અમેરિકાએ કહ્યું- ભારત વિરોધી રિપોર્ટ્સ ખોટા, ત્યાં ધાર્મિક સ્વતંત્રતા છે: US મીડિયાએ કહ્યું હતું- ભારતમાં મુસ્લિમોને સાઇડલાઇન કરવામાં આવ્યા છે, મોદી જીતશે તો જોખમ વધશે

યુએસ વિદેશ મંત્રાલયે ભારતીય ચૂંટણીના અમેરિકન રિપોર્ટ્સ પર અઠવાડિયામાં બે વાર સ્પષ્ટતા કરી હતી.

અમેરિકન મીડિયા સતત ભારતમાં યોજાઈ રહેલી ચૂંટણીને મુસ્લિમો વિરુદ્ધ દર્શાવી રહ્યું છે. ન્યૂયોર્ક ટાઈમ્સે 19 મેના રોજ એક રિપોર્ટ પ્રકાશિત કર્યો હતો, જેમાં કહેવામાં આવ્યું હતું કે ભારતમાં રહેતા મુસ્લિમ પરિવારોને સાઇડલાઇન કરવામાં આવ્યા છે. ત્યાં સુધી કે તેની ઓળખ પર પણ સવાલ ઉઠાવવામાં આવી રહ્યા છે.

સોમવારે (20 મે) યુએસ સ્ટેટ ડિપાર્ટમેન્ટે સ્પષ્ટતા આપી અને ભારતની ધાર્મિક સ્વતંત્રતાની પ્રશંસા કરી છે. વિદેશ મંત્રાલયના પ્રવક્તા મેથ્યુ મિલરે કહ્યું કે અમે આ રિપોર્ટ્સ સંપૂર્ણપણે નકારીએ છીએ. સમગ્ર વિશ્વમાં ધાર્મિક સ્વતંત્રતાના અધિકારની રક્ષા માટે અમેરિકા હંમેશા તૈયાર છે. આ માટે અમને ભારત સહિત અન્ય ઘણા દેશોનું સમર્થન મળ્યું છે.

આ દરમિયાન, યુએસ સ્ટેટ ડિપાર્ટમેન્ટે તેના આંતરરાષ્ટ્રીય ધાર્મિક સ્વતંત્રતા રિપોર્ટને પણ ફગાવી દીધો હતો, જેમાં કહેવામાં આવ્યું હતું કે ભારતમાં મુસ્લિમો પર અત્યાચાર થઈ રહ્યો છે.

અમેરિકાએ ભારતની ધાર્મિક સ્વતંત્રતાની પ્રશંસા કરી.

લોકસભાની ચૂંટણી શરૂ થઈ ત્યારથી સતત ભારત વિરોધી સમાચારો પ્રકાશિત થઈ રહ્યા છે
એક અઠવાડિયામાં આ બીજી વખત છે જ્યારે અમેરિકા દ્વારા આ પ્રકારનું નિવેદન આપવામાં આવ્યું છે. અગાઉ 17 મેના રોજ વ્હાઇટ હાઉસે કહ્યું હતું કે વિશ્વમાં ભારત કરતાં વધુ જીવંત લોકશાહી ક્યાંય નથી. મત આપવા અને સરકાર સામે અવાજ ઉઠાવવાની ભારતીયોની ક્ષમતા પ્રશંસનીય છે.

ભારતમાં લોકસભાની ચૂંટણી શરૂ થઈ ત્યારથી અમેરિકન મીડિયા સતત દેશ વિરુદ્ધ સમાચાર પ્રકાશિત કરી રહ્યું છે. તેઓ ભારતમાં બિનસાંપ્રદાયિક માળખાને ખતરો ગણાવી રહ્યા છે. મોટાભાગના મીડિયા હાઉસનું કહેવું છે કે જો વડાપ્રધાન મોદી ત્રીજી વખત સત્તામાં આવશે તો દેશમાં મુસ્લિમો વિરુદ્ધ હિંસા વધશે. તેમજ ભારત સરકાર મુસ્લિમોને સાઈડલાઈન કરશે.

અમેરિકન મીડિયાના રિપોર્ટ્સ પર એક નજર…

ન્યૂયોર્ક ટાઈમ્સે 19 મેના રોજ એક લેખમાં લખ્યું હતું – ભારતમાં મુસ્લિમો પોતાની ઓળખ છુપાવી રહ્યા છે, તેઓ ડરી ગયા છે.

