સ્પોર્ટ્સ ડેસ્ક15 મિનિટ પેહલા
- કૉપી લિંક
ભારત અને દક્ષિણ આફ્રિકા વચ્ચે 2 ટેસ્ટ મેચની શ્રેણીની પ્રથમ મેચ આજથી સેન્ચુરિયનમાં રમાશે. સુપરસ્પોર્ટ પાર્ક મેદાનમાં બપોરે 1.30 કલાકે મેચ શરૂ થશે. ટોસ બપોરે 1 વાગ્યે થશે.
ભારતીય ટીમ અત્યાર સુધી દક્ષિણ આફ્રિકામાં એક પણ ટેસ્ટ શ્રેણી જીતી શકી નથી. વર્લ્ડ ટેસ્ટ ચેમ્પિયનશિપ (WTC)ની ફાઇનલમાં પહોંચવા માટે બંને ટીમો માટે આ શ્રેણી મહત્ત્વપૂર્ણ છે.
ટીમ ઈન્ડિયાએ ઈંગ્લેન્ડ, ન્યુઝીલેન્ડ, વેસ્ટ ઈન્ડિઝ અને એશિયાના તમામ દેશોમાં ટેસ્ટ સિરીઝ જીતી છે. ઓસ્ટ્રેલિયામાં ભારતને બે વખત સફળતા મળી છે, પરંતુ ટીમ દક્ષિણ આફ્રિકામાં આજ સુધી એકપણ શ્રેણી જીતી શકી નથી.
ભારત દક્ષિણ આફ્રિકામાં માત્ર 17% ટેસ્ટ જીતી શક્યું
ટીમ ઈન્ડિયાએ સાઉથ આફ્રિકામાં 8 સિરીઝ રમી હતી, જેમાં ભારત પ્રથમ 4 એકતરફી હારી ગયું હતું. 2010માં પહેલીવાર સિરીઝ ડ્રો રહી હતી અને 2013થી 2021 દરમિયાન ટીમ ઈન્ડિયા ત્રણ વખત સિરીઝ જીતવાની નજીક આવી હતી, પરંતુ ત્રણેયમાં ટીમનો પરાજય થયો હતો. ભારતે અહીં કુલ 23 ટેસ્ટ રમી અને ટીમ માત્ર 4 ટેસ્ટ એટલે કે 17.39% મેચ જીતી શકી. ટીમ 12 ટેસ્ટ હારી હતી, જ્યારે 7 મેચ ડ્રો રહી હતી.
ભારત અને દક્ષિણ આફ્રિકા વચ્ચે અત્યાર સુધીમાં કુલ 15 ટેસ્ટ શ્રેણી રમાઈ છે. ભારતે આમાંથી 4માં જીત મેળવી હતી, જ્યારે દક્ષિણ આફ્રિકાએ 8માં જીત મેળવી હતી અને 3 શ્રેણી ડ્રો રહી હતી. બંને ટીમો વચ્ચે કુલ 42 ટેસ્ટ રમાઈ હતી. ભારતે 15 અને દક્ષિણ આફ્રિકાએ 17 મેચ જીતી હતી, જ્યારે 10 ટેસ્ટ ડ્રો રહી હતી.
ભારતીય ટીમ ત્રણેય ફોર્મેટની શ્રેણી માટે દક્ષિણ આફ્રિકાના પ્રવાસે છે. તેની શરૂઆત ટી-20 શ્રેણીથી થઈ હતી. ત્રણ મેચની આ શ્રેણી 1-1થી ડ્રો રહી હતી. આ પછી વનડે શ્રેણી રમાઈ હતી, જે ટીમ ઈન્ડિયાએ 2-1થી જીતી હતી.
કોહલીના નામે આ વર્ષે સૌથી વધુ રન
આ સિરીઝમાં ટીમ ઈન્ડિયાની કેપ્ટનશિપ રોહિત શર્મા કરી રહ્યો છે. ટીમ ઈન્ડિયાના નિયમિત કેપ્ટન રોહિતે વર્લ્ડ કપ બાદ ODI અને T20 સિરીઝમાંથી બ્રેક લીધો છે. તેની ગેરહાજરીમાં ટી-20નું સુકાની સૂર્યકુમાર યાદવ અને વનડેનું કેએલ રાહુલ દ્વારા કપ્તાન હતું. વિરાટ કોહલીએ આ વર્ષે ટેસ્ટમાં ભારત માટે સૌથી વધુ રન બનાવ્યા અને તેના નામે 557 રન છે. બોલિંગમાં સ્પિનર આર અશ્વિન ટોપ પર છે, તેના નામે 40 વિકેટ છે.
