5 કલાક પેહલા
- કૉપી લિંક
વિશ્વમાં પરમાણુ હથિયારોની કુલ સંખ્યા 9,500થી વધીને 12,0000થી વધુ થઈ. (ફાઈલ તસવીર).
ભારતે પરમાણુ હથિયારોના મામલે પાકિસ્તાનને પાછળ છોડી દીધું છે. સ્વીડિશ થિંક ટેન્ક SIPRIના રિપોર્ટ અનુસાર, આ વર્ષે ભારતના પરમાણુ હથિયારોની સંખ્યા વધીને 172 થઈ ગઈ છે, જ્યારે પાકિસ્તાન પાસે 170 વોરહેડ્સ છે. ભારતનાં નવાં લાંબાં અંતરનાં સ્ટ્રાઇક હથિયારો ચીનના ઘણા ભાગોને નિશાન બનાવવામાં સક્ષમ છે.
SIPRI અનુસાર ગયા વર્ષ સુધી ભારત પાસે માત્ર 164 પરમાણુ હથિયારો હતાં. એ જ સમયે અમેરિકા અને રશિયા સહિત 9 દેશોએ છેલ્લા એક વર્ષમાં તેમનાં પરમાણુ હથિયારોના શસ્ત્રાગારને આધુનિક બનાવવા પર કામ કર્યું છે. આ દેશોએ ઘણાં નવાં પરમાણુ સક્ષમ શસ્ત્રો પણ તહેનાત કર્યાં છે.
ભારત અને પાકિસ્તાન બંને 2023માં નવી પરમાણુ વિતરણ પ્રણાલીઓનું નિર્માણ કરવાનું ચાલુ રાખે છે. જ્યાં એક તરફ તે પાકિસ્તાનનો મુકાબલો કરવા માટે પરમાણુ હથિયારો પર ધ્યાન આપી રહ્યું છે, તો બીજી તરફ ભારત પણ લાંબા અંતર માટે સક્ષમ હથિયારો પર ભાર આપી રહ્યું છે, જે સમગ્ર ચીનના લક્ષ્ય સુધી પહોંચી શકે.
વિશ્વમાં 3904 પરમાણુ શસ્ત્રો તહેનાત
SIPRIએ પોતાના રિપોર્ટમાં જણાવ્યું છે કે છેલ્લા એક વર્ષમાં ચીનના પરમાણુ હથિયારો 410થી વધીને 500 થઈ ગયાં છે. આવનારા સમયમાં આ સંખ્યા વધુ વધે એવી શક્યતા છે. આ સિવાય હાલમાં સમગ્ર વિશ્વમાં 3904 પરમાણુ હથિયારો મિસાઇલો અથવા એરક્રાફ્ટમાં તહેનાત છે, જેમાંથી 2100ને હાઈ એલર્ટ પર રાખવામાં આવ્યાં છે. આ હથિયારો મોટે ભાગે અમેરિકા અને રશિયાનાં છે, જોકે આ પ્રથમ વખત છે જ્યારે ચીને તેનાં કેટલાક પરમાણુ હથિયારોને પણ હાઈ ઓપરેશનલ એલર્ટ પર રાખ્યાં છે. વિશ્વમાં પરમાણુ હથિયારોની સંખ્યા હવે 12,0121 પર પહોંચી ગઈ છે.
અમેરિકા-રશિયા પાસે વિશ્વનાં 90% પરમાણુ હથિયારો
રિપોર્ટ અનુસાર ભારત, પાકિસ્તાન અને ઉત્તર કોરિયા પણ તેમની બેલિસ્ટિક મિસાઇલો પર પરમાણુ હથિયારો તહેનાત કરવાની તૈયારી કરી રહ્યા છે. SIPRIએ અહેવાલ આપ્યો છે કે વિશ્વનાં 90% પરમાણુ હથિયારો રશિયા અને અમેરિકા પાસે છે, જોકે ગત વર્ષની સરખામણીમાં વધારે વધારો થયો નથી.
સ્વીડિશ થિંક ટેન્કના વરિષ્ઠ ફેલો હેન્સ ક્રિસ્ટેનસેને જણાવ્યું હતું કે ચીન હાલમાં તેનાં પરમાણુ શસ્ત્રોનો ભંડાર કોઈપણ અન્ય દેશ કરતાં સૌથી ઝડપથી વધારી રહ્યું છે.
યુક્રેન યુદ્ધ પછી દેશો પરમાણુ હથિયારો વિશે માહિતી આપતા નથી
SIPRIનું કહેવું છે કે રશિયા-યુક્રેન યુદ્ધ શરૂ થયા બાદથી પરમાણુ હથિયારો વિશે માહિતી આપવામાં પારદર્શિતા ઘટી છે. UNSC સભ્ય દેશોએ 2021માં પરમાણુ શસ્ત્રો ઘટાડવાનું વચન આપ્યું હતું. તેમણે કહ્યું- પરમાણુ યુદ્ધ ક્યારેય જીતી શકાતું નથી. આ શસ્ત્રોનો ઉપયોગ ક્યારેય ન કરવો જોઈએ, જ્યારે તેઓ હવે હાઈ-એલર્ટ પર છે.
રશિયા-અમેરિકાએ પરમાણુ કરાર રદ કર્યો
રશિયા અને અમેરિકાએ ન્યૂ સ્ટાર્ટ ટ્રીટી પર હસ્તાક્ષર કર્યા હતા, જેથી પરમાણુ હથિયારોની રેસનો અંત આવે. જે યુક્રેન યુદ્ધના એક વર્ષ પૂર્ણ થવા પર રશિયા દ્વારા રદ કરવામાં આવ્યું હતું. ન્યૂ સ્ટાર્ટ સંધિ એ યુએસ અને રશિયા વચ્ચેનો પરમાણુ કરાર હતો.
આ અંતર્ગત બંને દેશો પોતાનાં પરમાણુ હથિયારોના પરીક્ષણની માહિતી એકબીજા સાથે શેર કરતા હતા. રશિયાએ આરોપ લગાવ્યો હતો કે અમેરિકા રશિયાનાં પરમાણુ હથિયારોની માહિતીનો દુરુપયોગ કરી રહ્યું છે.
