ભારતે માનવાધિકાર ઉલ્લંઘનનો અમેરિકાનો રિપોર્ટ ફગાવ્યો: કહ્યું- આ તેમની નબળી સમજ, રિપોર્ટમાં મણિપુર અને ભારતમાં સરમુખત્યારશાહી વધી હોવાનો ઉલ્લેખ

ભારતના વિદેશ મંત્રાલયના પ્રવક્તા રણધીર જયસ્વાલે અમેરિકન રિપોર્ટને સદંતર ફગાવી દીધો છે.

ભારતે માનવાધિકાર ઉલ્લંઘન અંગે અમેરિકા દ્વારા જારી કરાયેલા અહેવાલને સંપૂર્ણપણે ફગાવી દીધો છે. જેમાં અમેરિકાએ મણિપુરમાં થયેલી હિંસાનો ઉલ્લેખ કરી દાવો કર્યો હતો કે ત્યાં માનવ અધિકારોનું ઉલ્લંઘન થઈ રહ્યું છે.

ભારતે 80 પાનાના આ રિપોર્ટને ખોટો અને ભેદભાવપૂર્ણ ગણાવ્યો છે. વિદેશ મંત્રાલયના પ્રવક્તા રણધીર જયસ્વાલે ગુરુવારે (25 એપ્રિલ) કહ્યું કે રિપોર્ટ દર્શાવે છે કે ભારતને લઈને અમેરિકાની સમજ યોગ્ય નથી.

સાપ્તાહિક બ્રીફિંગમાં અમેરિકી રિપોર્ટ પર પૂછવામાં આવેલા પ્રશ્નના જવાબમાં વિદેશ મંત્રાલયના પ્રવક્તા રણધીર જયસ્વાલે કહ્યું, “અમે આ રિપોર્ટને કોઈ મહત્વ આપતા નથી અને તમારે પણ તે જ કરવું જોઈએ.”

દર વર્ષે યુએસ સ્ટેટ ડિપાર્ટમેન્ટ ઘણા દેશોમાં માનવાધિકાર ઉલ્લંઘન અંગેના અહેવાલો બહાર પાડે છે.

અમેરિકાએ રિપોર્ટમાં ભારતના ઘણા મુદ્દાઓનો ઉલ્લેખ કર્યો છે
યુએસ સેક્રેટરી ઓફ સ્ટેટ એન્ટની બ્લિંકને 22 એપ્રિલે વિવિધ દેશોમાં માનવાધિકાર કાયદાના પાલનની સ્થિતિ પર એક અહેવાલ બહાર પાડ્યો હતો. રિપોર્ટમાં ચીનની સાથે બ્રાઝિલ, બેલારુસ, મ્યાનમાર, ભારતનો પણ ઉલ્લેખ કરવામાં આવ્યો છે.

જેમાં ભારતને લઇને દાવો કર્યો હતો કે મણિપુરમાં મેૈતેઈ અને કુકી સમુદાયોમાં જાતિય હિંસા ફેલાયા બાદ માનવ અધિકારોનું ઉલ્લંઘન થયું છે. 3 મે અને 15 નવેમ્બરની વચ્ચે ઓછામાં ઓછા 175 લોકો માર્યા ગયા અને 60,000થી વધુ લોકો વિસ્થાપિત થયા. રિપોર્ટમાં એવું પણ કહેવામાં આવ્યું હતું કે ભારતમાં સરમુખત્યારશાહી વધી છે.

અમેરિકાના માનવાધિકાર રિપોર્ટમાં ભારતમાં રહેતા મુસ્લિમોને લઈને પણ ઘણા દાવા કરવામાં આવ્યા છે. જેમાં કહેવામાં આવ્યું છે કે ભારતની ભાજપ સરકાર ભારતમાં મુસ્લિમો સાથે ભેદભાવ કરી રહી છે. ભારતમાં લઘુમતીઓ પર હુમલા વધ્યા છે.

રિપોર્ટમાં આરોપ લગાવવામાં આવ્યો છે કે મોદી સરકાર પત્રકારોને ચૂપ કરવાનો અને તેમને જેલમાં મોકલવાનો પ્રયાસ કરી રહી છે. આ સિવાય જમ્મુ-કાશ્મીરના લોકોની અભિવ્યક્તિની સ્વતંત્રતાનું ઉલ્લંઘન કરવામાં આવી રહ્યું હોવાનું પણ કહેવામાં આવ્યું છે. લોકોને શાંતિપૂર્ણ વિરોધ પ્રદર્શન કરવા દેવામાં આવતા નથી.

યુએસ રિપોર્ટમાં ભારતમાં રાજકીય કેદીઓને ટ્રાયલ વિના અટકાયતમાં રાખવાનો ઉલ્લેખ છે.

બીબીસી પર રેઈડનો પણ રિપોર્ટમાં ઉલ્લેખ
અમેરિકાના માનવાધિકાર અહેવાલમાં બીબીસીની મુંબઈ અને દિલ્હી ઓફિસો પરના દરોડાનો ઉલ્લેખ છે. અહેવાલમાં જણાવવામાં આવ્યું છે કે વડાપ્રધાન નરેન્દ્ર મોદી પર એક ડોક્યુમેન્ટ્રી રિલીઝ કર્યા બાદ બીબીસી પર દરોડા પાડવામાં આવ્યા હતા. આ દરોડો 60 કલાકનો હતો, જેને કરચોરીની તપાસ તરીકે વર્ણવવામાં આવ્યો હતો. પરંતુ અધિકારીઓએ તે પત્રકારોના મોબાઈલ ફોન અને લેપટોપ પણ જપ્ત કર્યા હતા જેઓ કંપનીના નાણાકીય માળખામાં સામેલ ન હતા.