દક્ષિણ આફ્રિકા માટે માર્કરામ સૌથી વધુ રન બનાવનાર ખેલાડી
ટેમ્બા બાવુમા દક્ષિણ આફ્રિકાની કમાન સંભાળી રહ્યા છે. એઇડન માર્કરામ વર્ષ 2023માં ટીમ માટે સૌથી વધુ રન બનાવનાર ખેલાડી છે, તેણે 276 રન બનાવ્યા હતા. કાગિસો રબાડા ટોપ વિકેટ લેનારની યાદીમાં નંબર વન પર છે, તેણે 3 ટેસ્ટમાં 13 વિકેટ લીધી છે.
આ રેકોર્ડ મેચમાં બની શકે છે
- રવિચંદ્રન અશ્વિન 500 ટેસ્ટ વિકેટ પૂરી કરવાથી 11 વિકેટ દૂર છે.
- કેશવ મહારાજ 13 વિકેટ લેતાની સાથે જ તે દક્ષિણ આફ્રિકાનો ટેસ્ટમાં સૌથી વધુ વિકેટ લેનાર સ્પિનર બની જશે. હ્યુ ટેફિલ્ડે એક સ્પિનર તરીકે દક્ષિણ આફ્રિકા માટે સૌથી વધુ 170 વિકેટ લીધી છે. મહારાજના નામે 158 ટેસ્ટ વિકેટ છે.
- ટેમ્બા બાવુમા 3000 ટેસ્ટ રન બનાવવાથી 3 રન દૂર છે.
- શુભમન ગિલ 1000 ટેસ્ટ રન બનાવવાથી 34 રન દૂર છે.
પીચ રિપોર્ટ
સેન્ચુરિયન સ્ટેડિયમની પીચ પર બોલરો વધુ અસરકારક સાબિત થઈ શકે છે. ખાસ કરીને અહીં ઝડપી બોલરો વધુ સફળ થાય છે, સ્પિનરોને વધારે મદદ મળતી નથી. સુપરસ્પોર્ટ પાર્ક ખાતે કુલ 28 ટેસ્ટ મેચો રમાઈ હતી. પ્રથમ બેટિંગ કરનાર ટીમે 13 મેચ જીતી છે અને બાદમાં બેટિંગ કરનારી ટીમે 12 મેચ જીતી છે. જ્યારે 3 મેચ પણ ડ્રો રહી હતી.
ટીમ ઈન્ડિયાએ અહીં 3 ટેસ્ટ રમી હતી, જેમાં ભારતે એકમાં જીત મેળવી હતી, જ્યારે ટીમને 2માં હાર મળી હતી. ખાસ વાત એ છે કે ટીમે 2021માં અહીં છેલ્લી ટેસ્ટ 113 રનના માર્જીનથી જીતી હતી, જેમાં કેએલ રાહુલે સદી ફટકારી હતી.
વરસાદની 92% શક્યતા
મંગળવારે સેન્ચુરિયનમાં હવામાનને લઈને કોઈ સારા સમાચાર નથી. આજે અહીં વરસાદની 92% શક્યતા છે. પવનની ઝડપ 15 કિલોમીટર પ્રતિ કલાકની રહેશે. તાપમાન 13 થી 23 ડિગ્રી સેલ્સિયસની વચ્ચે હોઈ શકે છે.
બંને ટીમના પોઝિબલ પ્લેઇંગ-11
ભારત: રોહિત શર્મા (કેપ્ટન), યશસ્વી જયસ્વાલ, શુભમન ગિલ, વિરાટ કોહલી, શ્રેયસ અય્યર, રવિન્દ્ર જાડેજા, કેએલ રાહુલ (વિકેટમેન), શાર્દુલ ઠાકુર/આર અશ્વિન, જસપ્રિત બુમરાહ, મોહમ્મદ સિરાજ અને પ્રસિદ્ધ કૃષ્ણા.
દક્ષિણ આફ્રિકા: ટેમ્બા બાવુમા (કેપ્ટન), ડીન એલ્ગર, કીગન પીટરસન/ટોની ડીજ્યોર્જ, એઈડન માર્કરામ, ડેવિડ બેડિંગહામ, માર્કો યાનસન, કાયલ વેરીયન (વિકેટમાં), કેશવ મહારાજ, લુંગી એનગીડી, કાગીસો રબાડા, ગેરાલ્ડ કોએત્ઝી/નાન્દ્રે બર્જર.
