EDITOR’S VIEW: અમિત શાહની કુંભમાં ડૂબકી વકફ બોર્ડને ભારે પડી, સનાતન બોર્ડ માટે ધર્મ સંસદમાં ઠરાવ પસાર

.

નમસ્કાર,

મહાકુંભમાં હિન્દુઓ માટે સનાતન બોર્ડની માંગ વધુ સ્પષ્ટ બની છે. 27 જાન્યુઆરીના દિવસે પ્રયાગરાજમાં સંતોની એક વિશાળ ધાર્મિક સંસદ યોજાઈ હતી. આમાં હિન્દુઓ માટે સનાતન બોર્ડ બનાવવાની અને પ્લેસિસ ઓફ વર્શિપ એક્ટ નાબૂદ કરવાની માંગ જોરશોરથી ઉઠાવવામાં આવી હતી. સનાતન બોર્ડ મંદિરોને સરકારી કબજામાંથી મુક્ત કરશે.

મહાકુંભની ધર્મસંસદમાં કોણે શું કહ્યું? સનાતન ધર્મ સંસદના અધ્યક્ષ નિમ્બાર્ક પીઠાધીશ્વર શ્યામ શરણ દેવચાર્યએ જણાવ્યું હતું કે સનાતન બોર્ડ ફક્ત સનાતન ધર્મનું રક્ષણ જ નહીં પરંતુ ભવિષ્યની પેઢીઓની સુરક્ષા પણ સુનિશ્ચિત કરશે. તેમણે કહ્યું, તિરુપતિ બાલાજી જેવા મંદિરોમાં બહારના લોકોની ઘૂસણખોરી અને આપણી શ્રદ્ધાને દૂષિત કરતી અટકાવવા માટે બોર્ડ ખૂબ જ મહત્વપૂર્ણ છે. એક સમયે ઈરાન, અફઘાનિસ્તાન, નેપાળ અને ભૂતાન જેવા દેશો સાંસ્કૃતિક રીતે ભારત સાથે જોડાયેલા હતા. જો આપણે પગલાં નહીં લઈએ તો તો ભારત પણ હિન્દુઓના હાથમાંથી સરકી શકે છે. ઇસ્કોન જૂથ સાથે સંકળાયેલા ગૌરાંગ દાસજી મહારાજે કહ્યું હતું કે, ઉદ્યોગો માટે CII અને ફિક્કી જેવા સંગઠનો અને મેડિકલ માટે IMA જેવા સંગઠનો છે, તો ‘સનાતનીઓ’નું રક્ષણ કરવા અને તેમને એક કરવા માટે એક મજબૂત સંસ્થા હોવી જોઈએ. શાંતિ, સુરક્ષા અને ન્યાય માટે બધા સનાતનીઓએ સનાતન બોર્ડના નેજા હેઠળ એક બનવું જોઈએ.

કેવા પ્રકારના સનાતન બોર્ડની માંગ કરવામાં આવી છે?

સનાતન બોર્ડના મુખ્ય પ્રસ્તાવો શું છે?

આવું હશે સનાતન બોર્ડનું માળખું

સનાતન બોર્ડ શું કામ કરશે?

ભારતમાં જ કેમ વક્ફ બોર્ડ છે? : દેવકીનંદન ઠાકુરનો સવાલ સનાતન બોર્ડના મુદ્દે લાંબા સમયથી આંદોલન ચલાવી રહેલા કથાકાર અને ઉપદેશક દેવકીનંદન ઠાકુરે સનાતન સંસ્કૃતિના પતનને મેકાલેની શિક્ષણ નીતિઓ સાથે જોડ્યું. તેમણે કહ્યું કે આ વ્યવસ્થાને કારણે ભારતીય પરંપરાઓનું સ્થાન અંગ્રેજી ભાષાએ લીધું. દેવકીનંદન ઠાકુરે ચેતવણી આપી હતી કે વક્ફ બોર્ડના માધ્યમથી ભારત પર કબજો મેળવવાનું ષડયંત્ર રચવામાં આવી રહ્યું છે. દેવકીનંદન ઠાકુરે પ્રશ્ન કર્યો કે ભાગવા વખતે પાકિસ્તાન જતા રહેલા લોકોની ખાલી કરાયેલી જમીન વક્ફ બોર્ડના નિયંત્રણમાં છે, પણ પાકિસ્તાનથી ભારતમાં આવેલા હિન્દુઓની જમીનોનું શું થયું? પાકિસ્તાનમાં હિન્દુ બોર્ડ કેમ નથી? તેમણે કહ્યું કે જ્યારે પાકિસ્તાન કે બાંગ્લાદેશમાં આવા કોઈ બોર્ડ નથી ત્યારે ભારતમાં વક્ફ બોર્ડ કેમ છે? તેમણે દાવો કર્યો કે તિરુપતિ બાલાજી જેવા મંદિરો સરકારને વાર્ષિક 500 કરોડ રૂપિયાનું યોગદાન આપે છે ત્યારે સરકારે સનાતન ધર્મ માટે પહેલ કરવી જોઈએ.જો સનાતન બોર્ડની રચના થાય છે, તો દરેક મંદિરની પોતાની ગૌશાળા, ગુરુકુળ અને હોસ્પિટલ હશે અને બધા દાન સનાતન ધર્મમાં જ રહેશે.

