‘યે આજકલ કે બચ્ચે’: રોહિતે યશસ્વી, સરફરાઝ અને જુરેલની અલગ રીતે પ્રશંસા કરી; ઇન્સ્ટા સ્ટોરી પર યંગ સ્ટાર્સની તસવીરો પોસ્ટ કરી

ટીમ ઈન્ડિયાના કેપ્ટન રોહિત શર્માએ યશસ્વી જયસ્વાલ, સરફરાઝ ખાન અને ધ્રુવ જુરેલની અલગ રીતે પ્રશંસા કરી છે. સોમવાર, 19 ફેબ્રુઆરીના રોજ, રોહિતે તેની ઇન્સ્ટાગ્રામ સ્ટોરીમાં ત્રણેય યુવા સ્ટાર્સનો ફોટો પોસ્ટ કર્યો. ફોટો પર કેપ્શન ‘યે આજકલ કે બચ્ચે’ લખેલું છે.

ભારતે પાંચ મેચની ટેસ્ટ શ્રેણીની ત્રીજી મેચમાં ઇંગ્લેન્ડને રેકોર્ડ 434 રનથી હરાવ્યું હતું. ભારતની જીતમાં યશસ્વી, સરફરાઝ અને જુરેલે મહત્વનું યોગદાન આપ્યું હતું. સરફરાઝ અને જુરેલની આ આંતરરાષ્ટ્રીય ડેબ્યૂ મેચ હતી.

યશસ્વી જયસ્વાલે 214 રનની અણનમ ઇનિંગ રમી, 12 સિક્સ ફટકારી
યશસ્વી જયસ્વાલે ત્રીજી ટેસ્ટની બીજી ઇનિંગમાં 214 રનની અણનમ ઇનિંગ રમી હતી. આ ઇનિંગમાં તેણે 12 સિક્સ ફટકારી હતી, જે એક ઇનિંગમાં કોઇપણ ભારતીયની સૌથી વધુ છે. આ શ્રેણીમાં યશસ્વીની આ બીજી બેવડી સદી હતી. તેણે શ્રેણીની પ્રથમ મેચમાં બેવડી સદી પણ ફટકારી હતી. યશસ્વીએ અત્યાર સુધી માત્ર 7 ટેસ્ટ રમી છે. તેણે ગયા વર્ષે જ ટેસ્ટ ડેબ્યૂ કર્યું હતું.

સરફરાઝે ડેબ્યૂ મેચમાં બંને ઇનિંગ્સમાં અડધી સદી ફટકારી
26 વર્ષના રાઇટ હેન્ડેડ બેટર સરફરાઝ ખાનની આ પ્રથમ આંતરરાષ્ટ્રીય મેચ હતી. સરફરાઝે ડેબ્યૂ મેચની બંને ઇનિંગ્સમાં અડધી સદી ફટકારી હતી. પ્રથમ દાવમાં તેણે 66 બોલમાં 62 રનની ઇનિંગ રમી હતી. રવીન્દ્ર જાડેજા સાથે કન્ફ્યુઝનના કારણે સરફરાઝ રનઆઉટ થયો હતો. 82મી ઓવરના પાંચમા બોલ પર મિડ-ઓન તરફ શોટ રમ્યા બાદ જાડેજા રન લેવા આગળ આવ્યો, સરફરાઝ પણ બીજા છેડેથી દોડ્યો. જાડેજાએ સરફરાઝને રન લેવાની મનાઈ કરી હતી, પરંતુ સરફરાઝ ક્રિઝ તરફ પાછો આવી રહ્યો હતો કે તરત જ માર્ક વુડે તેને સીધો થ્રો કરીને રન આઉટ કર્યો.

સરફરાઝ બીજા દાવમાં 68 રન બનાવીને અણનમ પરત ફર્યો હતો.

સરફરાઝ ડેબ્યૂમાં બંને ઇનિંગ્સમાં અડધી સદી ફટકારનાર ચોથો ભારતીય બન્યો
સરફરાઝ ખાન ડેબ્યૂ મેચની બંને ઇનિંગ્સમાં અડધી સદી ફટકારનાર ચોથો ભારતીય બેટર બન્યો હતો. સરફરાઝ પહેલા, 1934માં ઇંગ્લેન્ડ વિરુદ્ધ દિલવાર હુસૈન, 1971માં વેસ્ટ ઈન્ડિઝ વિરુદ્ધ સુનીલ ગાવસ્કર અને 2021માં ન્યૂઝીલેન્ડ વિરુદ્ધ ડેબ્યૂ વખતે શ્રેયસ અય્યરે બે વખત 50થી વધુ રન બનાવ્યા હતા.

જુરેલે 46 રનની ઇનિંગ રમી
23 વર્ષીય વિકેટકીપર બેટર ધ્રુવ જુરેલે રાજકોટમાં ટેસ્ટ ડેબ્યુ કર્યું હતું. જુરેલ ટેસ્ટમાં ડેબ્યૂ કરનાર 312મો ખેલાડી હતો. જુરેલે પણ આ મેચમાં 46 રનની ઇનિંગ રમી હતી. તેણે વિકેટકીપિંગમાં મહત્વનું યોગદાન આપ્યું હતું. ટોમ હાર્ટલી પ્રથમ દાવમાં રવીન્દ્ર જાડેજાના બોલ પર સ્ટમ્પ થઈ ગયો હતો. બીજી ઇનિંગમાં પણ બેન ફોક્સ જાડેજાના બોલ પર સ્ટમ્પ થઈ ગયો હતો. મોહમ્મદ સિરાજના થ્રો પર બેન ડકેટ રનઆઉટ થયો હતો.