બજેટ પહેલાં કેન્દ્રએ સર્વપક્ષીય બેઠક બોલાવી: આવતીકાલથી ચોમાસું સત્ર, 23 તારીખે દેશનું બજેટ રજૂ થશે; આ 5 મુદ્દા પર હોબાળો થવાનો નક્કી

સંસદના ચોમાસું સત્ર અને બજેટ પહેલા સંસદ ભવન ખાતે સર્વપક્ષીય બેઠક બોલાવવામાં આવી હતી. બેઠકમાં કોંગ્રેસે લોકસભાના ડેપ્યુટી સ્પીકર પદની માંગણી કરી હતી. એમ પણ કહ્યું- NEET મુદ્દે લોકસભામાં ચર્ચા થવી જોઈએ. સપા નેતા રામ ગોપાલ યાદવે યુપી કંવર યાત્રા રૂટ પરની દુકાનો પર નેમ પ્લેટ લગાવવાનો મુદ્દો ઉઠાવ્યો હતો.

કોંગ્રેસ નેતા જયરામ રમેશે કહ્યું- બેઠકમાં JDUએ બિહાર માટે વિશેષ દરજ્જાની માગ કરી, YSRCPએ પણ આંધ્રપ્રદેશને વિશેષ દરજ્જાની માગ કરી.

કેન્દ્ર સરકાર દ્વારા બોલાવવામાં આવેલી આ બેઠકમાં કોંગ્રેસના જયરામ રમેશ, AAP સાંસદ સંજય સિંહ, AIMIM ચીફ અસદુદ્દીન ઓવૈસી સહિતના મોટા વિપક્ષી નેતાઓએ હાજરી આપી હતી. જ્યારે મમતા બેનર્જીની પાર્ટી ટીએમસી તેમાં આવી નથી. પાર્ટીના નેતા ડેરેક ઓ’બ્રાયને સંસદીય બાબતોના મંત્રી કિરેન રિજિજુને પત્ર લખીને કહ્યું કે તેમની પાર્ટીનો કોલકાતામાં કાર્યક્રમ છે, તેથી તે બેઠકમાં ભાગ લઈ શકશે નહીં.

સંસદના સુચારૂ સંચાલન માટે ચોમાસુ સત્ર દરમિયાન સર્વપક્ષીય બેઠક બોલાવવામાં આવે છે. કેટલાક મુદ્દાઓ પર વિપક્ષ અને સરકાર વચ્ચે હંમેશા સંઘર્ષની સ્થિતિ રહે છે, તેથી સંસદમાં હંગામો થાય છે અને સત્ર યોગ્ય રીતે ચાલતું નથી.

રક્ષા મંત્રી રાજનાથ સિંહ સર્વપક્ષીય બેઠકમાં ભાગ લેવા પહોંચ્યા હતા.

આ બેઠકમાં ભાગ લેવા માટે સ્વાસ્થ્ય મંત્રી અને બીજેપી અધ્યક્ષ જેપી નડ્ડા પણ આવ્યા હતા.

સર્વપક્ષીય બેઠકમાં AIMIM ચીફ અસદુદ્દીન ઓવૈસી પણ હાજર હતા.

કોંગ્રેસ નેતા જયરામ રમેશ પણ બેઠકમાં ભાગ લેવા આવ્યા હતા.

AAP સાંસદ સંજય સિંહે પણ સર્વપક્ષીય બેઠકમાં ભાગ લીધો હતો.

લોક જનશક્તિ પાર્ટીના વડા અને કેન્દ્રીય મંત્રી ચિરાગ પાસવાન પણ બેઠકમાં હાજર રહ્યા હતા.

રાષ્ટ્રવાદી કોંગ્રેસ પાર્ટી (NCP) અજિત પવાર જૂથના નેતા પ્રફુલ્લ પટેલ પણ બેઠકમાં આવ્યા હતા.

સંસદની કાર્યવાહીમાં દર મિનિટે 2.5 લાખ રૂપિયાનો ખર્ચ
સંસદની કાર્યવાહીની એક મિનિટ પાછળ લગભગ અઢી લાખ રૂપિયાનો ખર્ચ થાય છે. એટલે કે આ રકમ પ્રતિ કલાક 1.5 કરોડ રૂપિયા છે. આ ખર્ચ સાંસદોને મળતા પગાર અને ભથ્થા, સંસદ સચિવાલય પર ખર્ચ, સચિવાલયના કર્મચારીઓના પગાર અને સાંસદોની સુવિધાઓ પર ખર્ચવામાં આવે છે. એટલે કે જ્યારે પણ હંગામાને કારણે સંસદ સ્થગિત થાય છે ત્યારે સામાન્ય જનતાને નુકસાન થાય છે કારણ કે તેઓ લાખો રૂપિયા ટેક્સના રૂપમાં ચૂકવે છે.

