CJIએ કોર્ટમાં જુનિયર વકીલો માટે સ્ટૂલ મૂકાવ્યા: તેમના પર બેસીને પણ જોયું; સોલિસિટર જનરલે કહ્યું- ચીફ જસ્ટિસ ઉદારતાનું પ્રતીક

CJIના આદેશ બાદ કોર્ટરૂમમાં મુકવામાં આવેલ સ્ટૂલ.

મંગળવારે સુપ્રીમ કોર્ટમાં એક કેસની સુનાવણી દરમિયાન ચીફ જસ્ટિસ ડીવાય ચંદ્રચુડે જુનિયર વકીલોની બેઠકનો મુદ્દો ઉઠાવ્યો હતો. તેમણે સોલિસિટર જનરલ તુષાર મહેતાને કહ્યું કે આપણા તમામ જુનિયરો અહીં દરરોજ હાથમાં લેપટોપ લઈને ઊભા રહે છે. મુખ્ય ન્યાયાધીશે કોર્ટ માસ્ટરને જુનિયર વકીલો માટે સ્ટૂલની વ્યવસ્થા કરવા કહ્યું હતું.

થોડા સમય પછી, જ્યારે કોર્ટમાં સ્ટૂલ મૂકવામાં આવ્યા હતા, ત્યારે CJI પોતે તેમના પર બેઠા હતા અને જોયું કે તે આરામદાયક છે કે નહીં અને તેના પર બેસવાથી કોર્ટની સુનાવણી જોવામાં જુનિયર વકીલોને કોઈ સમસ્યા થશે કે કેમ. સોલિસિટર જનરલે આ માટે CJIની પ્રશંસા કરી હતી. તેમણે કહ્યું કે મુખ્ય ન્યાયાધીશ ઉદારતાનું પ્રતિક છે. તેમણે જે કર્યું તે પ્રશંસનીય છે.

સુપ્રીમ કોર્ટમાં ચાલી રહેલી સુનાવણીની આ ફાઇલ તસવીર છે. જેમાં જુનિયર વકીલો વકીલોની પ્રથમ હરોળની પાછળ ઉભેલા જોવા મળે છે.

સોલિસિટર જનરલને વચ્ચે અટકાવીને બેઠક વ્યવસ્થાનો મુદ્દો ઉઠાવ્યો
આ ઘટના ત્યારે બની જ્યારે CJIની આગેવાની હેઠળ નવ ન્યાયાધીશોની બંધારણીય બેંચ 1990ના કેસ અંગે દાખલ કરાયેલી અરજીઓની સુનાવણી કરી રહી હતી. સોલિસિટર જનરલ તુષાર મહેતા કેન્દ્ર સરકાર વતી તેમના મંતવ્યો રજૂ કરી રહ્યા હતા, ત્યારે CJIએ તેમને અટકાવ્યા અને જુનિયર વકીલોની બેઠક વ્યવસ્થા વિશે વાત કરવાનું શરૂ કર્યું.

CJIની વાત સાંભળ્યા બાદ સોલિસિટર જનરલ તુષાર મહેતાએ કહ્યું કે તેઓ પણ ઘણા દિવસોથી આ મામલામાં ધ્યાન આપી રહ્યા છે અને કોર્ટમાં હાજર વકીલોને અપીલ કરી છે કે જે વકીલો આ કેસ સાથે જોડાયેલા નથી તેઓ જુનિયર વકીલોને માટે પોતાની ખુરશી ખાલી કરી આપે.

જેના જવાબમાં ચીફ જસ્ટિસે કહ્યું કે બપોરે કોર્ટ માસ્ટર જોશે કે આ તમામ જુનિયર વકીલો તમારી પાછળ બેસી શકે કે કેમ. મેં કોર્ટ માસ્ટરને પૂછ્યું છે કે તેઓ અમુક સ્ટૂલ મૂકી શકે છે કે કેમ. આપણે જુનિયર વકીલો માટે સ્ટૂલ રાખવાનો પ્રયાસ કરીશું.

સીજેઆઈએ કહ્યું કે તેમણે કોર્ટ માસ્ટરને જુનિયર વકીલો માટે કેટલાક સ્ટૂલ રાખવાનો પ્રયાસ કરવા કહ્યું છે. (ફાઇલ ફોટો)

લંચ પછી, કોર્ટમાં સ્ટૂલ મૂકવામાં આવ્યા હતા, CJIએ તેમના પર બેસીને પણ જોયું
બપોરના ભોજન પછી, જ્યારે બેન્ચ ફરીથી કેસની સુનાવણી માટે બેઠી, ત્યારે કોર્ટરૂમમાં વકીલો માટે સ્ટૂલ રાખવામાં આવ્યા હતા. સુપ્રીમ કોર્ટ રજિસ્ટ્રીના સૂત્રોએ જણાવ્યું હતું કે મુખ્ય ન્યાયાધીશે યુવા વકીલોની બેઠક વ્યવસ્થા કરવા માટે સૂચના આપી હતી.

કોર્ટ શરૂ થાય તે પહેલા જ સીજેઆઈએ બેઠક વ્યવસ્થાનો સ્ટોક લીધો હતો. તેઓ કોર્ટમાં એ જગ્યાએ આવ્યા જ્યાં જુનિયર વકીલો ઊભા હતા અને પોતે સ્ટૂલ પર બેસીને જોયું કે બધું બરાબર છે કે નહીં. તેમણે એ પણ જોયું કે વકીલોને ત્યાં બેસીને કેસની સુનાવણી જોવામાં કોઈ સમસ્યા નહીં થાયને અથવા સોલિસિટર જનરલ માટે કોઈ અડચણ ઊભી થશે નહીંને.

સોલિસિટર જનરલે કહ્યું- પોતાના જુનિયરની ચિંતા CJIની ઉદારતા દર્શાવે છે
આ ઘટના અંગે સોલિસિટર જનરલ તુષાર મહેતાએ કહ્યું કે ચીફ જસ્ટિસ ઉદારતાના પ્રતિક છે. તેમણે આજે જે કર્યું તે અનોખું હતું એટલું જ નહીં, તમામ અદાલતોએ તેનું પાલન કરવું જોઈએ. ન્યાયિક પદાનુક્રમના સર્વોચ્ચ પદ પર બેઠેલી વ્યક્તિ કોઈને જાણ કર્યા વિના જુનિયર વકીલોની સમસ્યાઓ અંગે ચિંતિત છે તે પ્રશંસનીય છે. જુનિયર વકીલો પાસે CJIનો આભાર માનવા માટે શબ્દો નહોતા. હું પોતે લાગણીઓથી ભરેલો છું.