રિયા ચક્રવર્તીના સમર્થનમાં આવ્યો ‘મિસ્ટર પરફેક્શનિસ્ટ’: આમિર ખાને કહ્યું, ‘ આજે પણ લોકો તમને ખોટી નજરે જુએ છે, બધા તમને વિલન માને છે’

તાજેતરમાં આમિર ખાન એક્ટ્રેસ રિયા ચક્રવર્તીના પોડકાસ્ટમાં જોવા મળ્યો હતો. વાતચીત દરમિયાન, આમિર ખાને સુશાંત સિંહ રાજપૂતના મૃત્યુ પછી રિયા સાથે થયેલા ખરાબ વ્યવહાર વિશે વાત કરતાં નારાજગી વ્યક્ત કરી હતી. તેણે રિયાના સમર્થનમાં કહ્યું છે કે લોકોને ખોટી માહિતી આપવામાં આવી હતી જેના કારણે આજે પણ લોકો તેને વિલન માને છે.

આમિર ખાન પોડકાસ્ટમાં રિયાને સપોર્ટ કરી રહ્યો છે, આપણું જીવન પીંછા જેવું છે, પવનનો એક ઝાપટો આવે છે અને પીંછા ઉડી જાય છે. તમારી સાથે પણ એવું જ થયું. તમારી જીંદગી સારી ચાલી રહી હતી, પરંતુ તમારા જીવનમાં એક અકસ્માત થયો, જેના કારણે તમારું જીવન પલટાઈ ગયું. અચાનક આખી દુનિયામાં બધાને લાગ્યું કે તમે વિલન છો. સામાન્ય માણસને કેવી રીતે ખબર પડે કે રિયા કેવી છે? લોકોને એક વાત કહેવામાં આવી છે, જે સાચી નથી. પરંતુ તે લોકોને લાગે છે કે તે સત્ય છે અને તેઓ તેને સ્વીકારે છે.

આગળ આમિર ખાને કહ્યું કે, હું લોકોને દોષ આપવા માંગતો નથી, પરંતુ મીડિયાએ આટલું બધું ન કરવું જોઈતું હતું, તેણે ઘણું કર્યું. ઘણા બધા જૂઠાણા બોલ્યા, ઘણી બધી હાસ્યાસ્પદ વાતો કહી. આમિરની વાત સાંભળ્યા બાદ રિયા ચક્રવર્તીએ જવાબમાં કહ્યું કે, આ પોડકાસ્ટ શરૂ કરવા પાછળનું આ એક કારણ હતું. એ ઘટના પછી મેં ઘણી વાર ઈન્ટરવ્યુ આપવાનો પ્રયત્ન કર્યો, પણ મને યોગ્ય ન લાગ્યું. તાજેતરમાં હું એક મોટા પોડકાસ્ટરના પોડકાસ્ટમાં ગઈ હતી. તેણે મને ખાતરી આપી કે આવો અને મિત્રોની જેમ વાત કરો, હું તમારી સાથે પત્રકાર જેવો વ્યવહાર નહીં કરું, હું પોડકાસ્ટર છું. પરંતુ તેણે મારી સાથે તેના કરતાં પણ ખરાબ કામ કર્યું, તેથી મેં તે પોડકાસ્ટને રિલીઝ થવા ન દીધું. ઓછામાં ઓછું હું જાણું છું કે ટ્રેડિશનલ મીડિયા કેવું વર્તન કરશે, તેથી હું મારા બોડીગાર્ડ્સને ઉપર લઈ જઈશ. તે દિવસે મેં નક્કી કર્યું કે હું એક સુરક્ષિત જગ્યા બનાવવા માંગુ છું જ્યાં હું લોકો સાથે વાત કરી શકું.

રિયાના મુદ્દે આમિરે કહ્યું, આજે પણ લોકો તમને ખોટી નજરે જુએ છે કારણ કે તેમને ખોટી માહિતી આપવામાં આવી છે. હું આશા રાખું છું કે ધીમે ધીમે તેઓ પણ તમારું સત્ય સમજી જશે.

રિયાએ આગળ આમિરનો આભાર માન્યો અને કહ્યું કે, તમે મારી જર્નીમાં સૌથી શ્રેષ્ઠ વ્યક્તિ છો. તમે મને એક ડોક્યુમેન્ટરી બતાવી જે તમે જાતે જ બનાવી છે. આ બધું થયું ત્યારે મને ખૂબ ગુસ્સો આવ્યો. મને આશ્ચર્ય થતું કે આ નાટકો મારી સાથે જ કેમ થઈ રહ્યું છે. પછી એક દિવસ તમે મને કહ્યું કે બેસીને આ ડોક્યુમેન્ટરી જુઓ, તેનું નામ રૂબરુ રોશની છે. તે ફિલ્મ લોકોને માફ કરવા વિશે છે. તરત જ નહીં, પરંતુ પછીથી મને સમજાયું કે મારે મારી જાતને અને દરેકને માફ કરવી જોઈએ.

રિયા ચક્રવર્તી સાથે વાત કરતી વખતે આમિર ખાને તેની ફિલ્મી કરિયર અને ફિલ્મોમાંથી બ્રેક લેવા વિશે પણ વાત કરી હતી. ‘લાલ સિંહ ચઢ્ઢા’ ફ્લોપ થયા બાદ આમિર ખાને ફિલ્મોમાંથી બ્રેક લીધો હતો. રિયા સાથેની વાતચીત દરમિયાન તેણે જણાવ્યું કે તેણે કોવિડ મહામારી દરમિયાન જ ફિલ્મો છોડવાનો નિર્ણય લીધો હતો. કારણ કે હવે તે પોતાના પરિવાર સાથે વધુને વધુ સમય પસાર કરવા માંગે છે. જો કે હવે આમિર ખાન લાંબા બ્રેક બાદ કમબેક કરવા જઈ રહ્યો છે.

‘સિતારે જમીન પર’ ફિલ્મમાં આમિર ખાન સાથે જેનેલિયા ડિસોઝા લીડ રોલમાં જોવા મળશે.