કોલકાતા56 મિનિટ પેહલા
- કૉપી લિંક
ટોળાએ ટીએમસી નેતા અજીત મૈતીના ઘર પર હુમલો કર્યો હતો. આ દરમિયાન ગુસ્સે ભરાયેલા લોકોએ તેને ચપ્પલથી માર માર્યો હતો.
પશ્ચિમ બંગાળના ઉત્તર 24 પરગના ખાતે સંદેશખાલીમાં મહિલાઓના યૌન શોષણનો મુદ્દો ગરમાયો છે. શુક્રવારે 23 ફેબ્રુઆરીએ ટીએમસી નેતા અજીત મૈતીના ઘર પર ટોળાએ હુમલો કર્યો હતો. આ દરમિયાન ગુસ્સે ભરાયેલા લોકોએ તેને ચપ્પલ વડે ધોલાઈ કરી હતી. આ સિવાય લોકોએ તેની બાઇક અને તેના ઘરની વાડનો ભાગ તોડી નાખ્યો હતો.
આરોપ છે કે અજીત મૈતી ગેરકાયદેસર જમીન હડપ કરવામાં સંડોવાયેલો હતો અને શાહજહાં શેખ સાથે તેની મિલીભગત હતી. હુમલાની માહિતી મળતાં જ પોલીસ ઘટનાસ્થળે પહોંચી હતી અને લોકોને શાંત કરી મામલો થાળે પાડ્યો હતો.
આ તરફ સંદેશખાલીમાં જ રોષે ભરાયેલા સ્થાનિક લોકોએ શેખ શાહજહાં શેખના ભાઈના ઘરને આગ ચાંપી દીધી હતી. ગ્રામજનોનો આરોપ છે કે શેખ શાહજહાંના ભાઈ શિરાજુદ્દીને તેમની 142 વીઘા જમીન હડપ કરી લીધી છે. અહીં પણ પોલીસે ઘટનાસ્થળે પહોંચી મામલો થાળે પાડ્યો હતો. હાલમાં કલમ 144 લાગુ કરીને સંદેશખાલીના બે પોલીસ સ્ટેશન વિસ્તારમાં વધારાની પોલીસ ફોર્સ તહેનાત કરવામાં આવી છે.
સંદેશખાલીમાં જમીન પચાવી પાડવા અને મહિલાઓના યૌનશોષણના મુખ્ય આરોપી TMC નેતા શાહજહાં શેખ વિરુદ્ધ લગભગ 100 કેસ નોંધાયા છે. તેના પર કબજે કરેલી જમીન પર ગેરકાયદેસર રીતે માછલી ઉછેર કરવાનો આરોપ છે.
એન્ફોર્સમેન્ટ ડિરેક્ટોરેટ (ED)ની ટીમ 5 જાન્યુઆરીએ શાહજહાં શેખના ઘરે દરોડા પાડવા પહોંચી હતી. તે ઘરે મળ્યો નહોતો. શાહજહાંના સમર્થકોએ ટીમ પર પથ્થરમારો પણ કર્યો હતો. ત્યારથી (55 દિવસ) શાહજહાં શેખ ફરાર છે.
અજિત મૈતીના ઘર પર હુમલો કરનારા લોકો. અજિતે કહ્યું કે મારી બાઇકની તોડફોડ કરવામાં આવી હતી અને મારી પત્ની પર પણ હુમલો કરવામાં આવ્યો હતો. મારી દીકરીની પરીક્ષા છે, તેના પર ફરીથી હુમલો થવાનો ડર છે.
ભાજપની ટીમને સંદેશખાલીમાં જતા અટકાવવામાં આવી હતી
23 ફેબ્રુઆરીના રોજ રાષ્ટ્રીય માનવાધિકાર આયોગ (NHRC)ની ટીમ પીડિત મહિલાઓને મળવા સંદેશખાલી પહોંચી હતી. બીજેપી ટીમનું નેતૃત્વ બીજેપી સાંસદ લોકેટ ચેટર્જીએ કર્યું હતું. પ્રતિનિધિમંડળ અને પોલીસ વચ્ચે બોલાચાલી પણ થઈ હતી. આ પછી લોકેટનેી અટકાયત કરવામાં આવી હતી. આ પહેલા 16 ફેબ્રુઆરીએ પણ કેન્દ્રીય મંત્રી અને મહિલા સાંસદોના પ્રતિનિધિમંડળને સંદેશખાલી જવા દેવામાં આવ્યા ન હતા.
સંદેશખાલીના બરમાજુર ગામમાં મોટી સંખ્યામાં લોકોએ પ્રદર્શન કર્યું હતું. આ માટે સુપ્રતિમ સરકાર (ADG, દક્ષિણ બંગાળ) અને ભાસ્કર મુખર્જી (DIG, બારાસત રેન્જ)ને મોકલવામાં આવ્યા હતા.
ભાજપના સાંસદ લોકેટ ચેટર્જી (ડાબે)એ પણ પોલીસ સાથે ઉગ્ર દલીલ કરી હતી. લોકેટે કહ્યું, અમે સંદેશખાલીમાં મહિલાઓની સ્થિતિ જાણવા માંગીએ છીએ, અમને જવા દો..
