બોલની સાથે બેટ પણ હવામાં ઊડ્યું: પંતનું ‘ધોની સ્ટાઈલ’ ક્વિક સ્ટમ્પિંગ, ફ્રેઝરે બાઉન્ડ્રીથી થ્રો માર્યો ને બિશ્નોઈએ ચાલતી પકડી; મોમેન્ટ્સ

IPL-2024ની 64મી મેચમાં દિલ્હી કેપિટલ્સે લખનઉ સુપર જાયન્ટ્સને 19 રનથી હરાવ્યું. રવિવારે દિલ્હીના અરુણ જેટલી સ્ટેડિયમમાં લખનઉએ ટોસ જીતીને બોલિંગ કરવાનું પસંદ કર્યું હતું. દિલ્હીએ હોમ ગ્રાઉન્ડ પર 20 ઓવરમાં 4 વિકેટે 208 રન બનાવ્યા હતા. જવાબમાં લખનૌની ટીમ 20 ઓવરમાં 9 વિકેટે 189 રન જ બનાવી શકી હતી.

મેચમાં અભિષેક પોરેલે એક હાથે સિક્સર ફટકારી હતી. બેટિંગ દરમિયાન દિલ્હીના કેપ્ટન ઋષભ પંતનું બેટ હાથમાંથી સરકી ગયું. જ્યારે દિલ્હીના ખેલાડી જેક-ફ્રેઝર મેગાર્કે બિશ્નોઈને ડાયરેક્ટ થ્રોથી રન આઉટ કર્યો હતો. મેચ મોમેન્ટ્સ…

1. રાહુલે જગલિંગ કેચ લીધો
કેએલ રાહુલે શાનદાર કેચ લીધો હતો. દિલ્હીની ઈનિંગની 9મી ઓવરમાં લખનઉ તરફથી રવિ બિશ્નોઈ બોલિંગ કરવા આવ્યો હતો. શાઈ હોપ ઓવરના ત્રીજા બોલ પર સ્ટ્રાઈક પર હતો. બિશ્નોઈના બોલ પર હોપે કવર પર મોટો શોટ રમવાનો પ્રયાસ કર્યો, પરંતુ આ બોલ કેએલ રાહુલ તરફ આવ્યો. પહેલા કેએલ રાહુલના હાથમાંથી બોલ સરકી ગયો અને પછી કોઈ વિલંબ કર્યા વિના કેએલએ શાનદાર ડાઈવ લગાવીને કેચ પકડ્યો. આ દરમિયાન શાઈ હોપ 38 રન બનાવીને આઉટ થયો હતો.

કેએલ રાહુલે ફિલ્ડર તરીકે સિઝનનો પહેલો કેચ લીધો હતો.

2. પોરેલ એક હાથે સિક્સર ફટકારી
DC ઓપનર અભિષેક પોરેલે એક હાથે સિક્સર ફટકારી હતી. નવીન-ઉલ-હકે છઠ્ઠી ઓવરના પહેલા બોલ પર શોર્ટ બોલ ફેંક્યો હતો. આના પર પોરેલે પુલ શોટ રમ્યો હતો. જોકે, બેટ તેનો એક હાથમાંથી છૂટી ગયું હતું. જો કે, બોલ યોગ્ય સમયે બેટ સાથે કનેક્ટ થયો અને ફાઈન લેગ પર સિક્સ મળી.

અભિષેક પોરેલે મેચમાં કુલ 4 સિક્સર ફટકારી હતી.

3. પંથના હાથમાંથી બેટ છૂટ્યું
દિલ્હી કેપિટલ્સના કેપ્ટન રિષભ પંતના હાથમાંથી બેટ છટકી ગયું. મોહસીન ખાને 15મી ઓવરના પાંચમા બોલ પર લેન્થ બોલ ફેંક્યો હતો. આના પર પંતે બેટને જોરથી સ્વિંગ કર્યું. જોકે, બોલ વાગતાં જ બેટ બોલ સાથે હવામાં ઉડ્યું હતું. બેટ સીધું બેકવર્ડ સ્ક્વેર લેગ તરફ ગયું અને બોલ થર્ડ મેન તરફ ગયો.

રિષભ પંત 33 રન બનાવીને આઉટ થયો હતો.

4. બિશ્નોઈએ અક્ષરનો કેચ છોડ્યો
LSG ખેલાડી રવિ બિશ્નોઈ અક્ષર પટેલનો છોડ્યો હતો. મેચની છેલ્લી ઓવરમાં યુદ્ધવીર સિંહે અક્ષરને લેન્થ બોલ ફેંક્યો હતો. આના પર અક્ષર ડીપ મિડવિકેટ તરફ રમ્યો. ત્યાં ફિલ્ડિંગ કરી રહેલા રવિ બિશ્નોઈએ તેનો કેચ છોડ્યો હતો.

બોલિંગ દરમિયાન રવિ બિશ્નોઈએ મેચમાં એક વિકેટ લીધી હતી.

5. પંતનું ક્વિક સ્ટમ્પિંગ, સ્ટોઇનિસ આઉટ
રિષભ પંતે અક્ષર પટેલના બોલ પર ક્વિક સ્ટમ્પિંગ કરીને માર્કસ સ્ટોઇનિસને આઉટ કર્યો હતો. LSGની ઇનિંગની ચોથી ઓવરના પ્રથમ બોલ પર અક્ષર પટેલે લેન્થ બોલ ફેંક્યો હતો. આના પર સ્ટોઇનિસ મોટો શોટ રમવા માટે આગળ વધ્યો પરંતુ તે ચૂકી ગયો. જેવો બોલ વિકેટકીપર તરફ ગયો, પંતે સ્ટમ્પ કરીને સ્ટોઇનિસને આઉટ કર્યો.

પંતે આ સિઝનમાં પાંચ સ્ટમ્પિંગ કર્યા હતા.

6. જેક-ફ્રેઝરે બાઉન્ડ્રીથી માર્યો ડાયરેક્ટ થ્રો, બિશ્નોઈ રન આઉટ
દિલ્હી કેપિટલ્સના ખેલાડી જેક ફ્રેઝર-મેકગર્કે લખનઉ સુપર જાયન્ટ્સના બેટર રવિ બિશ્નોઈને આઉટ કરવા માટે ડાયરેક્ટ થ્રો કર્યો હતો. 19મી ઓવરના ત્રીજા બોલ પર અરશદ ખાન ડબલ રન માટે દોડ્યો હતો, પરંતુ બિશ્નોઈને નોન-સ્ટ્રાઈકર એન્ડ પર પાછા ફરવામાં મોડું થઈ ગયું હતું અને મેકગર્કે ડીપ મિડવિકેટમાંથી ડાયરેક્ટ થ્રો કરીને બિશ્નોઈને પેવેલિયનમાં મોકલ્યો હતો.

રવિ બિશ્નોઈની વિકેટની ઉજવણી કરતો મુકેશ કુમાર.