કોલકાતા19 મિનિટ પેહલા
- કૉપી લિંક
પશ્ચિમ બંગાળમાં શિક્ષક ભરતી કૌભાંડમાં નોકરી ગુમાવનારા શિક્ષકો અને નોન-ટીચિંગ કર્મચારીઓએ પોલીસ કાર્યવાહીના વિરોધમાં ભૂખ હડતાળની જાહેરાત કરી છે.
પશ્ચિમ બંગાળમાં શિક્ષક ભરતી કૌભાંડમાં નોકરી ગુમાવનારા શિક્ષકો અને નોન-ટીચિંગ સ્ટાફે ગુરુવારે પોલીસ કાર્યવાહીના વિરોધમાં ભૂખ હડતાળની જાહેરાત કરી હતી. બુધવાર રાતથી શિક્ષકો પશ્ચિમ બંગાળ સ્કૂલ સર્વિસ કમિશન (WBSSC) ઓફિસની બહાર વિરોધ પ્રદર્શન કરી રહ્યા છે.
અગાઉ, શિક્ષકોએ જિલ્લા નિરીક્ષક (DI)ની કચેરી બહાર પ્રદર્શન કર્યું હતું. જ્યાં પ્રદર્શનકારીઓએ પોલીસ પર લાઠીચાર્જ અને લાતો અને મુક્કાઓથી માર મારવાનો આરોપ લગાવ્યા હતા.
આ દરમિયાન, લોકસભામાં વિપક્ષના નેતા રાહુલ ગાંધીએ 8 એપ્રિલે રાષ્ટ્રપતિ દ્રૌપદી મુર્મુને 25,753 શિક્ષકો અને નોન-ટીચિંગ કર્મચારીઓની નિમણૂક રદ કરવા અંગે પત્ર લખ્યો હતો. આમાં તેમણે રાષ્ટ્રપતિ પાસે માંગ કરી છે કે જે લોકો નિર્દોષ છે તેમને નોકરીમાં રહેવા દેવામાં આવે.
આ મામલે સુપ્રીમ કોર્ટમાં 8 એપ્રિલે સુનાવણી થઈ હતી. કોર્ટે સ્કૂલ કર્મચારીઓ માટે વધારાની જગ્યાઓ બનાવવાના પશ્ચિમ બંગાળ કેબિનેટના નિર્ણયની સીબીઆઈ તપાસ પર રોક લગાવી દીધી હતી. જો કે, કોર્ટે કહ્યું કે આ મામલે તપાસ ચાલુ રહેશે.
બુધવાર રાતથી શિક્ષકો WBSSC ઓફિસની બહાર વિરોધ પ્રદર્શન કરી રહ્યા છે.
મમતા: કોર્ટના આદેશથી બંધાયેલા છીએ
આ મામલે, 7 એપ્રિલના રોજ, મુખ્યમંત્રી મમતા બેનર્જી એવા શિક્ષકો અને કર્મચારીઓને મળ્યા જેમની ભરતી સુપ્રીમ કોર્ટે રદ કરી છે. મમતા બેનર્જીએ કહ્યું કે અમે કોર્ટના આદેશથી બંધાયેલા છીએ. આ નિર્ણય એવા ઉમેદવારો માટે અન્યાયી છે જેઓ સક્ષમ શિક્ષકો હતા.
તેમણે કહ્યું- તમારે લોકોએ એવું ન વિચારવું જોઈએ કે અમે નિર્ણય સ્વીકારી લીધો છે. અમે પથ્થર દિલના નથી. આ કહેવા બદલ મને જેલમાં ધકેલી શકો છે, પણ મને કોઈ ફરક પડતો નથી. સુપ્રીમ કોર્ટના નિર્ણય બાદ, પશ્ચિમ બંગાળ ભાજપે મુખ્યમંત્રી મમતા બેનર્જીના રાજીનામા અને તેમને જેલમાં ધકેલવાની માંગ કરી છે.
