જોકોવિચે કોહલીને થેન્ક્સ કહ્યું: રીલ શેર કરતી વખતે તેણે લખ્યું- હું એ દિવસની રાહ જોઈ રહ્યો છું જ્યારે આપણે સાથે રમીશું

ટેનિસ સ્ટાર ખેલાડી નોવાક જોકોવિચે વિરાટ કોહલીને થેન્ક યુ કહ્યું છે. ભારતીય ક્રિકેટર કોહલીએ રવિવારે અફઘાનિસ્તાન સામેની બીજી T20 પહેલા પ્રેક્ટિસ દરમિયાન જોકોવિચના વખાણ કર્યા હતા અને તેની સાથે થયેલી વાતચીતની કહાણી જણાવી હતી.

સોમવારે, જોકોવિચે એક ઇન્સ્ટાગ્રામ સ્ટોરી શેર કરી. આ સ્ટોરીમાં તેણે ભારતીય ક્રિકેટ ટીમની એક રીલ શેર કરી છે, જેમાં વિરાટ કોહલી તેના વખાણ કરતો જોવા મળી રહ્યો છે. આ રીલ શેર કરતી વખતે જોકોવિચે લખ્યું છે, ‘આ સુંદર શબ્દો માટે વિરાટ તમારો આભાર. હું એ દિવસની રાહ જોઈ રહ્યો છું જ્યારે આપણે સાથે રમીશું.’

ઓસ્ટ્રેલિયન ઓપન 2024ની શરૂઆત પહેલા જોકોવિચે ઓસ્ટ્રેલિયાના સ્ટાર બેટર સ્ટીવ સ્મિથ સાથે ક્રિકેટ રમી હતી. બંને ટેનિસ કોર્ટમાં પણ સામસામે આવી ગયા હતા. આ પછી જોકોવિચ તરફથી ક્રિકેટ સાથે જોડાયેલા ઘણા સવાલોના જવાબ આપવામાં આવ્યા હતા. અહીં તેણે કોહલીનું નામ પણ લીધું. આ પછી જ્યારે વિરાટને જોકોવિચ વિશે પૂછવામાં આવ્યું તો તેણે ટેનિસ ખેલાડી સાથેના તેના કનેક્શન વિશે જણાવ્યું.

કોહલીએ કહ્યું- જોકોવિચે ઈન્સ્ટાગ્રામ પર મેસેજ કર્યો હતો
રવિવારે હોલકર સ્ટેડિયમમાં પ્રેક્ટિસ દરમિયાન કોહલીએ BCCIને કહ્યું, ‘હું નોવાકને તેની સાથે વાત કરવા માટે ઇન્સ્ટાગ્રામ પર મેસેજ કરવા માગતો હતો. પરંતુ જ્યારે હું મેસેજ બોક્સમાં ગયો તો મેં જોયું કે તેણે મને પહેલેથી જ મેસેજ કર્યો હતો. લાંબા સમય સુધી તેનો મેસેજ ઓપન થયો ન હતો. પછી મેં પહેલી વાર મારું મેસેજ બોક્સ ખોલ્યો.

ફેક આઈડી મળવાનો ડર હતો
કોહલીએ વધુમાં કહ્યું, ‘જ્યારે મેં જોકોવિચનો મેસેજ જોયો ત્યારે મને લાગ્યું કે આ ફેક આઈડીથી કરવામાં આવ્યો છે. પરંતુ જ્યારે મેં ફરીથી તપાસ કરી તો મને જાણવા મળ્યું કે મેસેજ રિયલ એકાઉન્ટમાંથી આવ્યો હતો. પછી અમે વાત શરૂ કરી. અમે સિદ્ધિઓ પર એકબીજાને અભિનંદન આપવાનું શરૂ કર્યું.’

હાલમાં જ, નોવાકે ઇન્સ્ટાગ્રામ પર એક સ્ટોરી પોસ્ટ કરીને મને મારી 50મી ODI સદી બદલ અભિનંદન પાઠવ્યા હતા. તેમણે પર્સનલ મેસેજથી પણ મને અભિનંદન પાઠવ્યા હતા. હું તેમનો ખૂબ આદર કરું છું, વિશ્વના ટોચના વૈશ્વિક એથ્લેટ્સ સાથે વાત કરીને આનંદ થયો. તેની ટેનિસ કારકિર્દી શાનદાર છે, ફિટનેસ માટે તેની સખત મહેનત હંમેશા મને પ્રેરણા આપે છે.

કોહલી જોકોવિચ સાથે કોફી પીવા માગે છે
કોહલીએ કહ્યું કે તે ભારતમાં કોફી પર જોકોવિચ સાથે વાત કરવા માગે છે. તેણે ઓસ્ટ્રેલિયન ઓપનમાં ભાગ લેવા બદલ જોકોવિચને પણ અભિનંદન પાઠવ્યા હતા. ઓસ્ટ્રેલિયન ઓપનમાં પ્રમોશનલ ઈવેન્ટ દરમિયાન જોકોવિચ ઓસ્ટ્રેલિયાના દિગ્ગજ ક્રિકેટર સ્ટીવ સ્મિથ સાથે ક્રિકેટ અને ટેનિસ રમતા જોવા મળ્યો હતો.

જોકોવિચના ક્રિકેટ સ્કિલ્સ પર કોહલીએ કહ્યું, ‘જોકોવિચની ક્રિકેટ ટેકનિક મારી ટેનિસ કુશળતા કરતાં ઘણી સારી છે. સ્ટીવે પોતાની સર્વિસ પરત કરીને શાનદાર રમત બતાવી. પરંતુ મેં ઘણી ટેનિસ મેચ લાઈવ જોઈ છે અને મને ખબર છે કે ત્યાં સર્વિસ કેટલી ઝડપી છે. તેમ છતાં, તેની સાથે ટેનિસ રમવું સારું રહેશે. હું તેમને ફક્ત બેટ કેવી રીતે પકડવું તે શીખવી શકું છું.’

જોકોવિચે વિરાટના વખાણ કર્યા હતા
જોકોવિચે 10 વખત ઓસ્ટ્રેલિયન ઓપન જીતી છે અને કુલ 24 ગ્રાન્ડ સ્લેમ ટાઇટલ છે. વર્ષ 2024ના પ્રથમ ગ્રાન્ડ સ્લેમ ઓસ્ટ્રેલિયન ઓપનની શરૂઆત પહેલા બ્રોડકાસ્ટર્સને આપેલા ઇન્ટરવ્યૂમાં તેણે કહ્યું હતું કે, ‘વિરાટ અને હું છેલ્લા કેટલાક વર્ષોથી ઓનલાઈન વાત કરી રહ્યા છીએ.’

જોકોવિચે કહ્યું, ‘વિરાટ અને તે ક્યારેય મળ્યા નથી પરંતુ તેની સાથે વાત કરવી મારા માટે સન્માનની વાત છે. તેની (વિરાટ) ક્રિકેટ કારકિર્દી અને સિદ્ધિઓ શાનદાર છે. હું ક્રિકેટમાં સારો નથી પરંતુ મેં તેને રમવાનું શરૂ કર્યું છે. જ્યારે હું ભારત જાઉં ત્યારે મારી ક્રિકેટ કુશળતાને કારણે હું શરમ અનુભવવા માગતો નથી.’