મહારાષ્ટ્રમાં NDA વચ્ચે સીટ વહેંચણીની ફોર્મ્યુલા લગભગ નક્કી: ભાજપ 27, શિવસેના 14 અને NCP 5 બેઠકો પર ચૂંટણી લડી શકે છે

મહારાષ્ટ્રમાં ભાજપ, શિવસેના અને એનસીપીના ગઠબંધન વચ્ચે લોકસભા ચૂંટણી માટે સીટ વહેંચણીની ફોર્મ્યુલા લગભગ નક્કી થઈ ગઈ છે. સૂત્રોના જણાવ્યા અનુસાર રાજ્યની 48 લોકસભા બેઠકોમાંથી ભાજપ 27, શિવસેના 14 અને NCP 5 બેઠકો પર ચૂંટણી લડશે. તેની સત્તાવાર જાહેરાત ટૂંક સમયમાં કરવામાં આવે તેવી શક્યતા છે.

અગાઉ, એવી અટકળો હતી કે રાજ્યની 48 લોકસભા બેઠકોમાંથી ભાજપ 30થી 32 બેઠકો પર, શિવસેના 10થી 12 બેઠકો પર અને NCP 6થી 8 બેઠકો પર પોતાના ઉમેદવારો ઉભા કરી શકે છે. 6 માર્ચે મુંબઈના સહ્યાદ્રી ગેસ્ટ હાઉસમાં અમિત શાહની હાજરીમાં યોજાયેલી બેઠકમાં આ સર્વસંમતિ સધાઈ હતી.

તે જ સમયે, મહાવિકાસ અઘાડીએ બેઠકોની વહેંચણીને અંતિમ સ્વરૂપ આપવા માટે ત્રણેય પક્ષો (કોંગ્રેસ, શિવસેના યુબીટી, એનસીપી શરદચંદ્ર પવાર)ની સાંજે 5 વાગ્યે બેઠક બોલાવી છે. ગઈકાલે જ શિવસેના ઉદ્ધવ જૂથે 17 ઉમેદવારોની જાહેરાત કરી હતી. જેમાંથી 3 બેઠકો પર કોંગ્રેસના દાવેદારો ટિકિટની રાહ જોઈ રહ્યા હતા. આ જાહેરાતથી શરદ પવાર નારાજ છે.

બુધવારે, જ્યારે શિવસેના યુબીટીએ 17 બેઠકો માટે તેના ઉમેદવારોની જાહેરાત કરી, ત્યારે શરદ પવારે કહ્યું કે અમારા સાથી પક્ષો ગઠબંધન ધર્મનું પાલન કરી રહ્યાં નથી.

3 બેઠકો પર ઉદ્ધવ જૂથના ઉમેદવારો, કોંગ્રેસના નેતાઓ નારાજ
ત્રણ બેઠકો એવી છે કે જ્યાં ઉદ્ધવ જૂથ અને કોંગ્રેસ વચ્ચેનો વિવાદ ઉગ્ર બન્યો છે. સીટની વહેંચણીથી નારાજ કોંગ્રેસના નેતાઓ સોનિયા ગાંધીને મળવા દિલ્હી પહોંચ્યા. આ ત્રણ બેઠકો છે– મુંબઈ ઉત્તર-પશ્ચિમ, મુંબઈ દક્ષિણ-મધ્ય અને સાંગલી.

કોંગ્રેસના સંજય નિરુપમ શિવસેના (UBT) અમોલ કીર્તિકરને મુંબઈ ઉત્તર-પશ્ચિમથી ટિકિટ મળવાથી નારાજ છે. તેમણે કહ્યું કે કીર્તિકર ખીચડી કૌભાંડનો કૌભાંડી છે.

ઉદ્ધવ ઠાકરેના નજીકના રાજ્યસભાના સભ્ય અનિલ દેસાઈને મુંબઈ દક્ષિણ-મધ્યથી ટિકિટ આપવામાં આવી છે. મુંબઈ કોંગ્રેસ અધ્યક્ષ વર્ષા ગાયકવાડ અહીંથી ચૂંટણી લડવા માગતા હતા.

તે જ સમયે કોંગ્રેસ વિશ્વજીત કદમને સાંગલીથી મેદાનમાં ઉતારવા માગતી હતી. ઉદ્ધવ જૂથે અહીં ચંદ્રહર પાટીલને ટિકિટ આપી છે.