બંગાળમાં 6 સ્થળો પર દરોડા
મીડિયા રિપોર્ટ્સ અનુસાર, એન્ફોર્સમેન્ટ ડિરેક્ટોરેટ (ED) એ ફરાર તૃણમૂલ કોંગ્રેસ (TMC) નેતા શાહજહાં શેખ વિરુદ્ધ મની લોન્ડરિંગનો કેસ નોંધ્યો છે. રાશન કૌભાંડમાં EDએ બંગાળમાં 6 સ્થળો પર પણ દરોડા પાડ્યા છે.
EDની ટીમ એક વ્યક્તિ અરૂપ સોમના ઘરે પણ પહોંચી હતી. અરૂપ પહેલા સરકારી નોકરીમાં હતો, હવે તે માછીમારીનો વ્યવસાય કરે છે. આ પહેલા 22 ફેબ્રુઆરી (ગુરુવારે) EDએ શાહજહાંને નવેસરથી સમન્સ જારી કર્યું હતું. તેમાં કહેવામાં આવ્યું હતું કે તે 29 ફેબ્રુઆરીએ તપાસ માટે હાજર હતો.
TMC નેતાઓ 50 લોકો સાથે ફરી રહ્યા છે, અમારા પર પ્રતિબંધ – સુકાંત મજમુદાર
બંગાળ ભાજપના પ્રમુખ સુકાંત મજુમદાર 22 ફેબ્રુઆરીએ રાજ્યપાલ સીવી આનંદ બોઝને મળ્યા હતા. અગાઉ તેણે પ્રદર્શન કર્યું હતું, તેની ધરપકડ કરવામાં આવી હતી, બાદમાં વ્યક્તિગત બોન્ડ પર મુક્ત કરવામાં આવ્યા હતા.
બાલુરઘાટના સાંસદ સુકાંતે કહ્યું- મેં રાજ્યપાલને સમગ્ર ઘટના વિશે જણાવ્યું. રાજ્યપાલે એક સાંસદ સાથે જે રીતે વર્તન કરવામાં આવ્યું તેના પર ચિંતા વ્યક્ત કરી હતી. કલમ 144 માત્ર ભાજપ માટે જ લાગુ છે, TMC ધારાસભ્યો 50 લોકો સાથે ફરતા ફરે છે. આ સ્વીકારવામાં આવશે નહીં. શાહજહાં શેખ અને ભાઈઓ લોકોને ટોર્ચર કરે છે. સીએમ મમતા બેનર્જી અને પાર્ટી આ અંગે વાત નથી કરી રહી. સંદેશખાલીની મહિલાઓ જ અવાજ ઉઠાવી રહી છે.
સંદેશખાલીની બહાર 2 કિમી દૂર રેપિડ એક્શન ફોર્સ અને અન્ય સુરક્ષા દળોને તૈનાત કરવામાં આવ્યા છે.
પીએમ મોદી માર્ચમાં ત્રણ વખત બંગાળની મુલાકાત લેશે
પીએમ નરેન્દ્ર મોદી 1 માર્ચે અરામબાગ અને 2 માર્ચે કૃષ્ણનગર જશે. PM 6 માર્ચે ઉત્તર 24 પરગનાના બારાસાતમાં મહિલા રેલીને સંબોધન કરશે. સંદેશખાલી ઉત્તર 24 પરગના જિલ્લામાં છે. સૂત્રોના જણાવ્યા અનુસાર પીએમ મોદી બારાસતમાં સંદેશખાલીના પીડિતોને મળી શકે છે. બીજી તરફ ટીએમસીના મહાસચિવ અભિષેક બેનર્જી માર્ચના બીજા સપ્તાહમાં સંદેશખાલી ખાતે સભાને સંબોધન કરશે.
ભાજપે 22 ફેબ્રુઆરીના રોજ વીડિયો જાહેર કર્યો હતો
સંદેશખાલીમાં મહિલાઓની જાતીય સતામણી મામલે ભાજપે 22 ફેબ્રુઆરીએ સોશિયલ મીડિયા પર એક વીડિયો પણ જાહેર કર્યો હતો. બીજેપીએ કેપ્શનમાં લખ્યું – સંદેશખાલીનું આવું સત્ય જે આપણા અંતરાત્માને હચમચાવી દેશે. મમતા બેનર્જી આ સત્યને છુપાવવાનો પ્રયાસ કરી રહ્યાં છે.
20 મિનિટ 41 સેકન્ડના આ વીડિયોમાં મહિલાઓ પોતાની અગ્નિપરીક્ષાનું વર્ણન કરી રહી છે, જેમાં એક મહિલાએ દાવો કર્યો હતો કે ટીએમસી નેતા શિબપ્રસાદ હઝરા એટલે કે શિબુ હઝરા તેને તેના ઘરેથી ઉપાડતા હતા. ટીએમસીના લોકો છોકરીઓની સુંદરતા જોઈને પોતાની સાથે લઈ જતા હતા. છોકરીઓ તેમના માટે મનોરંજન હતી.