પ્લેસિસ ઓફ વર્શિપ એક્ટ રદ્દ કરવા પ્રધાનમંત્રી મોદીને અપીલ કરી જગદગુરુ વિદ્યા ભાસ્કરજી મહારાજે વડાપ્રધાન નરેન્દ્ર મોદીને પ્લેસિસ ઓફ વર્શિપ એક્ટ રદ કરવા વિનંતી કરી, અને કહ્યું કે હિન્દુ મંદિરો તોડીને બાંધવામાં આવેલી મસ્જિદોને સુરક્ષિત રાખવા માટે કોઈપણ પરામર્શ વગર આ કાયદો લાગુ કરવામાં આવ્યો હતો. વડાપ્રધાન નરેન્દ્ર મોદીએ સંસદમાં પોતાની બહુમતીનો ઉપયોગ કરીને પ્લેસિસ ઓફ વર્શિપ એક્ટ રદ કરવો જોઈએ. તે સમયની સરકારે કોઈપણ ચર્ચા વિના આ કાયદો પસાર કર્યો અને તેને દેશ પર લાદી દીધો. તેમણે વધુમાં કહ્યું કે તમામ જીવોનું અસ્તિત્વ સનાતન ધર્મના સંરક્ષણ પર આધારિત છે. સનાતનીઓના રક્ષણ માટે સનાતન બોર્ડની સ્થાપના એ સમયની માંગ છે.

પ્લેસિસ ઓફ વર્શિપ એક્ટ-1991 શું છે? 15 ઓગસ્ટ 1947 પહેલાં અસ્તિત્વમાં આવેલા કોઈપણ ધર્મના પૂજા સ્થળને કોઈપણ બીજા ધર્મના પૂજા સ્થળમાં બદલી શકાય નહીં. દેશની તત્કાલીન નરસિમ્હા રાવ સરકારે 1991માં પ્લેસિસ ઓફ વર્શિપ એક્ટ એટલે કે ઉપાસના સ્થળ માટેનો કાયદો બનાવ્યો હતો. કાયદો લાવવાનો અર્થ અયોધ્યા રામ જન્મભૂમિ આંદોલનની વધતી તીવ્રતા અને ઉગ્રતાને શાંત કરવાનો હતો. સરકારે કાયદામાં એ જોગવાઈ કરી દીધી કે અયોધ્યાની બાબરી મસ્જિદ સિવાય દેશની કોઈ પણ અન્ય જગ્યા પર કોઈપણ પૂજા સ્થળ પર બીજા ધર્મના લોકોના દાવાને સ્વીકાર કરવામાં આવશે નહીં. આમાં કહેવામાં આવ્યું છે કે દેશની આઝાદીના દિવસે એટલે કે 15 ઓગસ્ટ 1947એ કોઈ ધાર્મિક માળખું કે પૂજા સ્થળ જ્યાં જે રૂપમાં પણ હતું તેના પર બીજા ધર્મના લોકો દાવો કરી શકશે નહીં. આ કાયદાથી અયોધ્યાની બાબરી મસ્જિદને અલગ કરી દેવાઈ અને આને અપવાદ બનાવી દેવાઈય કારણ કે આ વિવાદ આઝાદી પહેલાથી કોર્ટમાં વિચારાધીન હતો. અયોધ્યા કેસ સુપ્રીમ કોર્ટમાં ચાલતો હતો ત્યારે સુપ્રીમ કોર્ટે અયોધ્યા રામ જન્મભૂમિ વિવાદ પર 1,045 પાનાના પોતાના નિર્ણયમાં 1991ના આ કાયદાનો હવાલો આપતાં કહ્યું હતું કે, આ કાયદો 15 ઓગસ્ટ 1947એ સાર્વજનિક પૂજા સ્થળોના રહેલા ધાર્મિક ચરિત્રને અકબંધ રાખવા અને તેમાં પરિવર્તન ન કરવાની ગેરંટી આપે છે. સુપ્રીમ કોર્ટે કહ્યું હતું કે આ કાયદો દરેક ધાર્મિક સમુદાયને એ આશ્વાસન આપે છે કે તેમના ધાર્મિક સ્થળોનું સંરક્ષણ થશે અને તેનું ચરિત્ર બદલવામાં આવશે નહીં. હવે સનાતન બોર્ડ હેઠળ આ કાયદો રદ્દ કરવાની માગણી ઉઠી છે.

છેલ્લે, મહાકુંભમાં દેશભરના સાધુ-સંતો જ્યારે સનાતન બોર્ડની માગણી કરી રહ્યા છે ત્યારે પ્રજ્ઞાચક્ષુ રામભદ્રાચાર્યજી મહારાજે કહ્યું કે,સનાતન બોર્ડની કોઈ જરૂર નથી. સનાતન ધર્મ તો અનાદિકાળથી પોતાની રીતે કામ કરે જ છે. સનાતન ધર્મને કોઈ બોર્ડની નીચે લાવીને કામ કરવાની આવશ્યકતા નથી કારણ કે આ આત્મનિર્ભર અને સાર્વભૌમિકરૂપ કામ કરે છે.

સોમવારથી શુક્રવાર સુધી રાત્રે 8 વાગ્યે જોતા રહો એડિટર્સ વ્યૂ…

(રિસર્ચ – યશપાલ બક્ષી)