બેંગલુરુ12 કલાક પેહલા
- કૉપી લિંક
પ્રજ્વલ જેડીએસની ટિકિટ પર હાસનથી લોકસભા ચૂંટણી લડી રહ્યો છે. તેઓ અહીંના વર્તમાન સાંસદ પણ છે.
પૂર્વ વડાપ્રધાન એચડી દેવગૌડાનો પરિવાર સેક્સ સ્કેન્ડલના આરોપોથી ઘેરાયો છે. દેવેગૌડાના ધારાસભ્ય પુત્ર એચડી રેવન્ના (67) અને સાંસદ પૌત્ર પ્રજ્વલ રેવન્ના (33) વિરુદ્ધ તેમની નોકરાણી (ઘરેલુ મદદગાર)નું યૌનશોષણ કરવા મામલે હાસનના હોલેનરસીપુર પોલીસ સ્ટેશનમાં FIR નોંધવામાં આવી છે.
પ્રજ્વલના 200થી વધુ વાંધાજનક વીડિયો વાઇરલ થતાં કર્ણાટકમાં રાજકીય ખળભળાટ મચી ગયો છે. વાઇરલ વીડિયોમાં દેખાતી મહિલાઓ રડી રહી છે અને છોડી દેવા માટે વિનંતી કરી રહી છે અને પ્રજ્વલ વીડિયો શૂટ કરી રહ્યો છે.
કર્ણાટક મહિલા આયોગના અધ્યક્ષ નાગલક્ષ્મી ચૌધરીએ તેને રાજ્યનું સૌથી મોટું સેક્સ સ્કેન્ડલ ગણાવ્યું છે. આ દરમિયાન, કર્ણાટકના સીએમ સિદ્ધારમૈયાએ તપાસ માટે એડીજીપી વીકે સિંહના નેતૃત્વમાં ત્રણ સભ્યોની SITની રચના કરી છે.
તેમાં ડીજી સીઆઈડી સુમન ડી પેનેકર અને આઈપીએસ સીમા લાટકરનો પણ સમાવેશ થાય છે. તેઓએ આ મામલે તપાસ શરૂ કરી છે.
મહિલા આયોગના અધ્યક્ષે કહ્યું- વીડિયો એટલા વાંધાજનક કે ન જોઈ શકી અને ન જણાવી શકું
- રાજ્ય મહિલા આયોગના ચેરપર્સન નાગલક્ષ્મીએ કહ્યું- મને કહેવામાં આવ્યું છે કે પેન ડ્રાઈવમાં સેંકડો યૌનશોષણ પીડિતોના વીડિયો છે. જેમાં અધિકારીઓ અને કર્મચારીઓના પરિવારની મહિલાઓ, પાર્ટી કાર્યકરો અને અન્ય મહિલાઓનો સમાવેશ થાય છે. ગયા સપ્તાહથી હાસનમાં મોટી સંખ્યામાં વીડિયો વાઇરલ થઈ રહ્યા છે.
- કર્ણાટક રાજ્ય મહિલા અપરાધ વિરોધી ઓકુટ્ટા સહિત મહિલાઓ માટે કામ કરતી ત્રણ સંસ્થાઓ 25 એપ્રિલે મારી પાસે ફરિયાદ લઈને આવી હતી. વીડિયો એટલા વાંધાજનક છે કે હું ન તો જોઈ શક્યો કે ન તો જણાવી શકું. મેં તે જ દિવસે સીએમને આ માહિતી આપી હતી.
- એક પીડિતાએ મને કહ્યું કે તેના (રેવન્ના) ઘરે કામ કરવું મુશ્કેલ બની ગયું હતું. હવે તેણે નોકરી છોડી દીધી છે, પરંતુ વીડિયો વાઇરલ થયા બાદ તે પોતાની સુરક્ષાને લઈને ચિંતિત છે. વીડિયો વાઈરલ થયા બાદ પીડિતોની પ્રાઈવસી પણ જોખમમાં આવી ગઈ હતી, તેથી અમે તાત્કાલિક પગલાં લેવાનું નક્કી કર્યું.
- મેં સીએમ અને ડીજીપીને તપાસ માટે એસઆઈટી બનાવવા માટે પત્ર લખ્યો હતો. પંચ માત્ર ભલામણો કરી શકે છે અને અમે અમારી જવાબદારી નિભાવી છે. એસઆઈટી તપાસ કરશે તો બધું સ્પષ્ટ થઈ જશે, પરંતુ કહેવામાં આવ્યું છે કે વીડિયો ત્રણ-ચાર વર્ષના સમયગાળામાં બનાવવામાં આવ્યો હતો.
અનેક મહિલાઓને શિકાર બનાવી હતી
એવો આરોપ છે કે પ્રજ્વલ રેવન્ના હજારો મહિલાઓને પરેશાન કરીને યૌન શોષણ કરવામાં સામેલ છે અને તેણે આ કૃત્યો રેકોર્ડ પણ કર્યા છે. કથિત વીડિયો મતદાન પહેલાં સામે આવ્યો અને ચર્ચા શરૂ થઈ. પ્રજ્વલ રેવન્નાએ તેની સંડોવણીને સંપૂર્ણપણે નકારી કાઢી હતી અને દાવો કર્યો હતો કે તે તેની વિરુદ્ધનું કાવતરું છે.