અમેરિકન ન્યૂઝ ચેનલ ફોક્સે 20 મેના રોજ લખ્યું હતું – અયોધ્યામાં મુસ્લિમોને સતત ધમકી આપવામાં આવી રહી છે.

અમેરિકન ન્યૂઝ ચેનલ સીએનએનએ બોલિવૂડ પર ચૂંટણીમાં ભાજપને સમર્થન કરવાનો આરોપ લગાવ્યો છે.

CNBCએ ચૂંટણીને લોકશાહી માટે ખતરો ગણાવી છે.

CBSએ મોદીના ચૂંટણી અભિયાનને મુસ્લિમ વિરોધી ગણાવ્યું છે.

મોદીએ કહ્યું- દેશમાં કોઈ સમુદાય પર અત્યાચાર થઈ રહ્યો નથી
વડાપ્રધાન નરેન્દ્ર મોદીએ પણ આ અહેવાલોને ફગાવી દીધા છે. ચૂંટણી પ્રચાર અને ઈન્ટરવ્યુ દરમિયાન પીએમએ કહ્યું હતું કે દેશમાં કોઈપણ સમુદાય પર અત્યાચાર નથી થઈ રહ્યો. તેમણે ભારપૂર્વક જણાવ્યું હતું કે ભારતમાં લઘુમતીઓ સામે અત્યાચારના અહેવાલો વાહિયાત છે અને જનતાએ તેમનાથી દૂર રહેવું જોઈએ.

બીજી તરફ, વડાપ્રધાનની આર્થિક સલાહકાર પરિષદે એક રિપોર્ટમાં જણાવ્યું છે કે 1950 થી 2015 સુધીમાં ભારતમાં મુસ્લિમ વસ્તીમાં 43.15%નો વધારો થયો છે. તેનાથી વિપરીત, સમાન સમયગાળા દરમિયાન હિન્દુઓની વસ્તીમાં 7.82% નો ઘટાડો જોવા મળ્યો છે.

‘ભારત પાસે ચૂંટણી પ્રક્રિયામાં સુધારાની માગણી’
આ પહેલા 17 મેના રોજ વ્હાઇટ હાઉસના પ્રવક્તા જોન કિર્બીએ કહ્યું હતું કે અમેરિકા ભારતમાં યોજાનારી ચૂંટણી પર નજીકથી નજર રાખી રહ્યું છે. તેઓ પ્રક્રિયામાં સતત સુધારાની માંગ કરી રહ્યા છે. કિર્બીએ કહ્યું હતું કે ભારતમાં 96 કરોડ લોકો મતદાન પ્રક્રિયાનો ભાગ બની રહ્યા છે, જેઓ 2,660 રજિસ્ટર્ડ પક્ષોના ઉમેદવારોને પસંદ કરવા જઈ રહ્યા છે.

ભારતીયો હજારો ઉમેદવારોમાંથી 545 સંસદ સભ્યોને ચૂંટે છે, જેમાં 10 લાખથી વધુ મતદાન મથકો છે. વ્હાઇટ હાઉસનું આ નિવેદન એવા સમયે આવ્યું છે જ્યારે ગ્લોબલ મીડિયા ભારતમાં યોજાઈ રહેલી ચૂંટણીને લોકશાહી માટે ખતરો ગણાવી રહ્યું છે. ચૂંટણીમાં ધાંધલ ધમાલનો આરોપ લગાવતા વડાપ્રધાન નરેન્દ્ર મોદીને આ માટે જવાબદાર ઠેરવવામાં આવી રહ્યા છે.

‘ભારતની લોકશાહીમાં ખામીઓ’
આ પહેલા ફેબ્રુઆરીમાં બ્રિટિશ અખબાર ધ ઈકોનોમિસ્ટે પણ એક રિપોર્ટ પ્રકાશિત કર્યો હતો. એવું કહેવામાં આવ્યું હતું કે ભારતની લોકશાહીમાં ખામીઓ છે. 167 દેશોમાં લોકશાહીના રેન્કિંગ સાથે પ્રકાશિત થયેલા આ રિપોર્ટમાં ભારતને 41મું સ્થાન મળ્યું છે.

રિપોર્ટ અનુસાર ભારતમાં લોકશાહી કેટલીક ખામીઓ છે. વર્ષ 2019માં ભારતના રેન્કિંગમાં મોટો ઘટાડો નોંધાયો હતો. જોકે ત્યારપછી દેશનો રેન્કિંગ સતત સુધર્યો છે.