એક મહિલાએ જણાવ્યું હતું કે હઝરાના લોકો રાત્રે 2 વાગે ફોન કરતા હતા. કહેતા કે દાદા (શિબુ હઝરા) બોલાવે છે. તેમનો આદેશ એટલે ભગવાનનો હુકમ. હું રાત્રે 2 વાગે જતી અને સવારે 5 વાગે પાછી આવતી. હું દુકાન ચલાવું છું. જો તેણે ફોન કર્યો ત્યારે હું ન ગઇ હોત તો તેમણે મારી દુકાન તોડી નાખી હોત.
અનુસૂચિત જનજાતિ અને માનવ અધિકાર પંચે રિપોર્ટ માગ્યો
રાષ્ટ્રીય અનુસૂચિત જનજાતિ આયોગ (NCST)ની ટીમ ગુરુવારે સંદેશખાલી જવા રવાના થઈ હતી.
રાષ્ટ્રીય અનુસૂચિત જનજાતિ આયોગ (NCST)ની એક ટીમ ગુરુવારે (22 ફેબ્રુઆરી) સંદેશખાલી પહોંચી હતી. NCSTના ઉપાધ્યક્ષ અનંત નાયકે કહ્યું હતું કે અમે DGP રાજીવ કુમાર અને બંગાળના મુખ્ય સચિવ બીપી ગોપાલિકા પાસેથી રિપોર્ટ માગીશું. અમે તેમને ત્રણ દિવસનો સમય આપ્યો છે.
સંદેશખાલી કેસની તપાસ માટે રાષ્ટ્રીય માનવ અધિકાર પંચ (NHRC)ની એક વિશેષ ટીમ ગુરુવારે સંદેશખાલીની મુલાકાત લેશે. એનએચઆરસીએ મુખ્ય સચિવ અને ડીજીપીને પણ નોટિસ પાઠવી છે અને આરોપીઓ સામે કરવામાં આવેલી કાર્યવાહી અંગે ચાર અઠવાડિયાંમાં રિપોર્ટ માગ્યો છે.
સંદેશખાલીમાં ટીએમસીના નેતા શેખ શાહજહાં અને તેના બે સહયોગી શિબુ હાઝરા અને ઉત્તમ સરદાર પર મહિલાઓ પર સામૂહિક બળાત્કારનો આરોપ છે. આ કેસમાં પોલીસે શિબુ હઝરા અને ઉત્તમ સરદાર સહિત 18 લોકોની ધરપકડ કરી છે. શાહજહાં હજુ પણ ફરાર છે.
શાહજહાં શેખ ટીએમસીના જિલ્લા સ્તરનો નેતા છે. રાશન કૌભાંડમાં EDએ 5 જાન્યુઆરીએ તેમના ઘરે દરોડા પાડ્યા હતા. ત્યારબાદ શાહજહાંના 200થી વધુ સમર્થકોએ ટીમ પર હુમલો કર્યો. અધિકારીઓએ પોતાનો જીવ બચાવવા ભાગવું પડ્યું હતું. ત્યારથી શાહજહાં શેખ ફરાર છે. જોકે સંદેશખાલીના લોકો કહે છે કે તે ક્યાંય ગયો નથી, તે અહીં જ છે.
આ સમાચાર પણ વાંચો…
સંદેશખાલી પર હાઈકોર્ટે બંગાળ સરકારને ફટકાર લગાવી: કહ્યું- સમસ્યાનું મૂળ શાહજહાં છે, તેને કેમ પકડવામાં ન આવ્યો?
20 ફેબ્રુઆરીએ કોલકાતા હાઈકોર્ટની ડિવિઝન બેન્ચે સંદેશખાલી કેસ અંગે બંગાળ સરકારને ફટકાર લગાવી હતી. કોર્ટે કહ્યું- શરૂઆતમાં સ્પષ્ટ છે કે ટીએમસી નેતા શાહજહાંએ લોકોને નુકસાન પહોંચાડ્યું હતું. બળાત્કાર અને જમીન પચાવી પાડવાનો આરોપી શાહજહાં પોલીસની પહોંચની બહાર હોય તેમ લાગી રહ્યું છે.
મમતાએ કહ્યું- સંદેશખાલી આરએસએસનો ગઢ છેઃ અહીં તણાવ પેદા કરવા માટે ભયાનક ષડયંત્ર રચવામાં આવી રહ્યું છે, અહીં પહેલા પણ રમખાણો થઈ ચૂક્યા છે
સીએમ મમતા બેનર્જીએ ગુરુવારે (15 ફેબ્રુઆરી) પશ્ચિમ બંગાળના ઉત્તર 24 પરગણા જિલ્લાના સંદેશખાલીમાં મહિલાઓ સામેના જાતીય સતામણીના કેસ અંગે વિધાનસભામાં વાત કરી હતી. મમતાએ કહ્યું કે સંદેશખાલીમાં તણાવ પેદા કરવાનું ભયાનક ષડયંત્ર ચાલી રહ્યું છે. સંદેશખાલી આરએસએસનો ગઢ છે. 7-8 વર્ષ પહેલા પણ અહીં રમખાણો થયા હતા.