પ્રજ્વલ રેવન્ના યુરોપના એક શહેરમાં છુપાયો!
પોલીસ તપાસમાં જાણવા મળ્યું છે કે પ્રજ્વલ રેવન્ના શનિવારે સવારે 3.35 વાગ્યે લુફ્થાંસા એરલાઇન્સમાં બેંગલુરુથી ફ્રેન્કફર્ટ જવા રવાના થયો હતો. અહીંથી તેણે જર્મનીની સીધી ફ્લાઈટ પકડી હતી. એવું કહેવામાં આવી રહ્યું છે કે પ્રજ્વલ જર્મની થઈને યુરોપના કોઈ અન્ય શહેરમાં છુપાયેલો છે.
પ્રજ્વલના ડરને કારણે અમે સ્ટોરમાં સંતાઈ જતાં હતાં- પીડિતા
રેવન્ના અને પ્રજ્વલ વિરુદ્ધ એફઆઈઆર નોંધાવનાર મહિલાએ કહ્યું કે તે રેવન્નાની પત્ની ભવાનીની સંબંધી છે. તેણીનો આરોપ છે કે નોકરાણીની નોકરીમાં જોડ્યાના ચાર મહિનાની અંદર રેવન્નાએ તેને હેરાન કરવાનું શરૂ કર્યું. જ્યારે પણ પત્ની બહાર જતી ત્યારે રેવન્ના કોઈ ને કોઈ બહાને મને રૂમમાં બોલાવતા હતા અને ખરાબ વર્તન કરતા હતા.
પ્રજ્વલનો ડર એવો હતો કે તે આવતાની સાથે જ અમે સ્ટોરમાં સંતાઈ જતા. પીડિતાના આરોપ છે કે પ્રજ્વલ તેની પુત્રીને વીડિયો કોલ કરતો હતો અને અશ્લીલ વાતો કરતો હતો. મહિલાએ એમ પણ કહ્યું છે કે તેના અને તેના પરિવારના જીવને ખતરો છે.
પોલીસે મહિલાની ફરિયાદ પર કલમ 354A, 354D, 506, 509 હેઠળ કેસ નોંધ્યો છે. પીડિતાએ રેવન્ના અને પ્રજ્વલ પર 2019 થી 2022 સુધી યૌન શોષણનો આરોપ લગાવ્યો છે.
રવિવાર 28 એપ્રિલે આ મામલો પ્રકાશમાં આવ્યા બાદ કોંગ્રેસના કાર્યકરોએ JDS નેતા પ્રજ્વલ રેવન્ના વિરુદ્ધ પ્રદર્શન કર્યું અને તેમનું પૂતળું સળગાવ્યું હતું.
JDS ધારાસભ્યની દેવેગૌડા સમક્ષ માંગ- પ્રજ્વલને હાંકી કાઢવામાં આવે
સેક્સ સ્કેન્ડલમાં પ્રજ્વલનું નામ સામે આવ્યા બાદ અને એફઆઈઆર નોંધવામાં આવ્યા બાદ પ્રજ્વલ રેવન્નાને પાર્ટીમાંથી સસ્પેન્ડ કરવાની માગણી માટે દબાણ બનાવવામાં આવી રહ્યું છે. જેડીએસ ધારાસભ્ય શારંગૌડા કંડકુરે પાર્ટી સુપ્રીમો અને પૂર્વ વડાપ્રધાન એચડી દેવગૌડાને પત્ર લખ્યો છે. વીડિયોથી પાર્ટી શરમમાં મુકાઈ છે અને તમારી અને પાર્ટી બંનેની પ્રતિષ્ઠાને નુકસાન પહોંચાડે છે.
પ્રજ્વલ હાસનથી ઉમેદવાર, મતદાન કરીને વિદેશ ગયો
26 એપ્રિલે હાસન લોકસભા સીટ માટે વોટિંગ કર્યા બાદ પ્રજ્વલ જર્મની ગયો હતો. JDSએ પ્રજ્વલને ટિકિટ આપીને હાસન પર ફરીથી ઉમેદવાર બનાવ્યા છે. દેવેગૌડાની આગેવાની હેઠળની જેડીએસ એનડીએમાં છે. આ દરમિયાન, પ્રજ્વલના કાકા અને પૂર્વ સીએમ કુમારસ્વામીએ કહ્યું, અમે તપાસની રાહ જોઈશું. જો કોઈએ ગુનો કર્યો હોય તો તેને બચાવવાનો કોઈ સવાલ જ નથી.
કુમારસ્વામીએ એવો પણ દાવો કર્યો હતો કે બીજેપીના વરિષ્ઠ લોકોએ તેમને વીડિયોને ટાંકીને પ્રજ્વલને ટિકિટ ન આપવા કહ્યું હતું, પરંતુ દેવેગૌડાએ ત્યાંથી ભાજપને જીતની ખાતરી આપી હતી.
