Related posts
નવી દિલ્હી13 કલાક પેહલા
- કૉપી લિંક
દિલ્હીના મુખ્યમંત્રી અરવિંદ કેજરીવાલની ધરપકડના વિરોધમાં 31 માર્ચ એટલે આવતીકાલે INDIA બ્લોક ‘મહાસભા’ યોજવા જઈ રહ્યું છે. તેમાં 26 દળના નેતાઓ સામેલ થઈ શકે છે. લોકસભા ચૂંટણી પહેલાં આ વિપક્ષની પહેલી મોટી સભા રહેશે. શનિવારે AAP નેતા ગોપાલ રાય અને દિલીપ પાંડેએ રામલીલા મેદાનમાં તૈયારીઓનું નિરીક્ષણ કર્યું.
ગોપાલ રાયે કહ્યું કે ગઠબંધનના નેતા ‘તાનાશાહી હટાવો, લોકતંત્ર બચાવો’ સભામાં પહોંચી રહ્યા છે. કેન્દ્ર સરકાર એજન્સીઓની મદદથી વિપક્ષના નેતાઓને નિશાન બનાવી રહી છે. એક ચૂંટાયેલાં મુખ્યમંત્રીને કોઈના આરોપોના આધારે જેલમાં ધકેલવામાં આવ્યા છે. આ જે ખેલ ચાલી રહ્યો છે, તેના જ વિરુદ્ધ આવતીકાલે મહાસભા થવા જઈ રહી છે.
ત્યાં જ, ભાજપના રાષ્ટ્રીય મહાસચિવ દુષ્યંત કુમાર ગૌતમે કહ્યું કે INDIA ગઠબંધનમાં સામેલ દળના નેતાઓને રાજ્યોમાં કોઈપણ પૂછનાર નથી. એટલે જ્યાં ભીડ એકઠી થાય છે, ત્યાં પોતાનું ભાષણ આપે છે. આજે જનતાએ તેમનો અસ્વીકાર કર્યો છે.
ઝારખંડ મુક્તિ મોરચા (JMM) નેતા અને પૂર્વ મુખ્યમંત્રી હેમંત સોરેનની પત્ની કલ્પના સોરેન ગઈકાલે I.N.D.I.A ગઠબંધનની મેગા સભામાં ભાગ લેવા માટે દિલ્હી પહોંચ્યા હતા.
આતિશી અને સૌરભ ભારદ્વાજે પત્રકાર પરિષદ યોજી હતી
દિલ્હી સરકારના મંત્રીઓ આતિશી માર્લેના અને સૌરભ ભારદ્વાજે આજે પત્રકાર પરિષદ યોજીને ભાજપ પર આક્ષેપો કર્યા હતા. તેમણે કહ્યું કે દારુના વેપારીઓની દક્ષિણ લોબી સાથે બીજેપીના કનેક્શન છે.
બંનેએ કહ્યું- અરવિંદ કેજરીવાલ વિરુદ્ધ નિવેદન આપનાર મગુંતા શ્રીનિવાસ્લુ રેડ્ડી અને તેમના પુત્ર રાઘવ મગુંતા 28 માર્ચે બીજેપીના સહયોગી ટીડીપીમાં જોડાયા હતા. 29 માર્ચે, મગુંતા શ્રીનિવાસલુ રેડ્ડીને લોકસભા ચૂંટણી લડવા માટે ટીડીપીની ટિકિટ મળી.
સાઉથ લોબીના શરથ રેડ્ડીએ ભાજપને 55 કરોડ રૂપિયાનું દાન આપ્યું છે. જો ભાજપની સાથી પાર્ટી મગુંતા શ્રીનિવાસલુ રેડ્ડીને ટિકિટ આપે છે, તો શું ED હવે દારૂ કૌભાંડની તપાસમાં ભાજપને આરોપી બનાવશે?
આતિષી અને સૌરભે કહ્યું હતું કે દારુના વેપારીઓની દક્ષિણ લોબી સાથે બીજેપીના કનેક્શન
દિલ્હીના મુખ્યમંત્રી 1 એપ્રિલ સુધી EDની કસ્ટડીમાં
28 માર્ચે, રાઉઝ એવન્યુ કોર્ટે લિકર પોલિસી કેસમાં દિલ્હીના સીએમ અરવિંદ કેજરીવાલની ED કસ્ટડી વધુ 4 દિવસ લંબાવી હતી. હવે તે 1 એપ્રિલ સુધી કસ્ટડીમાં રહેશે. કેજરીવાલે પોતે આ કેસની દલીલ કરી હતી. આમ કરનાર તેઓ દેશના પહેલા સીટીંગ સીએમ બન્યા છે. EDએ કોર્ટ પાસે કેજરીવાલની વધુ 7 દિવસની કસ્ટડી માંગી હતી.
કેજરીવાલે પોતાની ધરપકડનો વિરોધ કરતાં કહ્યું કે આ કેસમાં મારું નામ માત્ર ચાર જગ્યાએ આવ્યું છે. ચાર નિવેદનો આપવામાં આવ્યા હતા અને તેમાંથી, જે નિવેદનમાં મને ફસાવવામાં આવ્યો હતો તે નિવેદન કોર્ટ સમક્ષ રજૂ કરવામાં આવ્યું હતું. શું આ 4 નિવેદનો મુખ્યમંત્રીની ધરપકડ કરવા માટે પૂરતા છે?
તેના જવાબમાં EDએ કહ્યું- મુખ્યમંત્રી કાયદાથી ઉપર નથી. તે જ સમયે, જ્યારે કોર્ટમાં હાજર થવા જઈ રહ્યા હતા, ત્યારે તેમને પૂછવામાં આવ્યું હતું કે એલજીએ કહ્યું હતું કે જેલમાંથી સરકાર નહીં ચાલે. તેના જવાબમાં કેજરીવાલે કહ્યું કે આ એક રાજકીય ષડયંત્ર છે, જનતા તેનો જવાબ આપશે.
અરવિંદ કેજરીવાલ 28 માર્ચે રાઉઝ એવન્યુ કોર્ટમાં હાજર થવાના છે.
AAPએ 24 માર્ચે મેગા રેલીની જાહેરાત કરી હતી
24 માર્ચે AAP અને કોંગ્રેસે પ્રેસ કોન્ફરન્સમાં આ મેગા રેલીની જાહેરાત કરી હતી. AAP નેતા આતિશીએ કહ્યું હતું કે INDI ગઠબંધનની ‘મહા રેલી’ અરવિંદ કેજરીવાલને બચાવવા માટે નહીં પરંતુ લોકશાહી બચાવવા માટે યોજવામાં આવી રહી છે. વિપક્ષ એકતરફી હુમલાઓનો સામનો કરી રહ્યો છે.
તે જ સમયે, દિલ્હી કોંગ્રેસના વડા અરવિંદર સિંહ લવલીએ કહ્યું કે આ રેલી રાજકીય રેલી નહીં હોય. આ રેલી ભારતના લોકતંત્રને બચાવવા માટે લડત આપવાનું આહ્વાન હશે.
