નડ્ડાએ કહ્યું- પહેલા RSSની જરૂર હતી, આજે ભાજપ સક્ષમ છે: હવે ભાજપ પોતે સરકાર ચલાવવામાં સક્ષમ છે; કાશી-મથુરામાં મંદિરની કોઈ યોજના નથી

ભાજપના રાષ્ટ્રીય અધ્યક્ષ જેપી નડ્ડાએ કહ્યું કે પહેલા અમને (ભાજપ)ને રાષ્ટ્રીય સ્વયંસેવક સંઘ (આરએસએસ)ની જરૂર હતી, પરંતુ આજે ભાજપ સક્ષમ છે. આજે પાર્ટી પોતે જ સરકાર ચલાવી રહી છે. નડ્ડાએ એ પણ સ્પષ્ટ કર્યું કે હાલમાં કાશી-મથુરામાં મંદિર બનાવવાની કોઈ યોજના નથી. નડ્ડાએ ઈન્ડિયન એક્સપ્રેસને આપેલા ઈન્ટરવ્યુમાં આ વાત કહી.
વાંચો આ મુલાકાતના ખાસ મુદ્દા…

પ્રશ્ન: ભૂતપૂર્વ વડા પ્રધાન અટલ બિહારી વાજપેયીના સમય અને હવે વચ્ચે RSSની સ્થિતિ કેવી રીતે બદલાઈ છે?
નડ્ડા: શરૂઆતમાં અમે થોડાં અસક્ષમ હતા. ત્યારે RSSની જરૂર પડતી હતી. આજે અમારો વિસ્તાર થઈ ગયો છે અને અમે સક્ષમ છીએ. તો હવે BJP જાતે જ નિર્ણયો લે છે. આ જ અંતર છે.

પ્રશ્ન: શું મથુરા અને કાશીમાં વિવાદિત સ્થળો પર મંદિરો બનાવવાની ભાજપની કોઈ યોજના છે?
નડ્ડાઃ ભાજપ પાસે એવો કોઈ વિચાર, યોજના કે ઈચ્છા નથી. આ અંગે હજુ સુધી કોઈ ચર્ચા થઈ નથી. અમારી સિસ્ટમ એવી રીતે કામ કરે છે કે પક્ષની વિચાર પ્રક્રિયા સંસદીય બોર્ડમાં ચર્ચા દ્વારા નક્કી કરવામાં આવે. પછી આ મુદ્દો રાષ્ટ્રીય પરિષદમાં જાય છે.

વડાપ્રધાન નરેન્દ્ર મોદીએ નક્કી કર્યું છે કે પાર્ટીનું ફોકસ ગરીબો, શોષિતો, દલિતો, મહિલાઓ, યુવાનો, ખેડૂતો અને સમાજના પછાત વર્ગો પર રહેશે. તેમને મુખ્ય પ્રવાહમાં લાવીને સશક્તિકરણ કરવું જોઈએ. આપણે તેમને મજબૂત કરવા પડશે.

પ્રશ્ન: યોગી આદિત્યનાથ અને હિમંતા બિસ્વા સરમા જેવા ભાજપના નેતાઓ તેમના ચૂંટણી પ્રચાર ભાષણોમાં કાશી અને મથુરામાં મંદિરોની વાત કરે છે. આ અંગે તમે શું કહેશો?
નડ્ડા: ભાજપે તેના પાલમપુર ઠરાવમાં (જૂન 1989ના) રામ મંદિરની માગનો સમાવેશ કર્યો હતો. લાંબા સંઘર્ષ બાદ મંદિરનું નિર્માણ થયું. તે અમારા એજન્ડામાં હતું. કેટલાક લોકો ભાવુક થઈ જાય છે અને અન્ય મુદ્દાઓ વિશે વાત કરવાનું શરૂ કરે છે. અમારી પાર્ટી એક મોટી પાર્ટી છે અને દરેક નેતાની વાત કરવાની સ્ટાઇલ હોય છે.