3એપ્રિલના રોજ, સુપ્રીમ કોર્ટે શિક્ષક ભરતી કૌભાંડ સંબંધિત 25,752 નિમણૂકો રદ કરી હતી. જે બાદ વિરોધ પ્રદર્શનો વધુ ઉગ્ર બન્યા.
ભાજપે કહ્યું- 21 એપ્રિલે સચિવાલય તરફ કૂચ કરશે
પશ્ચિમ બંગાળ વિધાનસભામાં વિપક્ષના નેતા સુવેન્દુ અધિકારીએ આ કેસમાં મુખ્યમંત્રીને દોષી ઠેરવ્યા છે. તેમણે કહ્યું કે ઘણી તકો મળવા છતાં, સરકારે સુપ્રીમ કોર્ટ દ્વારા માંગવામાં આવેલી યાદી પૂરી પાડી નથી.
રાજ્ય સરકાર 15 એપ્રિલ સુધીમાં યાદી સુપરત કરી શકે છે. જો આવું નહીં થાય, તો અમે 21 એપ્રિલે એક લાખ લોકો સાથે નબન્ના તરફ કૂચ કરીશું. આ એક બિન-રાજકીય, જનઆંદોલન હશે.
તેમજ, ભાજપના સાંસદ અને કલકત્તા હાઈકોર્ટના ભૂતપૂર્વ જસ્ટિસ અભિજીત ગંગોપાધ્યાયે કહ્યું કે જો સરકારે અગાઉના આદેશનો સ્વીકાર કર્યો હોત, તો 19 હજાર શિક્ષકોએ તેમની નોકરી ગુમાવી ન હોત.
આખા મામલાને બે મુદ્દામાં સમજો…
- પશ્ચિમ બંગાળ સરકારે 2016માં સ્ટેટ લેવલ સિલેક્શન ટેસ્ટ- 2016 (SLCT) દ્વારા સરકારી અને સહાયિત સ્કૂલો માટે શિક્ષણ અને નોન-ટીચિંગ કર્મચારીઓની ભરતી કરી હતી. તે સમયે 24,640 ખાલી જગ્યાઓ માટે 23 લાખથી વધુ લોકોએ ભરતી પરીક્ષા આપી હતી.
- આ ભરતીમાં 5 થી 15 લાખ રૂપિયાની લાંચ લેવાનો આરોપ છે. આ મામલે કોલકાતા હાઈકોર્ટને ઘણી ફરિયાદો મળી હતી. ભરતી અનિયમિતતાના કેસમાં, સીબીઆઈએ રાજ્યના ભૂતપૂર્વ શિક્ષણ પ્રધાન પાર્થ ચેટર્જી, તેમના નજીકના સહાયક અર્પિતા મુખર્જી અને કેટલાક SSC અધિકારીઓની ધરપકડ કરી હતી. અર્પિતા વ્યવસાયે એક મોડેલ હતી.
આ બાબતને લગતા આ સમાચાર પણ વાંચો…
બંગાળમાં 25,753 શિક્ષકોને બરતરફ કરવાના આદેશને સુપ્રીમ કોર્ટે માન્ય રાખ્યો: પસંદગી પ્રક્રિયા ખોટી છે
સુપ્રીમ કોર્ટે પશ્ચિમ બંગાળ સ્કૂલ ભરતી કૌભાંડ સંબંધિત કોલકાતા હાઈકોર્ટના ચુકાદાને માન્ય રાખ્યો છે. પશ્ચિમ બંગાળમાં, SSCએ 2016 માં 25 હજાર શિક્ષકો અને બિન-શિક્ષકોની નિમણૂક કરી હતી. હાઇકોર્ટે આ નિમણૂકોને ગેરકાયદેસર જાહેર કરી હતી અને કર્મચારીઓને બરતરફ કર્યા હતા. સુપ્રીમ કોર્ટે હાઈકોર્ટની તપાસને સમર્થન આપ્યું અને કહ્યું કે સમગ્ર પ્રક્રિયામાં છેતરપિંડી થઈ હતી. આમાં સુધારાને કોઈ સ્થાન નથી.