મોદી સરકારના ત્રીજા કાર્યકાળનું પ્રથમ બજેટ
સંસદનું ચોમાસુ સત્ર 22 જુલાઈથી શરૂ થઈ રહ્યું છે. 12 ઓગસ્ટ સુધી ચાલશે. લોકસભા ચૂંટણી બાદ કેન્દ્રમાં ત્રીજી વખત સરકાર બનાવ્યા બાદ વડાપ્રધાન મોદીનું આ પ્રથમ બજેટ છે. નાણામંત્રી નિર્મલા સીતારમણ 23 જુલાઈના રોજ ગૃહમાં બજેટ રજૂ કરશે, ત્યારબાદ બંને ગૃહોમાં ચર્ચા થશે.

5 મુદ્દા કે જેના પર હોબાળો થવાનો નક્કી

1. NEET-UG પેપર લીક: NEET-UG પેપર લીક કેસમાં CBIએ અત્યાર સુધીમાં 12 ધરપકડ કરી છે. 7 રાજ્યોની પોલીસે 45 આરોપીઓની ધરપકડ કરી છે. જોકે, સુપ્રીમ કોર્ટના આદેશ પર NTAએ રાજ્ય, શહેર અને કેન્દ્ર મુજબના પરિણામો જાહેર કર્યા છે. પરંતુ વિપક્ષ ગત સત્રની જેમ આ વખતે પણ આ મુદ્દે હંગામો મચાવી શકે છે.

2. અગ્નિવીર (બેરોજગારી): મુંબઈમાં એક કાર્યક્રમમાં પીએમ મોદીએ કહ્યું હતું – છેલ્લા 4 વર્ષમાં 8 કરોડ લોકોને રોજગાર મળ્યો છે. વિપક્ષ આ ડેટા પર સરકારને ઘેરી શકે છે. બીજી તરફ સરકારના સહયોગી જેડીયુના પ્રવક્તા કેસી ત્યાગીએ પણ અગ્નિવીરમાં ફેરફારની માગ કરી છે. જો કે, સરકારે 12 જુલાઈ, 2024ના રોજ પૂર્વ અગ્નિવીર માટે કેન્દ્રીય સશસ્ત્ર પોલીસ દળો (CAPF) ભરતીમાં 10 ટકા બેઠકો અનામત રાખવાનો નિર્ણય કર્યો હતો. તે જ સમયે, 17 જુલાઈના રોજ, હરિયાણાના મુખ્યમંત્રી નાયબ સિંહ સૈનીએ રાજ્યમાં સરકારી નોકરીઓમાં અગ્નિવીરોને 10 ટકા અનામત આપવાની જાહેરાત કરી છે.

3. જમ્મુ અને કાશ્મીરમાં આતંકવાદી હુમલો: 2021થી, એકલા જમ્મુમાં 22 આતંકવાદી ઘટનાઓ બની છે. આ 3 વર્ષમાં 47 જવાનો શહીદ થયા અને 23 નાગરિકોનાં મોત થયાં. સરકારની રચના બાદ જૂન અને જુલાઈમાં જમ્મુ-કાશ્મીરના રાજૌરી, ડોડા, રિયાસી અને કઠુઆમાં 7 આતંકી હુમલા થયા છે. જેમાં 11 જવાનો પણ શહીદ થયા છે. વિપક્ષ માટે પણ આ એક મોટો મુદ્દો હશે.

4. મણિપુર હિંસા: રાહુલ ગાંધી છેલ્લા સત્રના અંત પછી મણિપુર પ્રવાસ પર ગયા હતા. મણિપુરના મુદ્દે રાહુલ સતત વડાપ્રધાન પર નિશાન સાધી રહ્યા છે. ત્યાં ફરી હિંસાની ઘટનાઓ વધી છે. મોદીનું મણિપુરની મુલાકાત ન લેવી અને હિંસા રોકવા માટે પગલાં ન લેવા એ વિપક્ષ માટે હંગામો મચાવવાનું ટ્રમ્પ કાર્ડ હશે.

5. ટ્રેન અકસ્માતો: રેલવેએ નાણાકીય વર્ષ 2022-23માં દેશભરમાં ઓછામાં ઓછા 5000 KM માર્ગો પર કવચ લગાવવાનો લક્ષ્યાંક રાખ્યો હતો, પરંતુ જૂન 2024 સુધીમાં તે ફક્ત 1500 KMના પાટા પર જ લગાવવામાં સફળ રહ્યું છે. તાજેતરના કંચનજંગા અને દિબ્રુગઢ ટ્રેન દુર્ઘટના, જેમાં લગભગ એક ડઝન લોકોનાં મોત થયા છે, તે વિપક્ષને વધુ હોબાળો કરવાની તક આપી શકે છે.