10 કલાક પેહલા
- કૉપી લિંક
ફિલ્મ ‘પુષ્પા’માં અલ્લુ અર્જુનના બેસ્ટ ફ્રેન્ડ કેશવની ભૂમિકા ભજવનાર એક્ટર જગદીશ પ્રતાપ ભંડારીની ધરપકડ કરવામાં આવી છે. જો રિપોર્ટ પર વિશ્વાસ કરવામાં આવે તો હૈદરાબાદની પુંજગુટ્ટા પોલીસે તેમની ધરપકડ કરીને રિમાન્ડ મેળવ્યા છે.
જગદીશ પર હૈદરાબાદના એક જુનિયર આર્ટિસ્ટના પ્રાઇવેટ ફોટો કેપ્ચર કરવાનો આરોપ છે. આટલું જ નહીં, તેણે જુનિયર આર્ટિસ્ટને પણ તે જ ફોટા બતાવીને હેરાન-પરેશાન કરી હતી.
અન્ય વ્યક્તિની હાજરીમાં તેમણે મહિલાને તેમની તસવીરો સોશિયલ મીડિયા પર વાઇરલ કરવાની ધમકી પણ આપી હતી. જે બાદ જુનિયર આર્ટિસ્ટે 29 નવેમ્બરે આત્મહત્યા કરી હતી.
પુષ્પા ફિલ્મના એક સીનમાં અલ્લુ અર્જુન સાથે જગદીશ
જગદીશ ‘પુષ્પા-2’ના શૂટિંગમાં વ્યસ્ત હતો
હાલમાં જગદીશ ‘પુષ્પા-2’ના શૂટિંગમાં વ્યસ્ત હતો. ફિલ્મના બીજા પાર્ટમાં પણ તેની અગત્યની ભૂમિકા છે. હવે તે આ ફિલ્મમાં જોવા મળશે કે પછી તેની ભૂમિકા અન્ય કોઈ અભિનેતા ભજવશે તે એક મોટો પ્રશ્ન છે.
અભિનેત્રી રશ્મિકા મંદાના સાથે જગદીશ. પુષ્પામાં રશ્મિકા લીડ રોલમાં છે
અભિનેતાની ટીમે હજુ સુધી કોઈ નિવેદન આપ્યું નથી
અત્યાર સુધી આ સમગ્ર મામલે અભિનેતા અને તેની ટીમ તરફથી કોઈ નિવેદન આવ્યું નથી. કેટલાક રિપોર્ટ્સમાં એવો પણ દાવો કરવામાં આવી રહ્યો છે કે, તે જુનિયર આર્ટિસ્ટ જગદીશની ગર્લફ્રેન્ડ હતી. આ મામલે પોલીસ તપાસ ચાલુ છે.
‘પુષ્પા’ ફેમ ડિરેક્ટર સુકુમાર સાથે જગદીશ.
જુનિયર આર્ટિસ્ટના પિતાએ પણ ફરિયાદ નોંધાવી હતી
અગાઉ જ્યારે પોલીસને આ આત્મહત્યાના સમાચાર મળ્યા તો તેમણે તરત જ તેની તપાસ શરૂ કરી. પ્રાથમિક તપાસમાં જ પોલીસને જાણવા મળ્યું કે અભિનેતા જગદીશ તે આર્ટિસ્ટને હેરાન કરતો હતો.
આ પછી પોલીસે ગત બુધવારે જગદીશની ધરપકડ કરી કોર્ટમાં રજૂ કર્યો હતો. કોર્ટના આદેશ પર અભિનેતાને 14 દિવસના રિમાન્ડ પર મોકલવામાં આવ્યો હતો.
તે જુનિયર કલાકારના પિતાએ પણ જગદીશ વિરુદ્ધ ફરિયાદ નોંધાવી હોવાનું ચર્ચાય છે.
હાલમાં જગદીશ ‘પુષ્પા-2’ના શૂટિંગમાં વ્યસ્ત હતો. ફિલ્મના બીજા ભાગમાં પણ તેનો મોટો રોલ છે
2018માં અભિનયની શરૂઆત કરી
જગદીશે વર્ષ 2018માં વેબ સિરીઝ ‘નિરુદયયોગ નટુલુ’થી અભિનયની શરૂઆત કરી હતી. આ પછી તે સુપરહિટ તેલુગુ ફિલ્મ ‘પલાસા 1978’માં પણ જોવા મળ્યો હતો. આ પછી, તેમણે પેન ઈન્ડિયા રિલીઝ ‘પુષ્પા: ધ રાઈઝ’ સાથે દેશભરમાં ઓળખ મેળવી હતી. આ ફિલ્મમાં તેમણે પુષ્પાના સૌથી નજીકના મિત્ર કેશવની ભૂમિકા ભજવી હતી.
