજી મેચ 16 જાન્યુઆરીએ ઈટાલી સામે રમશે. નોકઆઉટ તબક્કાની મેચ 18 અને 19 જાન્યુઆરીએ રમાશે.

ટુર્નામેન્ટમાં ભાગ લેનારી અન્ય ટીમમાં જર્મની, એશિયન ગેમ્સ ચેમ્પિયન જાપાન, ચિલી અને ચેક રિપબ્લિકનો સમાવેશ થાય છે. તેમને પુલ-Aમાં મૂકવામાં આવ્યા છે. ભારતીય ટીમ બુધવારે રાંચી પહોંચી હતી.