ફટાકડા પર પ્રતિબંધ મામલે દિલ્હી પોલીસની કાર્યવાહી માત્ર દેખાડો છે: સુપ્રીમ કોર્ટે કહ્યું- કોઈ પણ ધર્મ પ્રદૂષણ ફેલાવતી પ્રવૃત્તિઓને પ્રોત્સાહન આપતો નથી

દિવાળીની બીજી સવારે, એટલે કે 1 નવેમ્બરના રોજ દિલ્હીમાં AQI 300 પાર નોંધાયો હતો.

સુપ્રીમ કોર્ટે સોમવારે દિલ્હીમાં વધતા પ્રદૂષણ અને ફટાકડા પર પ્રતિબંધ સાથે જોડાયેલા મામલાની સુનાવણી કરી હતી. દિવાળી દરમિયાન આદેશનું ઉલ્લંઘન કરવા બદલ કોર્ટે ફરી એકવાર દિલ્હી પોલીસને ફટકાર લગાવી છે.

કોર્ટે કહ્યું- પોલીસે ફટાકડા પર પ્રતિબંધ અંગે જે કર્યું તે માત્ર દેખાડો છે, માત્ર કાચો માલ જપ્ત કરવામાં આવ્યો છે. ફટાકડા પર પ્રતિબંધ ગંભીરતાથી લાગુ કરવામાં આવ્યો ન હતો.

જસ્ટિસ અભય ઓક અને જસ્ટિસ અગસ્ટિન જ્યોર્જ મસિહની ખંડપીઠે દિલ્હી પોલીસ કમિશનરને ફટાકડા પર પ્રતિબંધ મૂકવા માટે વિશેષ સેલની રચના કરવાનો નિર્દેશ આપ્યો છે.

તેમજ દિલ્હી સરકારને હિતધારકો સાથે પરામર્શ કર્યા બાદ 25 નવેમ્બર પહેલા ફટાકડા પર કાયમી પ્રતિબંધનો નિર્ણય લેવાનો નિર્દેશ આપ્યો હતો.

સુપ્રીમ કોર્ટે કહ્યું- દિલ્હીમાં ફટાકડા પર પ્રતિબંધને ગંભીરતાથી લાગુ કરવામાં આવ્યો ન હતો.

SCએ કહ્યું- કોઈ પણ ધર્મ પ્રદૂષણ ફેલાવતી પ્રવૃત્તિને પ્રોત્સાહન આપતો નથી

સુનાવણી દરમિયાન ખંડપીઠે કહ્યું કે કોઈપણ ધર્મ પ્રદૂષણ ફેલાવતી કોઈપણ પ્રવૃત્તિને પ્રોત્સાહન આપતો નથી. જો આ રીતે ફટાકડા ફોડવામાં આવે, તો તે નાગરિકોના સ્વાસ્થ્યના મૂળભૂત અધિકારને પણ અસર કરે છે. બંધારણની કલમ 21 હેઠળ આપણને પ્રદૂષણ મુક્ત વાતાવરણમાં જીવવાનો અધિકાર છે.

કોર્ટે કહ્યું- પોલીસે સરકારના આદેશને ગંભીરતાથી લીધો નથી

સુનાવણી દરમિયાન કોર્ટે ફટાકડા પર પ્રતિબંધ લાગુ કરવાની રીત પર અસંતોષ વ્યક્ત કર્યો હતો. બેન્ચે કહ્યું કે દિલ્હી પોલીસે 14 ઓક્ટોબરે દિલ્હી સરકાર દ્વારા લાદવામાં આવેલા પ્રતિબંધના આદેશને ગંભીરતાથી લીધો નથી. દિલ્હી પોલીસે તમામ લાઇસન્સ ધારકોને ફટાકડાનું વેચાણ તાત્કાલિક બંધ કરવા માટે જાણ કરવી જોઈતી હતી.

કોર્ટે કહ્યું કે જે સંસ્થાઓ ઓનલાઈન ફટાકડા વેચે છે તેમને દિલ્હી પોલીસે તાત્કાલિક માહિતી આપવી જોઈએ. જેથી તેઓ રાજધાની દિલ્હીમાં ફટાકડા વેચવાનું બંધ કરે.

કોર્ટે વધુમાં કહ્યું – પોલીસ કમિશનરે ખાતરી કરવી જોઈએ કે તમામ સ્થાનિક પોલીસ સ્ટેશનના સ્ટેશન ઈન્ચાર્જ આખા વર્ષ દરમિયાન ફટાકડા પરના પ્રતિબંધના અમલ માટે જવાબદાર રહેશે.

​​​​​​​